Ирон æвзаджы хуыздæр ахуыргæнæг

0
432

РЦИ-Аланийы Ахуырад æмæ наукæйы министрады хъæппæрисæй къорд азы дæргъы фæд-фæдыл цæуы ирон æвзаг æмæ литературæйы ахуыргæнджыты республикон æркаст. Фæархайынц дзы нæ республикæйы астæуккаг скъолаты дæсныдæр ахуыргæнджытæ. Æркастæн бындур æвæрд кæдæй æрцыд, уæдæй абонмæ дзы уæлахиздзаутæ алы азты систы ДЗАРАСАТЫ Беллæ, ДЖЕРИАТЫ Мæдинæ, ХЛОЙТЫ Лейлæ, ЕЛУАТЫ Анжелæ, ГÆДЖИТЫ Лянæ, УАЛЫТЫ Илонæ, КЪОРАТЫ Жаннæ. Æмæ канд республикон æркасты нæ, фæлæ ма систы уæрæсейаг æмæ регионалон конкурсты уæлахиздзаутæ дæр. Ацы æркаст Ирыстоны сси æрвылазон æмæ та нæ ногæй фæхуыдта ирон æвзаг æмæ литературæйы хуыздæр ахуыргæнджыты ерыстæ

Знон Дзæуджыхъæуы Советон Цæдисы Хъæбатыр Дзусаты Ибрагимы номыл 46-æм астæуккаг скъолайы райдыдта æркаст. Архайдтой дзы алы районтæй дæс адæймаджы. Æркастмæ æрбацыдысты РЦИ-Аланийы ахуырад æмæ наукæйы министры хæдивæг Людмилæ Башарина, филологон наукæты доктор, профессор Тахъазты Харум, филологон наукæты кандидат Хъантемыраты Риммæ. Жюрийы уæнгтæ сты филологон наукæты кандидаттæ, доценттæ, ахуыргæнджытæ. РЦИ-Аланийы ахуырад æмæ наукæйы министрады национ хайады сæргълæууæг Санаты Ритæ куыд радзырдта, афтæмæй æркастæн стыр ахадындзинад ис. — Мадæлон æвзаг сывæллæттæн уарзын кæныны хъуыддаджы ахуыргæнæджы хæстæ бæрзонд сты. Не ‘гъдæуттæ, нæ культурæ, æвзаг æмæ истори цæмæй сывæллæттæ зоной, уый тыххæй ирон æвзаджы ахуыргæнæджы зонындзинæдтæ дæр хъæздыг æмæ мидисджын хъуамæ уой. Æмæ æрмæст ирон сывæллæттимæ нæ кусынц ирон æвзаджы рæзтыл, фæлæ нæм цы бирæ адæмыхæттытæ ис, уыдонимæ дæр, — загъта Санаты Ритæ. Æркасты райдайæны архайджытæн æнтыстджын куысты фæдыл арфæйы ныхæстæ ракодта нæ республикæйы ахуырад æмæ наукæйы министры хæдивæг Людмилæ Башарина. Æркаст цæудзæн æртæ фæлтæрæй. Фыццаг хайы — конкурсанттæ презентацийы хуызы æвдисдзысты видеороликтæ, цы у мадæлон æвзаг сæ царды, куыд кусынц сывæллæттимæ, цавæр методикæйæ пайда кæнынц. Дыккаг хайы цалдæр боны та дæтдзысты уроктæ алы скъолаты. Æртыккаг, кæронбæттæн хайы бацæттæ кæндзысты эссе, ирон æвзаджы ахуыргæнæджы дæсныйады тыххæй. Æппæт конкурсанттæ дæр хорзæхджынгонд æрцæудзысты министрады æмæ ахуырады профцæдисты Кады гæххæттытæй. Сæйраг уæлахиздзау 2017 азы ирон æвзаг æмæ литературæйы хуыздæр ахуыргæнæджы ном та базондзыстæм 15 майы, Мадæлон æвзаджы бæрæгбоны.

САУТÆТЫ Тамилæ

Къам систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here