Ныхас спорты рæзтыл

0
82

Знон Ахуырады кусджыты зонындзинæдтæ фылдæргæнæн республикон институты æмбырдтæгæнæн залы уыд РЦИ-Аланийы физикон культурæйы æмæ спорты министрады коллегийы æмбырд. Амыдта йæ РЦИ-Аланийы Хицауады сæрдары хæдивæг ФАДЗАЙТЫ Æхсарбег. Министрады 2016 азы куысты æмæ ацы азы архайды бæрæггæнæнты тыххæй доклад скодта РЦИ-Аланийы физикон культурæйы æмæ спорты министр БÆРОЙТЫ Хасан.

— Республикæйы æнтыстджынæй кусынц, Министрады бæрны чи ис, уыцы 24 спортивон скъолайы. Цы секцитæ дзы ис, уым архайынц, сæ тыхтæ фидар кæнынц 185 мины 380 æрыгон лæппу æмæ чызджы, — дзырдта Хасан. — Беслæны æмæ Мæздæджы æнтыстджынæй кусынц стыр спортивон-дзæбæхгæнæн комплекстæ æмæ бæхты спортивон скъолатæ. Уыдоны дæр цы секцитæ ис, уыдоны архайынц дæсгай лæппутæ æмæ чызджытæ. Куыд алы аз, афтæ та ацы хатт дæр арæзт æрцыдысты хъæбысхæстæй Уæрæсейы Федерацийы сгуыхт тренер Гусаты Юрийы номарæн æппæтуæрæсеон турнир æмæ Олимпаг хъæзтыты чемпион уæгъдибар хъæбысхæстæй Андиаты Сосланы приз рамбулыныл турнир. Йæ физикон авналæнтæ къуындæг кæмæн сты, уыцы фæсивæд-спортсментæ алыхуызон спортивон ерысты архайгæйæ, æдæппæтæй рамбылдтой 55 майданы. Ирыстоны спорты историйы намысджын азфысты ныридæгæн нымад æрцыд, не ‘мзæххон спортсмен Гасситы Мурат боксæй дунейы чемпионаты кæй фæуæлахиз, уыцы ахсджиаг цау. Ацы аз та фæнд кæнæм Цæгат Кавказы цæрæг адæмты спортивон фестиваль саразын.

Уымæй уæлдай ма Бæройты Хасан йе ‘ргом аздæхта, республикæйы иуæй-иу районты æмæ хъæуты цæрæг фæсивæдæн нырма кæй нæй аккаг фадæттæ спортивон секциты архайынæн, уымæ. Æвæстиатæй хъæуы спортивон залтæ æмæ комплекстæ саразын. «Æмæ ацы фарста алыг кæныныл дарддæр кусдзæн министрад республикæйы хицауады лæмбынæг хъусдардæй», — загъта Бæройты Хасан. Æмбырды ма Уæрæсейы Федерацийы Спорты æмæ физикон культурæйы министрады риуылдаргæ нысантæ æмæ Кады гæххæттытæ лæвæрд æрцыд, ивгъуыд аз республикæйы спорты æмæ физикон культурæйы рæзтыл зæрдиагдæрæй чи бацархайдта, уыцы спортсментæн æмæ тренертæн. Коллегийы уæнгтæ ма æрныхас кодтой Цæгат Ирыстоны спорты рæзты æндæр ахсджиаг фарстатыл дæр.

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here