Размæцыдæн бындурæвæрд æрцыд

0
20

Уæрæсейы Федерацийы Хицауады Сæрдар Дмитрий МЕДВЕДЕВ 13 июны кусæг балцы уыд Дзæуджыхъæуы. Уыцы бон фембæлд политикон парти «Иугонд Уæрæсе»-йы цæгатирыстойнаг регионалон хайадимæ, рагагъоммæ хъæлæсты «праймеризы» уæлахиздзаутимæ.

Нырæй фæстæмæ уый уыдзæн федералон æмæ регионалон æвзæрстыты æнæмæнгхъæугæ хъуыддаг нæ партийæн. Ацы аз «праймеризы» уæ республикæйы архайдтой дыууæ мин кандидаты. Уый у партийæн йæ куыстхъомдзинад æвдисæг, — загъта Дмитрий Медведев.

Фæрстытæн дзуапп дæтгæйæ, фæнысан кодта, æвзæрстыты рæстæг адæмæн цы ныфсытæ бавæрдтой кандидаттæ, уыдон, æнæмæнг, æххæстгæнгæ кæй сты, уый. Уыдон æвæрд æрцæудзысты партион программæйы бындуры.

Нæ республикæйы хорзæрдæм ивддзинæдтæ кæй ис, уый бафиппайдта, фæлæ нæ фæндæгты уавæр хуыздæр хъуаг кæй у, уый дæр фехъусын кодта. РЦИ-Аланийы Парламенты Сæрдар Алексей Мачневы фарст баст уыд партион системæйы райрæзтимæ. Цæгат Ирыстоны Æхсæнадон палатæйы сæрдар Бокоты Эльбрус бафарста, æвзæрстыты рæстæг, æндæр ран чи хъæлæс кæна, уыдонæн хицæн æвдисæндартæ лæвæрд кæй нал цæудзæн, уый куыд фæзындзæн æвзæрстыты процессы оптимизацийыл. — Уый раст уынаффæ у, цы ног уагæвæрд сфидар кæной, уый уыдзæн ахадгæдæр æмæ бæлвырддæр, — загъта Дмитрий Медведев.

Инвалидты реабилитацийы республикон центры директор Цæллагты Жаннæ Уæрæсейы Хицауады Сæрдармæ цы фарст радта, уый баст уыд, мызды æппынкъаддæр бæрц фæцæрыны фаг æхцайы æфтиагмæ кæд сырæздзæн, уыцы закъонты проект кæд бацæттæ уыдзæн, уыимæ. — Уыцы хъуыддаг æнæмæнг сараздзыстæм фæлтæргай дыууæ азмæ. Бахъæудзæн 50 миллиард сомы бæрц, фæлæ экономикон зындзинæдты сæрты хизгæйæ, уый нæ къухы уæддæр бафтдзæн, — зæрдæ бавæрдта нæ бæстæйы Хицауады Сæрдар.

Паддзахадон бюджетон прогимнази «Эрудит»-ы райдайæн кълæсты ахуыргæнæг Кокойты Тамарæйы фарстæн дзуапп дæтгæйæ, Дмитрий Медведев загъта, проект «Скъолайы автобус» дарддæр кæй ахæццæ кæндзысты, уый. Ныртæккæ уал 28 мин автобусы лæггад кæнынц Уæрæсейы скъоладзаутæн. Уæрæсейы Хицауады Сæрдармæ ма фæрстытæ радтой санатори «Сосновая роща»-йы сæйраг дохтыр Реуазты Ларисæ æмæ «Дорстройсервис»-ы генералон директор Хъазыбегты Георги.

 ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here