“Портал»-ы архайд, Национ музей æмæ культурæйы иннæ объектты цалцæг

0
502

Цæгат Ирыстоны Сæргълæууæг БИТАРТЫ Вячеслав æмбæлгæ ведомствоты разамонджытæн бахæс кодта, цæмæй фæсивæдон сфæлдыстадон иугонд «Портал»-æн сбæлвырд кæной йæ барадон статус. Ахæм амынддзинадимæ Битары-фырт раныхас кодта, республикæйы Хицауады Сæрдар ТУСКЪАТЫ Таймураз, йæ хæдивæг ФАДЗАЙТЫ Æхсарбег æмæ арæзтад æмæ архитектурæйы министр ИКЪАТЫ Русланбег кæм архайдтой, уыцы æмбырды.

Республикæйы разамонæг профилон министрадæн бабар кодта, цæмæй бынаты æркæса, фæсивæдон иугонды архайды цы къуыхцытæ фæзынд, уыдонмæ. Зындгонд куыд у, афтæмæй иугонд «Портал» æрбынæттон Национ музейы æрдæгарæзт бæстыхайы. «Ацы фæсивæдон иугонды архайджыты тыххæй фехъуыстон, æцæг сæрæн адæм. Сфæлдыстадмæ æмхиц сты, байгом кодтой алыхуызон æрмадзтæ… Ахæм иугонд бахъахъхъæнын кæй хъæуы, уый дызæрдыггаг нæу. Фарстамæ æркæсын хъæуы, цæмæй сæ архайд ма фæкъуылымпы уа. Кæд сæ фæнды нырыккон аивады центры хуызы кусын, уæд уадз æмæ уа Национ музейы структурон музейы дæлхайад. Хорз уаид, ныронг кæм куыстой, уыцы бынаты сæ ныууадзын, кæнæ та сын хъæуы раттын æндæр бæстыхай», — загъта Битарты Вячеслав. Уый фæстæ фембæлды архайджытæ æрдзырдтой Национ музейы реконструкцийы фарстайыл. Ацы объект бахастой сæрмагонд федералон программæтæй иумæ æмæ дзы тагъд рæстæджы ногæй хъуамæ райдайой арæзтадон куыстытæ. Икъаты Русланбег куыд загъта, афтæмæй, объектæн ацы азмæ цы фæрæзтæ радих кæной, уыдонмæ æркæсгæйæ, сбæлвырд кæнын хъæуы ацы азы куыстыты бæрц. Фидæн азы та бавналдзысты музейы реконструкцийы дыккаг къæпхæнмæ. Уыцы æууæлтæ хынцгæйæ, республикæйы разамонæг Хицауады уæнгтæн бахæс кодта, цæмæй федералон программæмæ бахæссыны фæдыл æппæт хъæугæ документтæ дæр афойнадыл уой цæттæ. Уымæй уæлдай, æмбырды архайджытæ æркастысты республикæйы районты Культурæйы галуанты цалцæг æмæ арæзтады, стæй Дзæуджыхъæу æмæ муниципалитетты райрæзты фарстатæм.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here