«Фæуæлахиз ирон æгъдау

0
477

Цы нын ныууагътой рагфыдæлтæ хорзæй — не ‘гъдау, нæ мадæлон æвзаг, нæ культурæ æмæ традицитæ, нæ зарджытæ æмæ кæфтытæ — уыдон фæлтæрæй-фæлтæрмæ хъуамæ цæуой лæвæрд, уылæн уылæны куыд ивы, афтæ.

Уыцы стыр нысанимæ ныр дыккаг хатт арæзт æрцыд республикон фестиваль-конкурс «Цыкурайы фæрдыг». Бæрæгбоны фысымтæ — Дзæуджыхъæуы базарадон-экономикон техникум суазæг кодта районты уæлахиздзауты.

Конкурсы архайдтой, ерысы бацыдысты æрыгон чызджытæ, республикæйы районты скъолаты ахуырдзаутæ, ирон æвзагыл аив чи дзуры æмæ сфæлдыстадон курдиат кæмæ ис, ахæм «Цыкурайы фæрдгуытæ»: Цæй уæдæ, нæ газеткæсæг, базонгæ уæм семæ — Дудиаты Аидæ (Рахизфарсы район), Дзгойты Зæринæ (Дзæуджыхъæу), Цогойты Мæдинæ (Кировы район), Дегъуаты Илонæ (Æрæфы район), Челдыты Лянæ (Алагиры район), Борæты Миланæ (Дыгуры район), Джыккайты Фатимæ (Æрыдоны район), Медойты Миланæ (Горæтгæрон район). Аив сæ бакаст, сæ уæлæдарæс, сæ дзыхы ныхас, афтæмæй чызджытæ цыбыр рæстæгмæ балхæдтой, залы цы бирæ адæм бадтис, уыдоны зæрдæтæ, балæвар сын кодтой цины æнкъарæнтæ, цæссыг дæр-иу æруадис уадултыл, ахæм зæрдæмæхъаргæ ныхæстæ хъуыстис сценæйæ. Аст чызгæй алчидæр арæхстджынæй дзырдта йæ фыдæлты равзæрды истори, йæ мыггаджы разагъды лæгтæ Ирыстоны цы фæд ныууагътой, ууыл. Цыбырæй алы чызг дæр йæхи бацамыдта. Уыцы рæстæг экраныл æвдыстой видеоæрмæджытæ дæр. Конкурсы домæнтæм гæсгæ йæ архайджытæ бацæттæ кодтой аивадон равдыст — кафт, зарæг кæнæ аив бакаст. Уыцы бон ма чызджытæ дзуапп радтой, ирон æгъдæуттæ æмæ традицитимæ баст тесты фæрстытæн дæр. Алы раст дзуаппы тыххæй дæр сын лæвæрд цыд иу балл. Дарддæр фестиваль йæ арæнтæ фæуæрæхдæр кодта æмæ конкурсы архайджытæ сæ арæхстдзинад æвдыстой ирон хæринæгтæ кæнынæй. Базарадон техникумы сын бацæттæ кодтой æппæт уавæртæ дæр, сæрмагонд хицæн къæбицты алы чызг дæр, раздарæн æмæ сæрбæттæн æрбабæтгæйæ, балæууыд арынджы уæлхъус. 2,5 сахаты сын лæвæрд уыд, цæмæй сæхи гыццыл къухтæй бацæттæ кæной æртæ æртæдзыхоны, фыдджын, дзыкка æмæ нартхоры кæрдзынтæ. Кæрæй-кæронмæ сын сæ архайдмæ цæст дардтой жюрийы уæнгтæ — æхсæнадон организациты минæвæрттæ, культурæйы архайджытæ, ирон æвзаджы ахуыргæнджытæ, конкурс саразджытæ.

