Ирыстоны аивады рухс фидæн

0
130

РЦИ-Аланийы Нывгæнджыты цæдисы равдыстыты залы байгом Ирыстоны фæсивæды сфæлдыстадон куыстыты равдыст «Молодость Осетии». Цы дæс æмæ ссæдз нывгæнæджы дзы архайы, уыдонæй бирæтæ нывкæнынады аивады сты фæлтæрдджын, сæ аивадæн сын аргъ кодтой, куыд Ирыстоны, афтæ æндæр республикæты дæр. Иннæтæн та ацы равдыст у фыццаг, æмæ дзы акодтой уæндон, ныфсджын къахдзæфтæ. Уыдонæй сты Дзæуджыхъæуы Дзанайты Азанбеджы номыл аивадон училищейы, Цæгат Ирыстоны Хетæгкаты Къостайы номыл паддзахадон университеты аивæдты факультеты, Дзæуджыхъæуы Модæйы институты студенттæ æмæ республикæйы нывкæнынады студиты ахуырдзаутæ.

Ахæм равдыст Нывгæнджыты цæдисы вæййы алы аз дæр уалдзæджы къæсæрыл. Уый хорз фадат у фæсивæды аивадимæ адæмы базонгæ кæнынæн æмæ сын сæ аивадæн аргъ скæнынæн. Æрыгон нывгæнджыты сфæлдыстадимæ раргом вæййынц ног нæмттæ, æмæ сæм фæхъæуы хъус æрдарын. Равдысты ис цыппарыссæдз куыстæй фылдæр. Сæ фылдæр сты кæттагыл конд. Ис дзы графикон куыстытæ, скульптурæтæ, æрмдæсныйады аивады хуызты сфæлдыстадон куыстытæ, хъуымацыл конд зæрдæмæдзæугæ нывтæ, хъæдæй конд дзаумæттæ, ювелирон æмæ тæвд эмалæй конд диссаджы аив сфæлдыстадон куыстытæ. Уый дзурæг у, Ирыстоны фæсивæды кæй цымыдис кæнынц аивады алы хуызы фæзилæнтæ æмæ авналæнтæ. Фæлварынц дзы сæ хъарутæ, сæ арæхстдзинад æмæ сын æнтысгæ дæр кæны. Уымæй равдыст рауад ноджы бæркадджындæр, цымыдисагдæр æмæ хъæздыгдæр. Цæст æнæрхæцгæ нæ фæуыдзæн Æлборты Викторияйы ныв «Цхинвалмæ фæндаг»-ыл, Еленæ Кудряшовайы «Сомихы аргъуаны цур»-ыл, Абысалты Зæринæйы «Уалдзыгон сонатæ»-йы куыстыты серийыл, Алиханты Аминæ «Африканка»-йыл, Анастасия Евграфовайы «Европæйаг фæлладуадзæн бонтæ»-йыл, Абысалты Фатимæйы «Натюрморт»-ыл, Агънаты Мæдинæйы «Фыццаг мысинæгтæ» æмæ бирæ æндæр авторты зæрдæмæдзæугæ куыстытыл. Равдысты архайæг æрыгон нывгæнджыты нæмттæй бирæтæ хорз зонгæ сты аивадуарзджытæ æмæ аивадиртасджытæн. Зæгъæм: Абысалты Зæринæ, Анастасия Евграфова, Ульянæ Гончарова, Битеты Зæлинæ, Быдтаты Фатимæ, Кæркуысты Стеллæ, Куымæриттаты Зæринæ, Аминæ Алиханова, Черчесты Таймураз æмæ иннæтæ. Уыдонæн сæ куыстытæ раздæр дæр æвдыст цыдысты æппæтуæрæсеон æмæ регионалон равдыстыты. Дызæрдыггаг нæу, Сæбанты Ирбег, Туаты Лирæ, Къониаты Хъазыбег, Плиты Зæлинæ æмæ равдысты иннæ архайджыты куыстытæ дæр адæмы зæрдæмæ фæндаг кæй ссардзысты, уый. Аивады æвзагæй бæрзонд систой райгуырæн бæстæйы æрдзы рæсугъддзинад, нæ адæмы истори, царды табуйæгтæ. — Ирыстоны ис курдиатджын фæсивæд.

Алы аз дæр ацы равдысты байгомы агъоммæ къамисы уæнгтимæ нæ фæсивæды сфæлдыстадон куыстытæ куы февзарæм, уæд мæ зæрдæ нырхæндæг вæййы, уымæн æмæ иннæ аз нывгæнджытæн сæ фылдæр сæ 35 азы сæрты ахиздзысты æмæ сын фидæны фæсивæдон равдысты архайыны бар нал уыдзæн, — загъта РЦИ-Аланийы Нывгæнджыты цæдисы сæрдар Мæргъиты Таймураз. — Ацы равдыст, мæнмæ гæсгæ, рауад тынг цымыдисаг. Уæлдай æхсызгондæр та мын уый у, æмæ нæ зындгонд нывгæнджыты кæстæртæ сæ ныййарджыты фæндаг кæй равзæрстой æмæ аивады раззагдæртимæ æмдзу кæй кæнынц, уый. Равдысты бæрæг дары сæ æрмдзæф. Уыдон сты УФ-йы æмæ РЦИ-Аланийы сгуыхт нывгæнæг Абысалты Юрийы чызджытæ Зæринæ æмæ Фатимæ, РЦИ-Аланийы сгуыхт нывгæнæг Кæркуысты Роберты чызг Стеллæ, РЦИАланийы сгуыхт нывгæнæг Цæллагты Викторы фырт Зауыр, кæттагыл Ирыстоны æрдзы нывты уд бауадзæг, зындгонд нывгæнæг Куымæриттаты Аркадийы чызг Зæринæ, УФ-йы адæмон нывгæнæг Челæхсаты Магрезы фырт Давид. Бауагътой мæ стыр ныфс, Ирыстоны аивады рухс фидæнæй — Нæ сæйрагдæр хæс у сæ фарсмæ балæууын æмæ нæ уавæртæ цас амонынц, уыйбæрц се сфæлдыстадон рæзтыл аудын. Равдыст фенæн уыдзæн 21 апрелмæ. Уæ хорзæхæй, саккаг кæнут.

ХЕТÆГКАТЫ-УАНИТЫ Оксанæ
Авторы ист къамтæ

ОСТАВЬТЕ ОТВЕТ

Please enter your comment!
Please enter your name here