Æгъуызарты Тамерланы рухс ном мысгæйæ

0
522

Æгъуызарты Тамерланы мæлæн бон — 19 февралы йæ ингæны размæ цы бирæ адæм æрбацыд, уыдонимæ уыдысты республикæйы разамынд, Хицауад æмæ Парламенты минæвæрттæ. РЦИ-Аланийы Сæргълæууæг БИТАРТЫ Вячеслав, Хицауады Сæрдар ТУСКЪАТЫ Таймураз, Парламенты Сæрдары хæдивæг КУЧИТЫ Гари, паддзахадон структурæтæ æмæ ведомствоты минæвæрттæ дидинджытæ сæвæрдтой Æгъуызары-фырты ингæныл.

“Йæ цæсгомыл — мидбылхудт, Йæ цæстытыл та — æнкъард фæд”

Æгъуызарты Тамерлан уыд тынг хæларзæрдæ æмæ фæлмæн адæймаг. Фæлæ уый иу мисхал дæр нæ ахызтаид рæстдзинады иувæрсты. Уыд раст æмæ уæззау сæрызондыл хæст адæймаг. Уыимæ, домаг — йæ бæрнон кусджытæй. Никуы дзы ничи фехъуыстаид иу уæлдай, æнæуаг, кæнæ искæй дæлдзиныггæнæг ныхас дæр. Уый иуæй-иу чиновниктау йæ сæр бæрзæндты нæ хаста, фæлæ-иу кæцыфæнды хуымæтæг адæймагимæ дæр кодта зæрдæйæ-зæрдæмæ ныхас. Йæ ныхас та алкæддæр фатау уыд раст.

Тамерланы ныгæнæн бон нæ горæты уынгты нæ цæхгæрмæ, нæ размæ азмæлæн дæр нал уыд адæмæй. Хистæрæй, кæстæрæй нæ урæдтой сæ цæссыг, афтæмæй йæ кад æмæ радимæ баныгæдтой Намысы аллейы.

Æгъуызары-фырт кæд цыбыр рæстæг акуыста нæ республикæйы Сæргълæууæджы бынаты, уæддæр нæ Ирыстоны хæрзæбонæн йæ къухы саразын бафтыд бирæ фарны хъуыддæгтæ. Хъыгагæн, йæ размæ цы бæрнон æмæ ахсджиаг хæстæ сæвæрдта, уыдон та йын кæронмæ сæххæст кæнын йæ къухы нал бафтыд, æмæ уый тыххæй абон нæ зæрдæтæ риссынц æмæ риссынц…

Æгъуызарты Тамерлан нæ республикæйы сæргъы куы ‘рлæууыд, уæд æй, фыццаджыдæр, адæм тынгдæр бауарзтой уый тыххæй, æмæ кæй уыд рæстдзинадыл тохгæнæг, йæ дæлбар кусджытæй Хицауады бынæттæм кæй райста, уыдон дæр уыдысты йæхи хуызæн Ирыстоны иузæрдион патриоттæ. Уыдонæй иу у, Тамерланы æрдæгконд хъуыддæгтæ абон кæронмæ сæххæст кæныныл удуæлдайæ чи архайы æмæ дывæр хъарутæй чи кусы, уый, нæ республикæйы Сæргълæууæг Битарты Вячеслав. Æмæ Хуыцау зæгъæд, Æгъуызары-фыртæн кæронмæ саразын цы хъуыддæгтæ нæ бантыст, уыдон сæххæст кæнын Битары-фырты къухы куыд бафта.

