Ирыстон сæмбæлд йæ зæрдиаг хъæбулыл

0
272

Уæрæсейы культурæйы азфысты йæхи сæрмагонд бынат ис Куадзæны Мæскуыйаг фестивалæн. Зæрдиагæй йæм фенхъæлмæ кæсынц нæ бæстæйы аивад уарзджытæ.

Знон Дзæуджыхъæуы æфсæнвæндаджы станцæйы нæ республикæйы Сæргълæууæг Битарты Вячеслав, Хицауады уæнгтæ, РЦИ-Аланийы Культурæйы министрады, Парламенты бæрнон кусджытæ, æхсæнады минæвæрттæ зæрдиаг æгасцуай загътой нæ номдзыд æмзæххон, фестивалы аивадон разамонæг Гергиты Валерийæн. СанктПетербурджы Марияйы театры симфонион оркестры артисттыл сæ разамонæгимæ сæмбæлдысты ирон æгъдаумæ гæсгæ, — æртæ кæрдзыны, физонæг æмæ бæгæныйы къусимæ. — Не ‘фсымæр, не мзæххон, алыбон æгас нæм цу! Сæрыстыр дæ стæм, Валери! Дæ курдиат лæвар кæныс æппæт дунейæн, ирон аивады тырыса бæрзонд систай æмæ ма бирæ азты æнæнизæй, уæнгрогæй кус, адæмы зæрдæтæм циндзинад куыд хæссай, — загъта, æртæ кæрдзыны кувгæйæ, музыкалон театры директор Гæлæуты Анатоли æмæ зындгонд дирижермæ балæвæрдта бæгæныйы къус. “Вы — брат, вы земляк наш, вы гений, волшебный маэстро Валерий» бакæсæн уыд стыр плакатыл. Уазджытæ æмæ вагзалмæ æрбацæуæг адæм æхсызгонæй байхъуыстой Валерийæн йæхи ном хæссæг аивæдты колледжы æрыгон музыкантты цагъдмæ, фæзы райхъуыст рæсугъд ирон цагъд дæр. Афтæ, уарзонæй сæмбæлд Ирыстон йæ зæрдиаг хъæбулыл.

ЦÆГÆРАТЫ Жаннæ Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here