Цæгат Ирыстон фæстаг фæндараст загъта Нафийæн

0
107

Знон Цæгат Ирыстоны цæрджытæ, Республикæйы Сæргълæууæг, Хицауады, зонадон, сфæлдыстадон, ахуырадон интеллигенцийы минæвæрттæ йе ‘нусон фæндагыл фæстаг фæндараст загътой ирон литературæйы æмæ наукæйы пехуымпар, филологон наукæты доктор, профессор, Хетæгкаты Къостайы номыл паддзахадон премийы лауреат, литературон критикты дунеон ассоциацийы уæнг, Фыдыбæстæйы Стыр хæсты ветеран ДЖУСОЙТЫ Нафийæн.

Æрдхæрæны ахуыргонды номыл саударæн æмбырд байгом кодта ЦИПУ-йы ирон филологийы факультеты декан, УФ-йы культурæйы сгуыхт кусæг Хозиты Барис. Уый бæстон радзырдта, Нафи Иры дзыллæйæн цы стыр хæрзты бацыд, литературæйы, зонады, ахуырады, æхсæнадон царды йын цы бирæ æмæ стыр фæллæйттæ ныууадзын бантыст, стæй, сæ ахадындзинад нæ адæмы монон культурæйы рæзты куыд вазыгджын у, уый тыххæй. Нафи йæ царды фæстаг бонтæ арвыста йæ уарзон хо Клавæйы хæдзары. Æнæуи дæр-иу, Цхинвалæй Дзæуджыхъæумæ ссæугæйæ, йæ фысым уый уыд. Æмæ йын уымæ гæсгæ ацы сыхбæстæ йæхи сыхбæсты ад кодта. Нафи ацы сыхы цæрджытимæ куыд уарзонæй цард, цы æгъдау æмæ сын кад фæкодта, уый тыххæй радзырдта сыхбæсты хистæртæй иу, газет «Рæстдзинад»-ы сæрмагонд уацхæссæг Баскаты Уырызмæг.

Нафийæн куыд йе ‘мсис хистæрæн, афтæ бирæ кæстæриуæг фæкодта Ирыстоны Фысджыты цæдисы æмсæрдар, Хетæгкаты Къостайы номыл паддзахадон премийы лауреат Ходы Камал. Уый йæ раныхасы сæйраг хъуыдыйæн загъта, кæддæриддæр-иу æхсызгонæй кæй дис кодта ахуыргонды куыстхъомдзинадыл, радзырдта, Нафийæн раздæры Советон Цæдисы фысджыты æхсæн цы стыр кад æмæ рад уыд, стæй йæ алы ныхасæн дæр ын аргъ кæй кодтой, уый дæр сæм æфсымæры зæрдæ кæй дардта, уый тыххæй. Куыд зындгонд литературæиртасæг æмæ аив дзырды зæрингуырд, афтæ Нафи ЦИПУ-йы ирон филологийы факультеты ахуыргæнджытæн, аспиранттæ æмæ студенттæн цы стыр хæрзты бацыд, цыфæнды рæстæг дæр сын зæрдиаг æмæ цæстуарзон æххуыс кæй кодта, уый тыххæй уыд йæ раныхас Хозиты Барисæн. — Кæд Нафийы зæххон цард фæцис, æмæ абон не ‘хсæнæй цæуы, уæддæр ын йæ ном фæлтæрты зæрдæтыл лæууын кæныныл, йæ бирæ фæллæйттæ æмæ йæ уды бæркæдтæ амæй фæстæмæ дæр факультеты студентты æхсæн парахат кæныныл ноджы зæрдиагдæрæй архайдзыстæм, — загъта Хозиты Барис. Тынг зæрдæмæхъаргæ æмæ уды арфæй цæуæг хъуыдытæ номдзыд Нафийы тыххæй саударæн æмбырды загъта Уæрæсейы Федерацийы наукæты академийы дзæуджыхъæуккаг зонадон центры сæргълæууæг, физиконматематикон наукæты доктор Къусраты Анатоли. Уый бæлвырд радзырдта, Дзæуджыхъæуы наукон центры сырæзтæн æмæ архайдæн Нафи цы бирæ хæрзты бацыд, йæ цæстуарзондзинад, йæ зæрдæйы ахаст ацы зонадон артдзæсты кусджытæм куыд ахадгæ уыд, уый тыххæй. Тæфæрфæсы телтæ æрбарвыстой Уæрæсейы æмæ раздæры Советон Цæдисы алы бæстæтæй. Номдзыд ахуыргонд æмæ рухстауæг Джусойты Нафийы уæззау зианы бон йæ хиуæтты æмæ хæстæджыты фарсмæ чи балæууыд, се стыр мардæрцыды уæззау зындзинад сын чи фæрогдæр кодта, уыцы æрцæуæг адæмæн, РЦИ-Аланийы Хицауадæн, зонадон, ахуырадон, сфæлдыстадон æмæ æхсæнадон организациты минæвæрттæн мыггаджы номæй арфæ ракодта Джусойты Георги. Саударæн æмбырды фæстæ Ирыстоны фæсивæды минæвæрттæ сæ къухты бæрзонд систой Иры номдзыд ахуыргонд, фыссæг æмæ рухстауæг Джусойты Нафийы табæт æмæ йæ алæвæрдтой нæ хуссайраг æфсымæртæм, цæмæй йæ сæмбæлын кæной йæ райгуырæн зæххыл. Стыр кад æмæ цытимæ нæ уæздан æмæ цæстуарзон хистæр, номдзыд ахуыргонд Джусойты Нафийы бавæрдзысты 29 июны, Цхинвалы цы пантеон арæзт æрцыд, уым.

ГАСАНТЫ Валери

Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here