Æрыдоны районæн — ног парк

0
202

Знон УФ-ы Президентæн Цæгат Кавказы цы Æххæстбарджын минæвар ис, уый хæдивæг Андрей ШИШКИН уыд Цæгат Ирыстоны. РЦИ-Аланийы Хицауады Сæрдар ТУСКЪАТЫ Таймуразимæ бабæрæг кодтой, Æрыдоны горæты цы культурон парк ис, уый. Фембæлды архайдтой Æрыдоны районы сæргълæууæг ТОТРАТЫ Владислав, районы разамынд, бынæттон цæрджытæ æмæ дзыллон хабархæссæг фæрæзты минæвæрттæ.

Андрей Шишкин Ирыстонмæ ссыд УФ-йы Президент Владимир Путины курдиатмæ гæсгæ. Мæйы размæ нæ бæстæйы Сæргълæууæг райста фыстæг Æрыдоны цæрæг, нывгæнæг Ларисæ Зеленскаяйæ. Йæ курдиат уыд, цæмæй, Æрыдоны горæты цы культурон парк ис, уый нывылгонд æрцæуа æмæ йын уа, нырыккон домæнтæн дзуапп чи дæтдзæн, ахæм культурон-фæлладуадзæн парчы хуыз. — Ис мын æртындæс хъæбулы хъæбултæ. Уыдонæй дæс цæры Санкт-Петербурджы. Уым фæллад уадзынæн ис бирæ рæсугъд бынæттæ хиирхæфсæнтимæ. Фæлæ сæрдыгон Æрыдонмæ куы æрцæуынц, уæд адæймаг йæ бинонтимæ йæ зæрдæйы фæндиаг кæдæм рацæуа, уый дзы нæй. Мæ фыстæгæн мын дзуапп радтой æвæстиатæй. Ныфс бавæрдтой, хæстæгдæр рæстæг Æрыдоны горæты цы парчы бынат ис, уый кæй суыдзæн алы фæлтæртæн дæр сæ уарзондæр бынат, — загъта Ларисæ Зеленская. Андрей Шишкинæн Тотраты Владислав радзырдта, проектмæ гæсгæ цавæр арæзтадон куыстытæ æрцæудзысты æххæстгонд, уый. Рагацау кæй æрныхас кодтой Æрыдоны цæрджытимæ, бафарстой сæ сæ фæндæнттæй æмæ уымæ гæсгæ сарæзтой проект. Цæмæй йæ царды рауадзой, уый тыххæй проект хаст æрцыд «Иугонд Уæрæсе»-йы федералон программæ «Парки малым городам»-мæ. Федералон бюджетæй ног парчы арæзтадон куыстытæн радих кæндзысты 2 милуаны æмæ 400 мин сомы. Тотраты Владислав куыд загъта, афтæмæй уыцы æхцатæ фаг уыдзысты парчы аив къахвæндæгтæ саразынæн, йæ алыварс цы сис ис, уый ногæй раивынæн, рухс æм бауадзынæн, къахвæндæгтыл диодон рухсытæ бакæнынæн, дидинджытæ ныссадзынæн æмæ цъæхфæлыстыл бакусынæн. Сæйрагдæр та — сывæллæттæн фæлладуадзæн æмæ хиирхæфсæн фæз саразынæн. — Федералон бюджетæй цы æхца радих кæндзысты, уыдон фаг нæ уыдзысты, — загъта Тотраты Владислав. — Уымæ гæсгæ республикæ, район æмæ горæты администраци дæр бахæсдзысты сæхи хардзы хай хъуыддаг кæронмæ ахæццæ кæнынæн. Нæ зæрды ма ис парчы хицæнæй æнæниздзинады фæз саразын тренажертæ æмæ турниктимæ. Сараздзыстæм ма дзы концертон æмæ æндæр культурон программæтæн æмбæрзт фæз бадæн бынæттимæ. Мæнæн ацы парк тынг зынаргъ у, ам схъомыл дæн. Ногдзауæй ам бирæ рæстæг арвыстон, архайдтамиу дзы алыхуызон хъæлдзæг бæрæгбæтты. Фæнды ма, цæмæй дзы уа сфæлдыстадон равдыстытæ дæр æмæ уыцы хъуыддагæн уавæртæ скæныныл дæр хъуыды кæнæм. Парчы зæхх у 2 гектарæй фылдæр. Ис дзы, Фыдыбæстæйы Стыр хæстæй чи нал сыздæхт, уыдоны номыл цыртдзæвæн. Йæ алыварс та — бæзджын сагъд къабузджын бæлæстæ, бандæттæ. Йæ галиу фарс — сывæллæттæн хиирхæфсæнтимæ хицæн фæз. Районы сæргълæууæг куыд загъта, афтæмæй парчы арæзтадон куыстытæ фæуыдзысты декабры кæронмæ. Андрей Шишкин Ларисæ Зеленскаяйæн бабар кодта, цæмæй ацы бонæй йæ хъус дара парчы арæзтадон куыстытæм, æмæ сын электронон бастдзинады фæрцы хъусын кæна, куыд æххæстгонд цæуынц, уый. Районы иннæ ахсджиаг фарстатæй иу у, канализацийы дæтты сыгъдæггæнæнтæ рæстмæ кæй нæ кусынц, уый. Ацы фарста алыг кæныныл сæхи хъарутæй кæй нæ аххæсдзысты, уымæ гæсгæ курæг уыдысты, цæмæй йæ бахæссой федералон программæмæ.

ХЕТÆГКАТЫ-УАНИТЫ Оксанæ

ОСТАВЬТЕ ОТВЕТ

Please enter your comment!
Please enter your name here