Музей хъуамæ ацы аз рæвдз уа

0
16

Цыппар азы размæ Национ музейы арæзтад урæд æрцыд. Ацы бонты йæ ногæй аразын райдыдтой. Бæстыхай парахат цалцæггæнæн куыстытæм цæттæ кæнынц.

Культурон хæзнатæ кæй фесæфдзысты, музейы кусджытæ уымæй тарстысты. Ныр сæ ис ныфс, кæй сæ бахъахъхъæндзысты, уымæй. — Ныртæккæ нæ нывгæнджыты къорд ис Хуссар Ирыстоны, театры къултыл нывтæ кæнынц. Ахæм мидисджын нывтæ нæ музейы дæр цæмæй фæзыной, уый мæ фæнды, — зæгъы музейы генералон директор Сохиты Ларисæ. Музейы рацарæзты куыстытæ райдыдтой 2011 азы, фæлæ дыууæ азы фæстæ, æхца сын кæй нал лæвæрдтой, уый аххосæй куыстытæ æрлæууыдысты. Объект бахастой федералон нысанмæарæзт программæ «Уæрæсейы культурæ»-мæ. Ацы аз арæзтадæн рахай кæндзысты 97 милуан сомы. Куыстытæ райдыдтой музейы комплексы цыппар бæстыхайæ иу — раздæры Аивæдты хæдзары. Ацы бæстыхайы фыццаг дыууæ уæладзыджы æрбынæттон уыдзысты равдысты залтæ, æртыккаг уæладзыджы та — музейы кусджыты кусæнуæттæ. Сæйраг зал кæм фæзындзæн, уыцы дыккаг уæладзыджы-иу саразæн уыдзæн равдыстытæ æмæ стыр æмбырдтæ. Арæзтадон куыстытæ чи æххæст кæны, уыцы кусæндон «Промжилстрой» ам архайдта 2011 азы дæр. Арæзтады баурæдæй нырмæ иуæй-иу конструкцитæ раууатмæ кæй æрцыдысты, уымæ гæсгæ аразджытæм æнхъæлмæ кæсы бирæ куыст. Ацы аз музейы рацарæзт кæронмæ хъуамæ ахæццæ уа.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here