Ирон фынгæвæрдмæ иууылдæр куыд хорз сарæхстысты, уымæн æвдисæн уыд РЦИ-Аланийы ахуырад æмæ наукæйы министр Иринæ Азимова. Æмæ цы нæ уыдис сæ фынгтыл — кувинаг æртæ кæрдзыны, ирон бæгæны, дзыкка, задын, хъæбæр цыхт, лывзæ æмæ æндæр хойраг. Алкæмæн дæр фадат уыд уыдонæй саходынæн. Уыцы рæстæг техникумы уæрæх кæрты, æз хуыздæр акафонæй ерысы бацыдысты æрыгон чызджытæ æмæ лæппутæ. Сæ къæрццæмдзæгъд дардмæ хъуыстис. Ноджы ма алы район дæр бацæттæ кодта рагон ирон дзаумæтты равдыст, фенæн дзы уыдис авдæн, дала фæндыр, дурын, кæфой, нымæтцæгъдæн, арынг æмæ æндæртæ. Фæстæдæр уазджыты, жюрийы уæнгты æмæ конкурсы архайджыты æрхуыдтой бæрæгбоны концертмæ. Аив фæлыст залы æрбадæн бынат нал уыд. Сценæмæ иу иннæйы фæстæ, арфæтимæ хызтысты Ирыстоны уарзон артисттæ Кокойты Аллæ, Илурты Риммæ, Уалыты Альберт, Хъуысаты Эльвирæ. Базарадон техникумы ансамбль «Бæрæгбон» акодта цалдæр кафты, студенттæ сæ арæхстдзинад равдыстой зарынæй дæр. Уæдмæ жюрийы уæнгтæ хатдзæгтæ скодтой æмæ равзæрстой хуыздæрты ‘хсæн хуыздæры. Æртыккаг бынат бацахста Дзгойты Зæлинæ, дыккаг бынат радтой Челдыты Лянæйæн, фыццаг бынат æппæт бæрæггæнæнтæм гæсгæ саккаг кодтой Æрыдоны фыццæгæм астæуккаг скъолайы ахуырдзау Джыккайты Фатимæйæн. Уыцы бон бирæ арфæйы ныхæстæ райхъуыст Базарадон-экономикон техникумы директор, РЦИ-Аланийы Æхсæнадон палатæйы уæнг Æбиты Валерийы номыл, йæ удуæлдай, йæ зæрдиаг лæггады тыххæй. — Цы ис рæсугъддæр æмæ зынаргъдæр махæн нæ ирон æвзагæй, нæ ирон æгъдау æмæ æфсармæй, ирон лæг дардмæ дæр бæрæг дары. Абон мах цы кæстæрты хорздзинадæн уыдыстæм æвдисæн, уый ныфсы хос у, нæ сомбон рæсугъд кæй уыдзæн, уымæн. Ууыл кусæм, уый у нæ нысан. Цæмæй ацы бæрæгбон сырæза, ууыл чидæриддæр бацархайдта, уыдонæн се ‘ппæтæн дæр стыр бузныг. Уæлдай бузныг нæ ерысдзаутæн, ахæм хъару æмæ сæм ныфс кæй разынд, сæ мыггæгты, сæ районты ном бахъахъхъæнынæн. Æцæг ирон сылгоймаджы миниуджытæй хайджын стут æмæ йын йæ фарн дарддæр ахæссут, — арфæ ракодта Æбиты Валери. Жюрийы уæнг, Цæгат Ирыстоны сгуыхт ахуыргæнæг, поэтессæ Хабæты-Гæджынаты Риммæ йæ зæрдæйы æнкъарæнтæ дзургæйæ загъта: «Тæхуды, ахæм чызджытæ кæй хæдзармæ бакъахдзæф кæндзысты, сыхбæстæ, мыггаг сæрыстыр кæмæй уыдзысты». Ирон сылгоймаджы уæз æнкъаргæйæ бакаст йæхи фыст æмдзæвгæ. Арфæ ракодта чызджытæн, сæ ныййарджытæн æмæ ахуыргæнджытæн, уæлдай бузныг — фысымтæн, сæ сæргъы Æбийыфырт, афтæмæй. Жюрийы уæнг, РЦИ-Аланийы æхсæнадон палатæйы минæвар Еналдыты Хъазыбегæн фæсивæдмæ уыд йæ курдиат. «Кæстæртæ, сымах бæллут рæсугъд цардмæ, æмæ уымæй стут тæхудиаг. Зонут, æнæ нысанæй цæрæн нæй, æвзæр кæстæрæй фидæны куырыхон, зондамонæг хистæр никуы рауайдзæн, æмæ абон хъахъхъæнут уæ сыгъдæг ном. Йæ уæнгæзмæлдæй уын цы æгъдау æвдисы Валери, уымæн аргъ кæнут. Абон фæуæлахиз ирон æгъдау».

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here