ЦИПУ-йы байгом Фæсивæды инновацион сфæлдыстады центр

0
129

Цæгат Ирыстоны Хетæгкаты Къостайы номыл паддзахадон университеты байгом Фæсивæды инновацион сфæлдыстады центр. Физикон-техникон факультеты бындурыл кæй сарæзтой, уыцы центр байгом кæныны фæдыл кадджын æмбырды архайдта Цæгат Ирыстоны Сæргълæууæг БИТАРТЫ Вячеслав.

Ног структурæйы сæйраг нысан у республикæйы фæсивæды æргом науконтехникон сфæлдыстадмæ здахын, стæй сын сæ проекттæ куыстадмæ хæццæ кæнын. Республикæйы ахæм центр кæй байгом, уый ахсджиаг цауыл банымадта Битарты Вячеслав. «Дзæуджыхъæуы фæзынд, курдиатджын фæсивæд сæ хъуыдытæ æмæ проекттимæ кæдæм цæудзысты, сæ хъарутæ кæм æвзардзысты, ахæм сфæлдыстадон фæз. Центры специалисттæ фæсивæдæн цы ахуыртæ аразой, уыдон дæр ахъаз уыдзысты, цæмæй æрыгæттæ фидæны æнтыстджын архайд кæной нырыккон технологиты къабæзты, сæ архайдæй пайда хæссой республикæ æмæ паддзахадæн», — йæ раныхасы фæбæрæг кодта Битары-фырт. Республикæйы Сæргълæууæг бузныг загъта, центр байгом кæныныл чи бацархайдта, æппæт уыцы адæмæн. Æмæ зæрдæ бавæрдта, республикæйы разамынд центры æнтыстджын архайдæн æххуыс кæй кæндзæн, уымæй. Йæ ныхасмæ гæсгæ, ахæм центртæ хъуамæ байгом уой республикæйы æппæт районты дæр. Кадджын æмбырды раныхас кодтой ЦИПУ-йы ректор Огъуаты Алан, Ирыстоны уазæг — компани «Рыбаков-фонд»-ы президент Еленæ Ульянова (ацы куыстуат архайдта ног центр байгом кæныны хъуыддаджы), РЦИ-Аланийы Инновациты фонды минæвар Гаглойты Азæмæт æмæ иннæтæ. Уый фæстæ центры разамонæджы хæдивæг Ингæ Тваури уазджытæн фенын кодта, фæсивæд сæ наукон-техникон сфæлдыстад кæм æххæст кæндзысты, уыцы аудиторитæ. Æрыгæттæн дзы ахæм архайдæн ис æппæт фадæттæ дæр: сæвæрдтой дзы сканертæ, принтертæ, æндæр техникон ифтонггæрзтæ. Ингæ Тваурийы ныхасмæ гæсгæ, центры программæтæ арæзт сты æрыгон ахуыргæндтæ æмæ аспиранттæн. Зæгъын хъæуы, Фæсивæды инновацион сфæлдыстады центр байгом кæныны хъуыддагмæ йе ‘вæрæн Цæгат Ирыстоны Экономикон рæзты министрад дæр кæй бахаста, уый. Кадджын æмбырды архайдтой республикæйы ахуырад æмæ наукæйы министр Иринæ Азимова, экономикон рæзты министр Томайты Хъазыбег æмæ Фæсивæды хъуыддæгты фæдыл комитеты сæрдар Цæлыккаты Барис. РЦИ-Аланийы Сæргълæууæджы æмæ РЦИ-Аланийы Хицауады прессслужбæ

ОСТАВЬТЕ ОТВЕТ

Please enter your comment!
Please enter your name here