«Рæстдзинад»-мæ фæндаг

0
343

Хуымæтæг ирон сылгоймаг Битарты-Карсанаты Ирæйы къухы ирон газет «Рæстдзинад». Чи зоны, уым æппындæр диссагæй ницы ис, фæлæ уый æнхъæл чи уыд, йе ‘рыгоны бонты иронау кæсын чи нæ зыдта, уый абон «Рæстдзинад»-ы хæлар æмæ зæрдиаг кæсæг суыдзæн, уый.

Карсанаты Ирæ райгуырд 1938 азы Мæхъæлы республикæйы Малгобечы. Уым йæ фыд Мурад куыста прокурорæй. Ирæ 1956 азы каст фæцис Дзæуджыхъæуы 28-æм скъола, фæлæ дзы ирон æвзаг бæрзонд æвæрд кæй нæ уыд, уый аххосæй йæ нæ ахуыр кодтой. Фæстæдæр, куыд Ирæйæн, афтæ иннæ скъоладзаутæн дæр зын уыд иронау кæсын æмæ фыссын. Скъолайы фæстæ Иринæ каст фæцис Хъæууонхæдзарадон институты механикон факультеты инженерон хайад. Цыппæрæм курсы Заманхъулы колхоз «Ирыстон»-ы практикæйы рæстæг колхозы разамынд Ирæйы арæхстдзинадыл сæ цæст æрæвæрдтой æмæ, куыддæр институт иттæг хорз бæрæггæнæнтимæ каст фæцис, афтæ йæ уыцы колхозæй нал рауагътой. Хъæуы иууылдæр дзырдтой иронау æмæ Ирæйы дæр бар æнæбары хъуыдис мадæлон æвзагыл дзурын. Афтæмæй сабыргай фæцалх иронау дзурыныл. Адæмы цæстуарзон цæстæнгас, сæ фæлмæн ныхас æрыгон чызджы разæнгард кодтой уæндон къахдзæфтæ кæнынмæ. Сæумæрайсом колхозы кæрты, куысты размæ цыбыр æмбырды-иу иронау дзургæйæ куы фæкъуыхцы, уæд-иу ын колхозы сæрдар Æрчъегкаты Æхсар ныфсытæ авæрдта, ма тыхс, сахуыр уыдзынæ, зæгъгæ. Уый фæстæ 1963 Кубæйæ Ирыстонмæ цы чызджытæ æмæ лæппутæ æрцыд, уыдоны Ирæ Черменыхъæуы Хъæууонхæдзарадон техникон училищейы тæлмацгæнджыты руаджы ахуыр кодта дæсныйадыл. Уæд уыд фæскомцæдисы обкомы пленумы уæнг. Зын уыд дыууæ сывæллонимæ бæрнон куыстытæ кæнын, фæлæ арæхстджын, фæлтæрдджын кусджытæ кæдфæнды дæр хъæугæ уыдысты. 1982 азы Тедеты Павел хъæууон хæдзарады министрæй куы куыста, уæд Ирæйы фæхуыдта министрадмæ сæйраг инженерæй кусынмæ. Уый фæстæ та уыд хайады сæргълæууæг дæр. Иу бон Ирæмæ æрбахаста газет «Северная Осетия» æмæ йын бахæс кодта хъæууон хæдзарады техникæйы цалцæггæнæн куыстыты тыххæй æрмæг ратæлмац кæнын. Куыд басастаид, æвзаг рæстмæ кæй нæ зоны, ууыл, фæлæ ахæм бæрнон адæймаджы курдиатæн æнæзæрдæмæдзæугæ дзуапп раттын йæ сæрмæ не ‘рхаста. Дыккаг райсом газеты иу фарсы æрмæг Павелы стъолыл лæууыд ирон æвзагмæ тæлмацгондæй. Уый уыд стыр фæлварæн Ирæйæн. Фæлæ йæ сæрты ахызт. Павел стыр аргъ кодта Ирæйы куыстæн. Иумæ зылдысты республикæйы колхозты быдыртыл, лыг кодтой ахсджиаг фарстатæ. Павел хорз зыдта, цыфæнды куыст куы бахæс кæна Ирæйæн, уæддæр æй хорз уагыл кæй сæххæст кæндзæн, уый, æмæ йæ дзы уыд стыр ныфс. Уыцы цæттæдзинад æмæ бæрнондзинад æрыгон сылгоймагмæ кæцæй уыд, уымæн йæхæдæг радта ахæм дзуапп: — Хъæууонхæдзарадон институты студенттæ цух никуы уыдысты практикон куыстæй, — загъта Ирæ. — Уый равзæрст дæсныйады сфæлтæрынæн уыд стыр ахъаз. Куыстам цалцæггæнæн куыстуæтты, бæстæйы хуыздæр заводты, 1957 азы дыккаг курсы ахуыр кæнгæйæ уыдыстæм Акмолины областы, афæдз фæстæ та — Казахстаны Затабольскы районы зæрæстон зæххыты, 1959 азы — Харьковы тракторон заводы. Ахъуыды-ма кæнут, сæумæрайсом-иу фондз мин адæймаджы куыстмæ иу къордæй рацæйцыдысты. Цæттæ кодтам комбайнтæ куыстмæ. Райхæлдтам-иу техникæ æмæ-иу æй фæстæмæ амбырд кодтам. Сылгоймаджы куыст нæ равзæрста Ирæ. Фæлæ дзы нæлгоймæгтæй дæлдæр не ‘рлæууыд. Уæд, фæскомцæдисонты раззагдæртимæ цæугæйæ, йæ зæрдæ разæнгард кодта стыр уæлахизтæм, пайдайаг хъуыддæгтæм æмæ йын æнтысгæ дæр бакодта. Кусынмæ йæ фæхуыдтой, йæхæдæг ахуырад цы институты райста, уырдæм. Амыдта телеравдыстытæ хъæууон хæдзарады фарстатыл, бындур бавæрдта амалхъомады техникон центр «Партнер»æн. Хорзæхджын у риуылдаргæ стъалы «За освоение целинных земель» æмæ Кады гæххæттытæй. Ирæ йæ цардæмбал, дзæнæтыбадинаг Битарты Эльбрусимæ æнгомæй фæцардысты. Схъомыл кодтой дыууæ фæзминаг фырты Мурат æмæ Ибрагимы. Уыдон дæр равзæрстой сæ ныййарджыты дæсныйад æмæ сты æнтыстджын. Абон Ирæ у рæсугъд бинонты хистæр, буц мад, рæдау æфсин, фæлмæнтæдзураг нана. Цард адæймаджы размæ байтындзы алыхуызон фæндæгтæ, сæйрагдæр вæййы, зæрдæйæн дзы хæстæгдæр чи у, уый равзарын базонын æмæ дзы рæсугъд къахдзæфтæ кæнын, кæронмæ йыл рæстагæй ацæуын, адæм дæ уый фæстæ хорз ныхæстæй куыд мысой. Уыцы хъуыддаг Ирæйæн йæ къухы бафтыд. Азтæ куыд цыдысты, афтæ Ирæ ирон газетыл ссис ноджы æнувыддæр, фыссы йæ, кæсы йæ, фæлæ зæрдæйæ нæ цух кæны ирон газетмæ фæндаг. ХЕТÆГКАТЫ-УАНИТЫ Оксанæ

ОСТАВЬТЕ ОТВЕТ

Please enter your comment!
Please enter your name here