Ныхас — сабырдзинад æмæ разыдзинадыл

0
60

Ивгъуыд хуыцаубоны Елхоты æрæмбырд сты уазджытæ Дагестаны, Цæцæны, КæсæгБалхъары, Мæхъæлы, Хъæрæсе-Черкесты æмæ Адыгейы республикæтæй. Уыдон архайдтой регионты ‘хсæн фестиваль «Мир Кавказу — Мы вместе!»-йы. Кадджын уазджыты ‘хсæн уыд РЦИ-Аланийы Хицауады Сæрдар ТУСКЪАТЫ Таймураз дæр.

Уый арфæ ракодта фестивалы архайджытæ æмæ уазджытæн: «Мæ зæрдæ уын зæгъы æнтыстджын куыст, Цæгат Кавказ Уæрæсейы нымад у, æмбал кæмæн нæй, ахæм цæрæн бынатыл. Æппæты дæр дисы æфтауынц кавказаг адæмты цардарæзт, традицитæ. Æнусты дæргъы кæрæдзи фарсмæ цæрынц сæдæгай адæмыхæттытæ, хъахъхъæнынц се ‘гъдæуттæ, се ‘взаг æмæ культурæ. Кæрæдзийæн аргъгæнгæйæ цæрынц, архайынц, цæмæй Кавказы уа сабырдзинад æмæ разыдзинад, нымайынц традицитæ æмæ адæмтæ цы динтыл хæст сты, уыдон. Мах æмхуызонæй арæзтам ацы бæстæ, хъахъхъæдтам æй, æмæ дарддæр дæр архайæм, цæмæй нæ иумæйаг хæдзар фидар уа, ууыл».

Тускъайы-фырт куыд бафиппайдта, афтæмæй федералон зылды арæзт æмæ цалцæггонд цæуынц скъолатæ, рынчындæттæ, социалон-культурон къабазы æндæр объекттæ, промышленность æмæ хъæууон хæдзарадыл æфтынц ног кусæн бынæттæ. Адæм тырнынц уымæ, цæмæй Кавказы æппынæдзух дæр уа сабырдзинад, кæрæдзийæн аргъ кæной, кæрæдзи уарзой. Цæгат Ирыстон ма ацы фестивалæн раздæрдæр уыдис фысым. Кодтой-иу æй Æрæфы районы Цыколайы хъæуы. Ацы форумæн йæ нысан у Уæрæсейы хуссайраг регионты граждайнаг сабырдзинадæн æххуыс кæнын, фæсивæдон æмæхсæнадты æмгуыстад, адæмты ‘хсæн ахастдзинæдтæ нывыл кæнын, динты ‘хсæн æмархайд фидар кæнын, терроризм, экстремизм æмæ æндæр знаггадхæссæг идеологитæн ахуырады къабазы æмæ фæсивæды ‘хсæн ныхмæвæрдтæ аразын. Уымæ гæсгæ фестивальты алы хатт дæр фæархайынц республикæты муфтитæ. Уымæй уæлдай, ацы хатт программæйы уыдис спортивон хъæзтытæ дæр, бæхтыл дугътæ. Фæсивæд æмæ хистæртæ æрныхас кодтой Кавказы адæмты æмхæлардзинадыл , Уæрæсе æмæ Кавказ историон æгъдауæй куыд баиу сты, уыдæтты тыххæй. Фæлæ ныхас æрмæст ацы темæтыл нæ баззади, уымæн æмæ фæсивæды размæ абон цард бирæ алыхуызон фарстатæ рахæссы. Ахсджиаг уыдис иумæйаг уæрæсейаг наци сфидар кæныны фарста дæр. Форумы ма архайдтой республикæйы Парламенты Сæрдары фыццаг хæдивæг Къесаты Станислав, Паддзахадон Думæйы депутат Таймазты Артур, нæ республикæйы спорты министры хæстæ рæстæгмæ æххæстгæнæг Бæройты Хасан, Кировы районы сæргълæууæг Нæкуысаты Барис.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here