Сæ къухтæ циндзинад хæссынц

0
77

1980 азы 1 октябры ССР Цæдисы Сæйраг Советы Президиумы Указæй нæ бæстæйы бæрæг кæнын райдыдтой Рог промышленносты кусджыты бон. Советон дуг ивгъуыды баззад, фæлæ ацы бон бæрæг кæнынц ныр дæр ма, уымæн æмæ ацы къабазы кусджытæн сæ архайд æнгом баст у адæмы домæнтимæ.

Сæ профессионалон бон сбæрæг кодтой нæ республикæйы рог промышленносты кусджытæ дæр. Ацы къабазы бирæ азты адæмæн чи фæлæггад кодта, уыцы ветерантæн æмæ хуыздæр кусджытæн арфæ ракæнынмæ знон Уырыссаг театрмæ æрбацыдысты республикæйы Хицауады æмæ Парламенты разамонджытæ, профцæдисты æмæ æхсæнадон организациты минæвæрттæ. Фыццаджыдæр сын арфæйы ныхæстæ загъта республикæйы Хицауады Сæрдар Тускъаты Таймураз: — Сымахæн уæ куыст у тынг хъæугæ, уымæн æмæ баст у адæмимæ. Æмæ сын сæ домæнтæ рæсугъдæй кæй æххæст кæнут, уый тыххæй уæ уыдон дæр сты арфæйаг. Мæ зæрдæ уын зæгъы фæрныгад, цы куыстуæтты лæггад кæнут, уыдон экономикон æгъдауæй фидар уæнт, æмæ уæм размæ цæуынæн гæнæнтæ алкæддæр уæд. РЦИ-Аланийы Хицауады Кады гæххæттæй хорзæхджын æрцыд æнæххæст бæрнондзинады æхсæнад «Изольда»-йы кусджыты къорд: Хъуылаты Еленæ, Даситы Янæ, Мыртазты Жаннæ, Годжыцаты Тамарæ, Тогызты Маринæ æмæ Плиты Зæлинæ. Бæрæгбоны архайджытæн арфæ ракодта промышленность æмæ транспорты министр Хайдарбек Бутов дæр. РЦИ-Аланийы Промышленность æмæ транспорты министрады Кады гæххæттæй хорзæхджын æрцыдысты: æнæххæст бæрнондзинады æхсæнад «Изольда»-йы директор Годжыцаты Изольдæ, акционерон æхсæнад «Одежда»йы генералон директор Бирæгъты Юри æмæ ацы куыстуаты специалистты къорд; æнæххæст бæрнондзинады æхсæнад «Æрæфы хуыйæн фабричы» генералон директор Таухъазахты Ирбег æмæ йæ кусджыты къорд, стæй æнæххæст бæрнондзинады æхсæнæдтæ «Дзæуджыхъæуы ахуырадон-куыстадон кусæндон», «Умелец», «Комбат», «Амага», «Аметист», «Самати» æмæ «Аббат»-ы кусджытæ æмæ специалистты къорд. Рог промышленносты кусджытæн сæ бæрæгбон сæ аивадæй срæсугъд кодтой РЦИ-Аланийы адæмон артист Тайсауты Олег, дунеон конкурсты лауреат Хъæбæлоты Руслан æмæ Гергиты Валерийы номыл аивæдты колледжы кафджыты къорд.

З.АГЕЕВА

ОСТАВЬТЕ ОТВЕТ

Please enter your comment!
Please enter your name here