Æхсæнад «Русь»-ыл — 25 азы

0
328

Знон Дзæуджыхъæуы Евгений Вахтанговы номыл Уырыссаг академион театры, кадджын уавæры сбæрæг кодтой Славянаг фыссынад æмæ культурæйы бæрæгбон, стæй республикон æхсæнад «Русь»-ы сконды 25 азы бон. Архайдтой дзы РЦИ-Аланийы Сæргълæууæг БИТАРТЫ Вячеслав, РЦИ-Аланийы Парламенты Сæрдар Алексей МАЧНЕВ, национ-культурон æхсæнадты минæвæрттæ, министрадты æмæ ведомствоты бæрнон кусджытæ.

Йæ арфæйы ныхасы Битарты Вячеслав куыд загъта, афтæмæй сæдæгай азты размæ Кирилл æмæ Мефодий бындур цы фыссынадæн æрæвæрдтой, уый фæрцы райрæзтысты Уæрæсейы цæрæг бирæ адæмыхæттыты культурæ æмæ фыссынад дæр. Æхсæнад «Русь» йæ сарæзтæй абонмæ цы арфæйаг куыст кæны, республикæйы цæрæг иннæ адæмыхæттыты æхсæн дæр хæлардзинад куыд тауы, уымæн ис хорз дæнцæгтæ. — Ныртæккæйы зын дуджы æхсæнад рæзы æмæ фидар кæй кæны, уый у бафиппаинаг æмæ бафæзминаг, — загъта Битарты Вячеслав. Йæ раныхасы фæстæ РЦИ-Аланийы кадджындæр хæрзиуæг, «Ирыстоны намысæн»-ы майданæй схорзæхджын кодта æхсæнад «Русь»-ы уæнгтæй Виктор Кравченко æмæ Зинаидæ Ларионовайы. Нæ республикæйы Кады грамотæтæ та райстой Денис Печко æмæ Юлия Старченко. Кадджын æмбырды ма раныхас кодтой æмæ сæ бæрны уæвæг ведомствоты Кады гæххæттытæ æхсæнад «Русь»-ы уæнгтæн радтой Алексей Мачнев, Национ ахастдзинæдты фарстаты фæдыл министр Цуциты Аслан, Дзæуджыхъæуккаг æмæ Алайнаг епископ Леонид. Уый фæстæ кадджын æмбырды архайджытæн зæрдиаг арфæ ракодта æхсæнад «Русь»-ы бындурæвæрджытæй иу, зындгонд æхсæнадон æмæ политикон архайæг Михаил Шаталов. Сæрмагондæй æхсæнады юбилеймæ ист æрцыд, йæ архайд алы азты æвдыст кæм цæуы, ахæм мидисджын киноныв. Бæрæгбоны изæрмæ чи æрбацыд, уыдон æм æхсызгонæй бакастысты. Кадджын æмбырды сæ курдиат равдыстой æмæ сæ аивадæй барухс кодтой бæрæгбоны архайджыты зæрдæтæ æхсæнад «Русь»-ы хихъхъæппæрисадон аивадон къордтæ.

АНВАРАТЫ В.

ОСТАВЬТЕ ОТВЕТ

Please enter your comment!
Please enter your name here