Программæ хъуамæ æххæстгонд æрцæуа 1 сентябрмæ

0
60

«Æппæт бæстæйы дæр ахсджиагæй æххæст кæнынц Уæрæсейы Федерацийы Президенты 2012 азы майы ист Указтæ. Уыдонимæ — адæмы кæлæддзаг хæдзæрттæй ног фатертæм раивыны хъуыддаг. Махмæ цы бæрæггæнæнтæ ис, æрæрвыстой нын сæ Цæрæнуæтты-коммуналон хæдзарад рацаразынæн ахъазгæнæг фондæй, уыдонмæ гæсгæ нырма Цæгат Ирыстоны ис 17 мин квадратон метры кæлæддзаг хæдзæрттæ. Уыдон сты 36,4 проценты, республикæ йæхæдæг цы бæрæггæнæнтæ бавдыста, уыдонмæ гæсгæ та сты 14 мин квадратон метры», — знон Уæрæсейы Федерацийы Президенты Æххæстбарджын минæвар Цæгат Кавказы федералон зылды Олег БЕЛАВЕНЦЕВ ахæм раныхасæй байгом кодта уæрæхгонд æмбырд.

Æмбырды архайдтой РЦИ-Аланийы Сæргълæууæг Битарты Вячеслав, Хицауады Сæрдар Тускъаты Таймураз, хицаудзинады органты разамонджытæ æмæ минæвæрттæ. Ацы бонты ма Цæгат Ирыстоны сæмбæлдысты УФ-йы Президенты цур Граждайнаг æхсæнады рæзты æмæ адæмы барты тыххæй советы разамынд æмæ уæнгтæ. Уыдон дæр архайдтой ацы æмбырды. Æххæстбарджын дарддæр йæ ныхасы куыд бамбарын кодта, афтæмæй кæнæ республикæ йæ бæрæггæнæнтæ æгæр хорзæй равдыста, кæнæ Фондимæ фаг нæ кусынц. «Ахæм уавæр ма ис иннæ республикæты дæр. Фæлæ зонут, ацы аз 1 сентябрмæ уыцы программæ хъуамæ кæронмæ æххæстгонд æрцæуа», — загъта Олег Белавенцев.

Йæ хатдзæгтæм гæсгæ, программæ æххæстгæнгæйæ, 2015-2016 азты уыдис ахæм цаутæ, æмæ республикæйы Финансты министрад муниципалон скондтæн афойнадыл æмбæлгæ æхца нæ арвыста. Уыдис ма æндæр къуылымпыдзинæдтæ дæр, æмæ уыдæтты тыххæй программæ сæххæст кæнын æййæфта зындзинæдтæ. Бæрæггæнæнтæм гæсгæ, Цæгат Кавказы федералон зылды нырма ис 101 мин квадратон метры кæлæддзаг хæдзæрттæ. Æххæстбарджын минæвар куыд бамбарын кодта, афтæмæй рæвдз февналын хъæуы, æмæ 1 сентябрмæ хъуамæ алы республикæ дæр программæ кæронмæ сæххæст кæна. Стыр æргом аздахын хъæуы куыстыты хæрзхъæддзинадмæ дæр.

Республикæйы Сæргълæууæг Битарты Вячеслав йæ раныхасы куыд бамбарын кодта, афтæмæй программæ у тынг ахсджиаг, адæм æм æнхъæлмæ кæсынц. «Æцæгæйдæр, сæвзæры зындзинæдтæ, фæлæ сæ архайæм аиуварс кæныныл. Фондæй цы æхца райстам, уымæ гæсгæ фæнысан кодтам объекттæ, арæзт цæуынц æмæ сæ 1 сентябрмæ сцæттæ кæндзыстæм. Нæхицæн скодтам график, æмæ дзы сбæлвырд кодтон æмгъуыд 1 августмæ. Ныхас кодтон Фонды разамонæг Константин Цицинимæ, бафарстон æй, Цæгат Ирыстоны программæ æххæстгонд куыд цæуы, уымæ уæм исты фиппаинæгтæ ис, зæгъгæ, фæлæ нын ницы фехъусын кодта», — загъта Битары-фырт.

Уый ма æрхаста дæнцæг, Мæздæджы хæдзар аразгæйæ цавæр уавæр сæвзæрд, уый тыххæй. Аразæг æхца райста, хæдзарæн æрмæстдæр йæ бындур бацæттæ кодта æмæ йæ ныууагъта. Ныр тæрхондон æвзары хъуыддаг, аразæгæй бацагуырдтой æхца. Республикæ уал йæхи хардзæй уыцы хæдзар сцæттæ кодта, у æрцæрын-æввонг. «Æз æргомæй загътон, хъуыддаг баргонд кæмæн у, уыдонæн. Раздæр уал хæдзæрттæ саразут, стæй уæд райсдзыстут æхца. Фæлæ уæ куысты хæрзхъæддзинадмæ аиппытæ куы уа, уæд уæхи хъахъхъæнут», — бафиппайдта ныхасгæнæг.

Олег Белавенцев ма рæгъмæ рахаста коммуникацитæ афойнадыл бауадзыны фарста дæр. Цард куыд æвдисы, афтæмæй хæдзæрттæ арæзт æрцæуынц, афтæмæй та сæм нæдæр газ бауадзынц, нæдæр дон, иннæ инженерон хызтæ дæр афтæ. Уымæ гæсгæ ракуырдта, цæмæй æппæт уыцы хъуыддæгтæм бæрнонæй акæсой. Республикæйы кæлæддзаг хæдзæрттæй гражданты ног фатертæм раивыны программæ куыд æххæстгонд цæуы, уый тыххæй раныхас кодтой цæрæнуæтты-коммуналон хæдзарад, артаг æмæ энергетикæйы министры хæдивæг Хъуппеты Таирæ, Дзæуджыхъæуы æмæ районты разамонджытæ. Æмбырды рауадис бæстон æмæ пайдайаг ныхас.

БУТАТЫ Эльзæ

ОСТАВЬТЕ ОТВЕТ

Please enter your comment!
Please enter your name here