“Хъуамæ тырнат наукæйы бæрзæндтæм”

0
53

Æрыгон ахуыргæндты æппæтадæмон историон-филологон скъола-конференцийы куысты 2005 азæй нырмæ архайдтой Цæгат æмæ Хуссар Ирыстоны, Цæгат Кавказы æмæ Хуссайраг Федералон зылды республикæтæ, Мæскуы æмæ Санкт-Петербурджы курдиатджын фæсивæд.

Форумы программмæйы лекцитæ æмæ мастеркласстæ бацæттæ кæнынц зындгонд ахуыргæндтæ-гуманитаритæ, йæ архайджытæ базонгæ вæййынц ног рауагъд чингуытимæ, практикон ахуыртæ вæййы студенттæн, аспиранттæн, наукон темæйыл чи кусы, уыдонæн. Конференцийы рæстæг æрыгон ахуыргæндтæ дискусситæ саразынц истори, этнографи, филологи, социологи, политологи æмæ æндæр фарстатыл, профессионалон æмæ хæлардзинады бастдзинæдтæ сын фæзыны, аргъ скæнынц сæ наукон зонындзинæдтæн. Знон дыууадæсæм хатт Цæгат Ирыстоны Абайты Васойы номыл гуманитарон æмæ социалон иртасæнты институт суазæг кодта æрыгон ахуыргæндты — Цæгат Ирыстоны паддзахадон университеты, педагогон институты, Кæсæг-Балхъары паддзахадон университеты минæвæртты æмæ иннæты. Зæрдиаг æгасцуай сын загъта институты директор, историон наукæты доктор, профессор Хъаныхъуаты Зæлинæ. Конференцийы архайджытæ иу уысм æнцад алæугæйæ ссардтой ирон дзырдаивады, литературæйы, æвзаджы, драматургийы дæсны, Ирыстоны адæмон фыссæг, дæсны тæлмацгæнæг, зынгæ æхсæнадон кусæг, профессор Джусойты Нафийы ном. — Сымахæн, æрыгæттæн, стыр ахуыргæндты цард дæнцæгæн хæссинаг у, хъуамæ тырнат наукæйы ахæм бæрзæндтæм схизынмæ, — загъта Хъаныхъуаты Зæлинæ. Скъола-конференцийы архайджытæн ма раарфæ кодтой Хетæгкаты Къостайы номыл паддзахадон университеты проректор Туаты Бертæ æмæ историон факультеты декан, историон наукæты кандидат Плиты Зæлинæ. Зонындзинæдтæ бæрзонддæр кæнынæн, размæ цыдæн стыр ахъаз у ацы скъола, тауы адæмты ‘хсæн хæлардзинады нæмгуытæ. Фæсивæды наукон иртасæн куыстытæн сæ хуыздæртæ мыхуыры рацæудзысты, уый дæр ныфсы хос у æрыгон чызгæн кæнæ лæппуйæн. — Ныртæккæ æрыгон ахуыргæндтæм стыр æргом здæхт цæуы. Бирæ ног гæнæнтæ, авналæнтæ фæзынд, фæлæ афтæ бæрзонд сты сæ æвзарæнтæ дæр. Æхсызгонæй уæм æнхъæлмæ кæсынц мæскуыйаг институтты, фæлæ сæ домæн у — хъуамæ зонай мадæлон, стæй европæйаг, фæсарæйнаг æвзæгтæй иу, — загъта Хъаныхъуаты Зæлинæ. Лекцитæ, мастеркласстæй уæгъд рæстæг институты уазджытæ цымыдисæй бабæрæг кодтой, æмбал кæмæн нæй, ахæм чингуыты равдыст «Редкая книга: инновационные методы сохранения и популяризации». Ацы проект бацæтттæ кодтой Уæрæсейы Президенты Грант райсыны бындурыл. Конференци цæудзæн æртæ боны.

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here