Æмæ Ирон театр ногæй йæ хуыз скалдзæн…

0
96

Цалдæр мæйы размæ æнæххæст бæрнондзинады æхсæнад «Миранда»-йы бындурæвæрæг БАГАТЫ Алихан фæндон бахаста, цæмæй йæ фæрæзтæй цалцæггонд æрцæуой Ирон театры бацæуæнтæ æмæ алфамбылай территори. Æмæ æрæджы уыцы куыстытæ райдыдтой. Уый тыххæй фехъусын кодта РЦИ-Аланийы Сæргълæууæджы пресс-службæ.

Цалцæггæнæн æмæ аивгæнæн куыстытæ куыд цæуынц, уый сбæрæг кæныны нысанимæ Цæгат Ирыстоны Сæргълæууæг Битарты Вячеслав 18 июлы абалц кодта Ирон театры размæ. Аразджыты архайды тыххæй республикæйы разамонæгæн радзырдтой культурæйы министр Милдзыхты Руслан, театры директор Боциты Витали æмæ Багаты Алихан. Аивгæнæн куыстытæн сæ иу хай ныридæгæн ахицæн кодтой. Зæгъæм, Таутиайыфырты уынджы ‘рдыгæй театрмæ цы бацæуæн ис, уым уал сæвæрдтой диаритæй колоннæтæ. Сæ фарсмæ та — диабазæй конд бындурыл сæвæрдзысты таурæгъон кадæггæнæг Хъуыбадыйы скульптурæ. Ивд цæуы театры алыварс быру дæр — йæ иумæйаг дæргъ у 600 метры бæрц. Уымæй уæлдай, Багайыфырты хъæппæрисæй зæронд бордюртæ дæр раивдзысты зынаргъ æрдзон дурæй, асфальты бæсты та театрмæ бацæуæнтæ сфæлгонц кæндзысты плиткæйæ. Багаты Алихан цæттæ у театры агъуыст сцалцæг кæнынæн æххуысмæ дæр. Бадзæбæх кæнын хъæуы театрæн йе ‘ддаг бакаст, фæлгонцадон куыстытæ бакæнын хъæуы агъуысты мидæг дæр. Театры реконструкцийы фæдыл сараздзысты сæрмагонд сфæлдыстадон конкурс архитекторты ‘хсæн. Битарты Вячеслав хорз аргъ скодта, цалцæггæнæн куыстытæ куыд цæуынц, уымæн, стæй арфæйагыл банымадта театры агъуыст реконструкци скæныны хъæппæрис. «Нæ культурæйы сæйрагдæр хæзнатæй иу у Ирон театр. Амалхъомады минæвæрттæ театры лыггæнинаг фарстатæм се ‘ргом кæй раздæхтой, уый, кæй зæгъын æй хъæуы, арфæйаг хъуыддаг у. Уæлдайдæр та, республикæйы бюджет æппæт куыстытыл кæй не ‘ххæссы, уыцы æууæл хынцгæйæ. Республикæйæн ахæм зæрдиаг æххуыс чи кæны, уыцы амалхъомтæн æз бузныг зæгъын», — фæнысан кодта республикæйы Сæргълæууæг.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here