Амалхъомты бартæ, адæмы æнæниздзинад æмæ æндæр ахсджиаг фарстатæ

0
88

Цæгат Ирыстоны Сæргълæууæг БИТАРТЫ Вячеслав дзы сæрдариуæг кодта, афтæмæй уыд æхсæнадон фæтк хъахъхъæныны фарстаты фæдыл координацион æмбырд. Ныхасы архайджытæ æркастысты амалхъомты бартæ æмæ интерестæ, адæмы æнæниздзинад тамакойæ хъахъхъæныны, стæй кальянты клубты архайдæн бæлвырд гæрæнтæ сæвæрыны фарстатæм. Сæрмагондæй æрдзырдæуыд иумæйаг æдасдзинады комплексон системæ рапарахат кæныны программæйыл.

Хицаудзинады паддзахадон æмæ муниципалон, стæй барадхъахъхъæнæг органтæ амалхъомады субъектты бартæ æмæ интерестæ куыд хъахъхъæнынц, стæй сын сæ архайд цы къуыхцы кæны, æппæт уыдæтты тыххæй раныхас кодта Амалхъомты бартæ хъахъхъæныны фарстаты фæдыл РЦИ-Аланийы æххæстбарджын Медойты Тимур. Медойы-фырт куыд загъта, афтæмæй фæстаг азты уавæр зынгæ фæхуыздæр. Афтæ, контролгæнæг органтæ амалхъомады субъектты архайд ныр бæрæг кæнынц зынгæ къаддæр. Зæгъæм, 2015 азы контролгæнæг органты минæвæрттæ амалхъомады куыстуæттæ бабæрæг кодтой 6761 хатты, 2016 азы та — 3052. Ацы аз та инспектортæ куыстуæттæ бабæрæг кæндзысты æрмæстдæр 2000 хатты.

Хатдзæгтæ кæнгæйæ, Битарты Вячеслав загъта: «Фарста афтæ æвæрд цæуы, сыгъдæгзæрдæ æмæ æргомæй чи кусы, уыцы амалхъомты архайдæн контролгæнæг органтæ хъуамæ мацы къуылымпытæ аразой. Æрмæст уый нæ, фæлæ ма хъуамæ æххуыс кæной, республикæйы фæрныгадыл чи кусы, хæрзхъæд продукци чи уадзы, ног кусæн бынæттæ чи гом кæны æмæ хъалонтæ афойнадыл чи фиды, уыдонæн». Уыимæ, республикæйы разамонæг фæсидт барадхъахъхъæнæг органтæм, цæмæй карзæй æфхæрой, амалхъомтæй æхца домæнтæ чи кæны, уыцы чиновникты.

Æмбырды архайджытæ лæмбынæг æркастысты кальянты клубты архайдмæ. «Иуæй-иу кафетæ æмæ ресторанты хицæуттæ мах фæндонимæ сразы сты æмæ сæ лæггæдты номхыгъдæй кальянтæ айстой. Уыдонæй æз бузныг дæн. Республикæйы хъуамæ ма уа, нæ фæсивæды нын хъылмайыл чи æфтауы, ахæм хиирхæфсæн бынæттæ»,— фæбæрæг кодта Битарты Вячеслав.

Фембæлды архайджытæ уыцы фарстайы республикæйы Сæргълæууæджы фарс рахæцыдысты. Зæгъæм, кальянты ныхмæ карзæй радзырдта «Роспотребнадзор»-ы Цæгат Ирыстоны управленийы хицауы хæстæ æххæстгæнæг Къаболаты Заремæ. Йæ ныхасмæ гæсгæ, кальянты клубтæ рæстæгмæ уæддæр сæхгæнын хъæуы, цалынмæ фидаргонд не ‘рцæуой, кальянты хомаг цавæр хъуамæ уа, уый фæдыл документтæ, уæдмæ.

Кальян дымыны хъуыддаг адæймаджы æнæниздзинадæн цы знаггад хæссы, уый тыххæй уыд йæ ныхас республикæйы æнæниздзинад хъахъхъæнынады министр Михаил Ратмановæн дæр. Зындгонд куыд у, афтæмæй бирæтæ хæст сты ахæм зондыл, ома, кальян дымын адæймаджы æнæниздзинадыл æвзæрæрдæм нæ ахады. Фæлæ, Михаил Ратмановы ныхасмæ гæсгæ, бынтон æндæр хатдзæгтæм æрцыдысты æнæниздзинад хъахъхъæнынады дунеон организацийы специалисттæ. Уыдоны раиртæст куыд равдыста, афтæмæй кальянмæ æмхицдзинад расайы онкологион низтæ, гепатит, тарниз æмæ æндæр уæззау низтæ. Фембæлды архайджытæ уыдысты æмхъуыды — ацы информаци хæццæ кæнын хъæуы фæсивæдмæ. Республикæйы æхсæнадон фæтк æмæ адæмы æдасдзинад хъахъхъæныны хъуыддаджы стыр ахадындзинад ис паддзахадон программæ «Æдас республикæ»-йæн. Уыцы программæ республикæйы территорийыл куыд æххæстгонд цæуы, уый тыххæй раныхас кодта

РЦИАланийы Информацион технологитæ æмæ бастдзинады управленийы разамонæг Дмитрий Шадян.

Кæронбæттæны Битарты Вячеслав куыд фæбæрæг кодта, афтæмæй программæ æххæст кæныны куыст фæхъомысджындæр кæнын хъæуы.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here