Æмгуыстады бындуртыл æрдзырдтой

0
25

Цæгат Ирыстоны Сæргълæууæг БИТАРТЫ Вячеславы амынддзинадмæ гæсгæ, республикæйы Хицауады Сæрдар ТУСКЪАТЫ Таймураз фембæлд Швейцарийы Конфедерацийы Æххæстбарджын минæвар Уæрæсейы Федерацийы Ив РОССЬЕИМÆ. Уый тыххæй фехъусын кодта РЦИАланийы Сæргълæууæджы пресс-службæ.

Швейцарийы минæварады разамонæг Дзæуджыхъæумæ ссыд республикæимæ базонгæ уæвыны нысанимæ. Йе ‘мбæлццæттæ уыдысты минæварады уынаффæгæнджытæ Доротея Кольде Коровин æмæ Франк Шюрх. Швейцариаг дипломаттимæ фембæлды архайдтой РЦИ-Аланийы сæйраг федералон инспектор Андрей Бессонов, йæ хæдивæг Сергей Гончаров, УФ-йы фæсарæйнаг хъуыддæгты министры официалон минæвар Дзæуджыхъæуы Хетæгкаты Алан æмæ республикæйы национ ахастдзинæдты фарстаты фæдыл министры фыццаг хæдивæг Владимир Писаренко. Республикæйы уазджытæн зæрдиаг салам зæгъгæйæ, Тускъайы-фырт йæ раныхасы куыд фæнысан кодта, афтæмæй Швейцари у, хъæздыг истори æмæ рагон традицитæ кæмæн ис, ахæм бæстæ. Уый стыр æвæрæн хæссы дунейы социалон-экономикон райрæзтмæ. «Сымах фæлтæрддзинад æмæ æнтыстдзинæдтæ бирæтæн дæнцæгæн сты, иумæйаг мидбæстон продукты бæрцмæ гæсгæ Швейцари дунейы ахсы 19-æм бынат. Нæ республикæ цæттæ у сымахимæ æмгуыстад рапарахат кæнынмæ»,— загъта Хицауады Сæрдар. Ив Россье куыд радзырдта, афтæмæй йын Ирыстоны цымыдисаг фембæлдтытæ уыд хицаудзинады æххæстгæнæг органты разамонджытимæ. Уыдонимæ ныхасы рæстæг бæлвырд æрдзырдтой республикæйы æхсæнадон-политикон уавæрыл, национ ахастдзинæдтыл, культурæ æмæ ахуырады рæзтыл, стæй фæнысан кодтой, Цæгат Ирыстон æмæ Швейцарийы ‘хсæн æмархайд цы хъуыддæгты рапарахат кæнæн ис, уыдæттæ. «Кæй зæгъын æй хъæуы, цыбыр балцы рæстæг æппæт хъуыддæгтæ сбæлвырд кæнæн нæй, фæлæ боны дæргъы Ирыстоны цы федтон æмæ базыдтон, уыдон мæ разæнгард кæнынц, цæмæй ногæй ссæуон республикæмæ дарддæры æмгуыстады фарстатыл æрдзурыны тыххæй», — фæбæрæг кодта Швейцарийы минæвар.

2929Нæ уацхæссæг

ОСТАВЬТЕ ОТВЕТ

Please enter your comment!
Please enter your name here