Æгъуызарты Тамерланы æрдз æрмæст дæсны æмæ арæхстджын разамонæджы курдиатæй нæ фæхайджын кодта, фæлæ ма йæм уыд, адæймаг фыццаджыдæр адæймаг цæмæй у, ахæм бирæ хорз миниуджытæ: ирон æгъдау, ирон æфсарм, рæстудæй макуы макæй бафхæрын, хистæртæн кад кæнын, кæстæртæн царды раст фæндаг бацамонын, нæ ирон æгъдау, нæ мадæлон æвзаг зæрдæйæ уарзын æмæ бирæ æндæр хорз миниуджытæ. Æз Æгъуызары-фыртимæ цы цыбыр рæстæг акуыстон, уый хонын мæ царды амондджындæр рæстæг. Уымæй райсæн уыд бирæ хорз миниуджытæ. Уыд комкоммæ æмæ æргом ныхасгæнаг. Нæ уарзта хиппæлой æмæ козбау адæймæгты. Кæдфæндыдæр-иу рæстæг ссардтаид, тыхст уавæрыиу чи бахауд, æмæ-иу æм æххуысагур чи ‘рбацыд, уыдонимæ зæрдæйæ-зæрдæмæ аныхас кæнынмæ æмæ сын-иу йæ бон цæмæй уыд, уымæй бакодта цæстуарзон æххуыс. Телесариал «Викинг» райдайы фæскадрты авторы ахæм ныхæстæй: «Когда-то боги наделили человека опасной силой, имя которой власть. Тот, кто испытал ощущение ее вкуса на своих устах, никогда уже не будет прежним». Æмæ уыцы ныхæстæ фехъусгæйæ, фыццаджыдæр мæ цæстыты раз сысты Тамерланы сурæт. Æвæдза, куыд хуымæтæг адæймаг уыд, æмæ уый кæд цыфæнды бæрзонд бынæтты куыста, уæддæр йæ адæммæ уæлбæхæй куыд никуы каст æмæ куыд рæстзæрдæйæ фæцард нæ ирон зæххыл. Уый та дзурæг у, лæг æппæты фыццаг лæг цæмæй у, уыцы хорз миниуджытыл. Тамерлан куыд хуымæтæг æмæ æрхъуыдыджын адæймаг уыд, уый тыххæй æрхæсдзынæн иу ахæм дæнцæг. Уый уыд 2016 азы 27 январы. Уæды Цæгат Кавказы Федералон зылды Æххæстбарджын минæвар Сергей Меликов æмæ Æгъуызарты Тамерлан тагъд-тагъд æрцæйхызтысты нæ республикæйы Хицауады хæдзары дыккаг уæладзыджы асинтыл бынмæ. Уыцы бон Тамерлан хъуамæ атахтаид Мæскуымæ.

Асинтыл æз дæр хæрхæмбæлд фæдæн семæ. Тамерлан мæ бафиппайдта цæстæнгасæй. Уымæн йæ бон уыд мæнæн йæ сæры змæлдæй салам раттын. Фæлæ уый, Меликовы фæндаг цæхгæрмæ алыг кæнгæйæ, уымæй хатыр ракургæйæ, мæ размæ рахызт æмæ мын зæрдиагæй райста мæ къух.

Уæд ма, хъыгагæн, фæстаг хатт райстон Æгъуызарты Тамерланы къух. Абон дæр ын æнкъарын йæ фæлмæн къухы армы хъарм. Фæстаг хатт ма йæ федтон, хорз ыл цы тар-цъæх костюм фидыдта, уый йæ уæлæ конд, афтæмæй. Уый уыд нæ фæстаг фембæлд.

Мæскуыйы рынчындонмæ куы бахауд, уæд æм æрвылбон дæр дзырдтон телефонæй. Йæ ныхасмæ гæсгæ мæ ныфс уыд, кæй фæдзæбæх уыдзæн, уымæй, фæлæ йæм 16 февралы телефонæй куы ныдздзырдтон, уæд дзы дзуапп нал райстон. Мæ SMS-мæ дæр мæм дзуапп нал æрбацыд.

2016 азы 19 февралы Æгъуызарты Тамерланæн йе ‘хсидгæ зæрдæ банцад йæ куыстæй. Афæдзы размæ… Мæ цæстыты раз та Æгъуызарты Тамерланы сурæт баззад афтæмæй: “Йæ цæсгомыл — мидбылхудт, Йæ цæстытыл та — æнкъард фæд.”

ДЗÆРÆХОХТЫ Зауыр

ОСТАВЬТЕ ОТВЕТ

Please enter your comment!
Please enter your name here