Бюджет банывыл кæныны мадзæлттæ

0
252

Республикæйы бюджет банывыл кæныны мадзæлттыл дзургæйæ, хъуамæ рохуаты ма аззайа районты бюджетты уавæр. Уыдон куыд æххæстгонд цæуынц, уый, æнæмæнг, зыны республикæйы иумæйаг бюджетыл. Æххæстгæнæг хицаудзинады органты размæ лæууы хи фадæттæ, гæнæнтæ, фæрæзтæй хæдзардзинæй пайда кæныны, æнæхъуаджы хæрдзтæ фæкъаддæр кæныны хæс. Хицауады æмбырдтæм иу хаттæй иннæмæ, рахæссынц районты бюджеты уавæры тыххæй хатдзæгтæ. Финансты министры фыццаг хæдивæг ЗÆГЪОЙТЫ Алан æрæджы æрныхас кодта Рахизфарсы районы 2016 азы бюджеты тыххæй.

Æдæппæтæй районы иумæйаг бюджеты хъалонты æмæ æнæхъалонты æфтиæгтæ рауадысты 303,7 милуан сомы бæрц, уый та пъланæн уыд йæ 77 проценты. Хъалонты æфтиæгтæ 100 процентæй фæфылдæр сты, æнæхъалонты æфтиæгтæ та рауадысты 44 проценты.

Районы разамынд куыд нысан кодтой, уымæ гæсгæ нефты продуктты акцизтæй пълан сæххæст кодтой 104,4 проценты, хъалонæвæрынады хуымæтæг системæмæ гæсгæ, хъалон æмбырдгонд æрцыд 135 проценты бæрц, куыстуæтты исбонады хъалон — 144 проценты, зæххы хъалон — 104 проценты.

Кæд æмæ 2015 азы физикон иуæгты æфтиæгты хъалон 124 милуан сомы æрæмбырд кодтой, уæд ын цæмæдæр гæсгæ 2016 азмæ йæ пълан фæфылдæр кодтой 139 милуан соммæ. Æххæст та йæ не скодтой. Ныллæг рауад иумæйаг хъæууонхæдзарадон хъалон дæр — 70 проценты. Ацы ран дæр æнæбындур нысантæ кæй сæвæрдтой, уый аххосæй пълан нæ сæххæст кодтой. Хицæн адæймæгты исбоны хъалон рауад 86 проценты. Хъуыддаг къуылымпы кодта, районы иунæг терминал йеддæмæ кæй нæй, уый.

Æнæхъалонты гуырæнтæй æфтиæгтæ æмбæлгæ хуызы нæ райстой зæхх хаццоны дæттынæй (84 проценты) æмæ муниципалон исбонад уæй кæнынæй (0,8 проценты). Рахизфарсы районы иумæйаг бюджеты æфтиæгты хай æххæстгонд не ‘рцыд, пъланмæ æнæбындур нымæцтæ кæй бахастой, уый тыххæй. 2017 азы 1 январмæ районы бюджет нысангонд хъалонтæ нæ райста 116,0 милуан сомы бæрц. Бынæттон хъалонтæй хæстæ фæкъаддæр кæныны охыл районы администраци кусы хъæуы сæргълæуджытимæ. Районы посты бастдзинады разамындимæ баныхас кæнгæйæ, фиддонтæ исынц æппæт хъæуты дæр.

Зæхх хаццоны цы куыстуæттæм ис, уыдон бюджетæй дарынц 52 милуан сомæй фылдæр. Ныридæгæн тæрхонадон пъырыстыфтæ хъуамæ 40,1 милуан сомы радомыны охыл сæххæст кæной уынаффæтæ. Тæрхондоны та ма æвзарынц хъуыддæгтæ 7,8 милуан сомæн. Хъæууон хæдзарадон нысаниуæджы зæххытыл чи кусы, уыдон хуыздæр фидынц. 2016 азы æрæмбырд кодтой 19 милуан сомы, уый та 2015 азимæ абаргæйæ у 2 хатты фылдæр. Зæххыты ацы категорийæ хæстæ 4,5 милуан сомы къаддæр фесты. Районты ‘хсæн ацы бæрæггæнæн у æппæты хуыздæр. Цæмæй Рахизфарсы районы бюджеты æфтиæгтæ фылдæргæнгæ цæуой, уый тыххæй хъуамæ фæахадгæдæр уа æфтиæгтæдæтджыты, районы æмæ хъæуты хицаудзинады æмгуыстад. Се ‘ргом аздахой, æххæстæй цы хъалонтæ не ‘мбырд кæнынц, уыдонмæ. Иннæ фæзилæн — бюджет æфсадыны хъуыддаджы чысыл амалхъомадæй спайда кæнын. Сусæггаг нæу, амалхъомты фылдæр хай æппындæр æфтиæгтæ кæй не ‘вдисы, уый. 2015 азы иумæйаг хъæууонхæдзарадон хъалонæй ахæм «мæгуырæй» йæхи æвдыста алы цыппæрæм хъалонтæфидæг дæр. (Ома, 129 — 32). Районы муниципалон хæс 80 милуан сомæй фæфылдæр. Кæд ацы бæрæггæнæн Бюджетон кодексы домæнтæн дзуапп дæтты, уæддæр æгæр бирæ у. Районы разамынд хъуыддагыл архайы, æмæ 2016 азы 8,6 милуан сомы къаддæр фæцис. 2017 азы райдайæнмæ æфстæуттæй хæс уыдис 104,4 милуан сомы, уыдонæй 63 милуан сомы сты коммуналон лæггæдтæй хæстæ. Фылдæр фидынц раздæры азтæн, афтæмæй аззайынц ныртæккæйы рæстæджы коммуналон фиддонтæ æмæ хæстыл æфты. Рахизфарсы районы разамынд хъуамæ йæ къух сиса æнæбындур пълантæ бюджетмæ хæссыныл. Зæгъæм, 2017 азы сæ нымадмæ гæсгæ материалон æмæ æндæр активтæ ауæй кæнынæй хъавынц 36,12 милуан сомы райсын. Ивгъуыд азтæм афæлгæсгæйæ, уыдон сты, къухы чи нæ бафтдзæн, ахæм нымæцтæ. Афтæмæй бюджеты хæрдзты хай цæмæй сæххæст кæной, уый нæ разындзæн, уый та йæ фæстæ расайдзæн æфстæуттæ, сæ бафидыны æмгъуыдтæ дæр æргъæвд цæудзысты. 2016 азы ма фæфылдæр сты бынæттон хицаудзинады органтæ фæдарыны хæрдзтæ дæр. Ацы аз дæр хæрдзтæ рæздзысты, уымæ гæсгæ сæм хæдзардзин цæстæй акæсын хъæуы. ÆХСАРАТЫ Р.

ОСТАВЬТЕ ОТВЕТ

Please enter your comment!
Please enter your name here