Уыдзæн Беслæны Хæлардзинады парк

0
103

Алы хъуыддаг дæр фыццаг ныхасæй райдайы. РЦИ-Аланийы Ветеранты совет цы ахсджиаг хъуыддаг саразынмæ хъавы, ууыл та хъуыдис лæмбынæг ныхас канд нæхи мидæг нæ, фæлæ нæ сыхаг регионты минæвæрттимæ дæр. Æмæ знон, 19 июлы, ахæм ныхас рауад Беслæны Культурæйы галуаны. Ардæм æрæмбырд сты Цæгат Ирыстоны Ветеранты советы æмæ æндæр æхсæнадон организациты бæрнон кусджытæ, Рахизфарсы районы разамынд, Цæгат Кавказы федералон зылды ветеранты æмæ æндæр организациты разамонджытæ, хицаудзинады органты минæвæрттæ, горæты æхсæнад æмæ дзыллон информацийы фæрæзты кусджытæ.

Æмбырд байгом кодта РЦИ-Аланийы Ветеранты советы сæрдар, авиацийы инæлар-майор Къаболаты Солтан. Уый цыбырæй загъта, æмбырды ныхас цы ахсджиаг фарстайы фæдыл цæудзæн, уый ахадындзинады тыххæй æмæ дзырды бар радта Рахизфарсы районы сæргълæууæг Фрайты Сосланæн. — Абоны æмбырды уынаффæйæ махæн Адæмты хæлардзинады парк саразыны фадат лæвæрд куы ‘рцæуа, уæд æмбырды архайджытæй уыдзыстæм бузныг, — загъта Сослан æмæ арфæ ракодта, ахæм парк саразыны хъæппæрис чи равдыста, уыдонæн, æмæ сыхаг регионтæй Беслæнмæ æрцæуынмæ чи нæ фæзивæг кодта, уыцы уазджытæн. Уый фæстæ РЦИ-Аланийы Ветеранты советы сæрдары фыццаг хæдивæг Бедойты Руслан ноджыдæр ма иу хатт фехъусын кодта, Адæмты хæлардзинады парк Беслæны арæзт кæй цæуы Дзæуджыхъæуы бынмæ немыцаг-фашистон æфсæдты ныддæрæны 75 азы кадæн, æмæ радзырдта, 1942 азы фашистты ныхмæ Цæгат Ирыстоны цы карз тох цыдис, уый тыххæй. Йæ раныхасы æрхаста бирæ цымыдисаг хабæрттæ. Зæгъæм, Ирыстоны чи хæцыд знаджы ныхмæ, уыдонæй Советон Цæдисы Хъæбатыры ном цал хæстонæн æрцыд лæвæрд, Петр Барбашов æмæ зындгонд Матросовæй чи раздæр фесгуыхт, Ирыстоны зæххыл ма уыдоны хуызæн сгуыхтдзинад чи равдыста æмæ æндæртæ. Горæт Пятигорскы дзæуджыхъæуккаг, Советон Цæдисы Хъæбатыр Юри Бунимовичы уынг кæй ис, уый дæр æмбырды уæвджытæй бирæтæ Бедойы-фырты раныхасæй базыдтой. Ирыстоны бирæ чи уарзта, уыцы хорз лæгтæй иу — Битуев Наргу — Кæсæг Балхъары ДОСААФ-ы раздæры сæрдар — фæзиан æрæджы. Русланы фæндонæй æмбырды архайджытæ минут æдзæмæй алæууынæй ссардтой кæсгон Хъæбатыры ном. Æмбырды ма раныхас кодтой Республикæ Кæсæг-Балхъары Ветеранты советы сæрдары хæдивæг Борис Романенко, Стъараполы крайы ветеранты æхсæнадон организацийы Пятигорскы хайады сæрдар Николай Лега, Адæмты хæлардзинады парк саразыны хъæппæрис равдисджытæй иу — Ходы Валодя (Рахизфарсы районы раздæры сæргълæууæг), Æппæтдунеон æхсæнадон змæлд «Иры Стыр Ныхас»-ы Рахизфарсы районы Ныхасы сæрдар Томайты Савели, Фыдыбæстæйы Стыр хæсты архайæг Гулуты Хизир, Дзæуджыхъæуы бынæттон хиуынаффæйады администрацийы сæргълæууæджы хæдивæг Гозымты Раман, Рахизфарсы районы Ветеранты советы сæрдар Калоты Анатоли, Рахизфарсы районы æмæ республикæйы Хицауады раздæры бæрнон кусæг, кадджын пенсиисæг Дзуццаты Саханджери, парти «Иугонд Уæрæсе»йы Рахизфарсы хайады æмæ республикæйы национ-культурон æхсæнадты разамонджытæ, Минводы зылды Ветеранты советы сæрдар Виктор Доленицкий. Фысымтæ æмæ уазджытæ дæр хорзыл банымадтой Беслæны Адæмты хæлардзинады парк саразыны хъуыддаг, загътой, уый табуйаг хъуыддаг у, зæгъгæ. Æмбырды уынаффæ сфидар кæныны размæ Гозымты Раман уазджытæн балæвар кодта чиныг «Города-герои Советского Союза и города воинской славы России». Адæмты хæлардзинады парк саразыны тыххæй æмбырды уынаффæйы проект бакаст Республикæ Кæсæг-Балхъары делегацийы уæнг Юрий Ашинов. Къаболаты Солтан ма йæм бахаста иунæг бафтауинаг: Цæгат Кавказы федералон зылды æппæт регионты разамонджытæй ракурын, цæмæй ацы хорз хъæппæрисы фарс рахæцой. Адæмты хæлардзинады паркы бынат рагацау сбæлвырд кодтой Рахизфарсы районы æмæ РЦИАланийы Ветеранты советы разамонджытæ. Парк арæзт æрцæудзæн горæт Беслæнæй Фарныхъæуы ‘хсæн Терчы рахиз былгæрон.

БАГАТЫ Аврам

ХЪАЗИТЫ Иринæйы ист къам

ОСТАВЬТЕ ОТВЕТ

Please enter your comment!
Please enter your name here