Алагиры районы рекреацион æмæ промышленнон хъомыс

0
581

РЦИ-Аланийы Сæргълæууæг БИТАРТЫ Вячеслав кусæг балцы уыдис Алагиры районы, уым бæстондæр базонгæ муниципалон сконды фæлладуадзæн, туристон, промышленнон хъомысимæ.

Кусæг балцы ма уыдысты РЦИ-Аланийы Хицауады Сæрдар Тускъаты Таймураз, йæ хæдивæг Фадзайты Æхсарбег, промышленность æмæ транспорты министр Хайдарбек Бутов, экономикон рæзты министр Томайты Хъазыбег, туризмы комитеты сæрдар Гаджиты Вильям, фæндæгты комитеты сæрдар Солиты Тариэль æмæ Алагиры районы сæргълæууæг Бутаты Арсен. Фыццагдæр уал бабæрæг кодтой Мамысоны ком. 2013 азы ам райдыдтой аразын туристон рекреацион комплекс, хардзгонд ыл æрцыд 2 миллиард сомы бæрц. Фæлæ федералон центр æхца кæй нал дих кæны, уымæ гæсгæ проект урæд æрцыд. Битарты Вячеслав куыд бафиппайдта, афтæмæй республикæ хъуамæ бацагура курорт дарддæр саразыны æндæр мадзæлттæ. Райдайын хъæуы чысыл, фæлæ царды чи разындзæн, ахæм хъуыддæгтæй: фæндæгты арæзтадæй, электрон тых æмæ газ бауадзынæй. Туристты æргом та раздахæн ис уыцы ран нырыккон канатон фæндаг саразынæй. Уымæ гæсгæ Туризмы комитетæн бахæс кодтой хæстæгдæр рæстæг уыцы хъуыддæгтæ пъланы равдисын. Иннæ зындгонд бынат — Цъæйы ком. Фæстаг рæстæг дзы инфраструктурæ лæмæгъ кæй у, уымæ гæсгæ туристтæ аивылдысты æндæр курорттæм. Цы хъыгдары Цъæйы рæзт, йæ раздæры уавæрмæ йæ цы хуызы ис сисæн, республикæйы Хицауад хъуамæ цæмæй баххуыс кæной? — ацы фарстатыл Битарты Вячеслав æрныхас кодта Цъæйы турбазæты хицæуттимæ. Республикæйы Сæргълæууæг куыд бафиппайдта, афтæмæй туристты æргом раздæрау Цъæймæ раздахынæн ис бирæ фадæттæ æмæ сæ хъæуы спайда кæнын. Ныхас уыдис мидисджын, æрхастæуыд уыцы гæнæнтæ дæр, фæлæ æнæ хуызæнæн фæндæгтæ, фæлгæсæн фæзтæ, фæлладуадзæн бынæттæ, электрон рухс, сыгъдæггæнæнты æнæрынцой куыст, фадатджын Интернетæй Цъæйы комы ногæй цард бауадзæн уыдзæн тынг зын. Уыцы æмбырды Битарты Вячеслав бæрнон адæймæгтæн бæлвырд хæстæ бабар кодта. Алагиры районы промышленнон куыстады раззагдæртæй иу уыдис Сопротивлениты завод, ныртæккæ йæ баивтой паддзахадон корпораци «Ростех»-мæ. Завод абон дæр уадзы резистортæ, уыдон та агуырд цæуынц вагæттæ, локомотивтæ, станоктæ, хæдтæхджытæ аразæн куыстадты, космосон аппаратурæйы, машинæтæ аразæн къабазы, хæстон техникæйы æмæ æндæр рæтты. Ныртæккæ завод стыр зындзинæдтæ æййафы, бирæ цехтæ сафтид сты. Æдæппæтæй дзы кусы 170 адæймаджы, завод дары хæстæ 66 милуан сомы, бафидынхъом сæ кæй нæу, уымæ гæсгæ йæ бон паддзахадон программæты архайын нæу. Фарон Алагиры сопротивлениты заводы тыхст фарстатæ алыг кæныныл балæууыдис республикон хицаудзинад æмæ Битары-фырт йæхæдæг. Уый фæрцы фæкъаддæр ис æфтиæгтыл хъалон, исбонæй хъалон фидынæй та бынтондæр уæгъдгонд æрцыдысты. Битары-фырт æрныхас кодта «Ростех»-ы разамындимæ æмæ уый фæстæ конд æрцыдис заводы финансон уавæр банывыл кæныны пълан. Уымæй дарддæр ма йын хъуамæ бабар кæной хæстон нысаниуæгимæ æртæ ног ифтонггæрзтæ уадзын. Уымæй дарддæр хъуамæ бæстæхъахъхъæнæн-промышленнон комплексы дыууæ куыстуаты «Бином» æмæ «Алагиры сопротивлениты завод» баиу уой.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here