Цæгат Ирыстоны уыдзæн ног реабилитацион-дзæбæхгæнæн центр

0
91

Республикæйы Сæргълæууæг БИТАРТЫ Вячеславæн уыд фембæлд Цæгат-Кавказы хъуыддæгты фæдыл министры фыццаг хæдивæг Одес БЕКСУЛТАНОВИМÆ. Фембæлды рæстæг ныхас цыд, хæстæгдæр рæстæг Дзæуджыхъæуы чи ацæудзæн, Цæгат Кавказы адæмты культурæ æмæ спорты уыцы фестиваль бацæттæ кæныныл, Цæгат-Кавказы федералон зылды райрæзты уыцы программæйы фæлгæты Цæгат Ирыстоны социалон-экономикон рæзты дæлпрограммæ куыд æххæстгонд цæуы, ууыл æмæ æндæр ахсджиаг фарстатыл.

Битарты Вячеслав æмæ Одес Бексултанов баныхас кодтой, июны фыццаг æмбисы Цæгат Ирыстонмæ кæй ссæудзысты Цæгат Кавказы Райрæзты корпорацийы, стæй Акционерон æхсæнад «Курорты Северного Кавказа»-йы бæрнон кусджытæ. Се ссыды нысан уыдзæн, республикæйы территорийыл инфраструктурон проекттæ æххæстгонд цæмæй æрцæуой, уыцы фарстатыл бакусын. Одес Бексултанов куыд бафиппайдта, афтæмæй Цæгат Ирыстоны арæзт æрцæудзæн реабилитацион дзæбæхгæнæн центр. Ацы ног медицинон кусæндон уыдзæн, Цæгат Кавказы цы егъау медицинон кластер арæзт цæуы, уыцы объекттæй иу. Республикæйы Сæргълæууæг Битарты Вячеславимæ фембæлыны размæ Одес Бексултанов, республикæйы Хицауады Сæрдар Тускъаты Таймураз, йæ хæдивджытæ Сæбæтхъуаты Æхсарбег æмæ Фадзайты Æхсарбег, арæзтад æмæ архитектурæйы министр Икъаты Русланбег æмæ культурæйы министр Милдзыхты Руслан æркастысты стадион «Спартак»-ы уавæрмæ — ацы ран фæззæджы ацæудзæн Цæгат Кавказы адæмты культурæ æмæ спорты фестиваль. Æппæт хъуыддæгтыл дæр æрныхас кæныны фæстæ арæзт æрцыд æххæстгæнинаг куыстыты номхыгъд, уырдæм хаст æрцыдысты згъорыны фæндаг цалцæггæнæн куыстытæ, стæй, ныгуылæны ‘рдыгæй трибунæйы уавæр чи банывыл кæндзæн, ахæм куыстытæ. Згъорыны фæндаджы цалцæгæн федералон бюджетæй дихгонд æрцæудзæн 50 милуан сомы, 12 милуан сомы та — республикон бюджетæй. Трибунæйы уавæр банывыл кæнынæн цы куыстытæ бахъæуа, уыдон та æххæстгонд æрцæудзысты æнæбюджетон хæрдзтæй. Одес Бексултанов куыд загъта, афтæмæй Цæгат Кавказы Рæйрæзты корпораци æмæ Акционерон æхсæнад «Курорты Северного Кавказа» баххуыс кæндзысты æнæбюджетон хæрдзтæ радих кæнынæн, цæмæй нысангонд куыстытæ афоныл æххæстгонд æрцæуой. Сæ сæххæст кæныны æмгъуыд у 25 август. Уымæй уæлдай, бæрнон адæймæгтæ, семæ ма республикæйы æнæниздзинад хъахъхъæнынады министр Михаил Ратманов, афтæмæй æркастысты, тарнизы ныхмæ ног диспансер æмæ поликлиникæ кæм араздзысты, уыцы фæзуатмæ. Диспансеры уыдзæн рынчынты 276 бынаты, поликлиникæ та йæ гæнæнтæм гæсгæ бонмæ бæрæг кæндзæн 250 адæймаджы æнæниздзинад. Ныртæккæ проекты фæдыл паддзахадон экспертизæ кæронмæ фæхæццæ кæны. Уый фæстæ куыстытæ æххæстгæнæг подрядон организаци равзарыны фæдыл арæзт æрцæудзæн конкурс. Ацы ног медицинон объект саразынæн федералон бюджетæй бахъæудзæн 1 миллиард æмæ 200 милуан сомы. Республикæйы Сæргълæууæг Битарты Вячеслав бацамыдта æппæт куыстытæ сæххæст кæныны æмгъуыд — дыууæ азы, республикæйы Хицауадæн та бабар кодта, цæмæй арæзтадон куыстыты хæрзхъæддзинадмæ уа бæлвырд цæстдард.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here