Ансамбль «Алан»-ы æнтыст

0
175

РЦИ-Аланийы Адæмон кæфтыты паддзахадон академион анасамбль «Алан»-æн бындур æвæрд æрцыд 1938 азы. Уæдæй нырмæ ацы хъуыстгонд ансамбль бирæ сæдæгай концерттæ радта, куыд нæ бæстæйы алы рæтты, афтæ бирæ фæсарæйнаг бæстæты дæр. Сæ бирæвæрсыг аивадæн сын алы ран дæр скæнынц стыр аргъ. Ууыл дзурæг сты сæ бирæ кадджын хæрзиуджытæ.

Ацы хъуыстгонд коллектив бирæ хæттыты ссис Уæрæсейы æмæ Дунеон конкурсты лауреат, кад æмæ радимæ хæссы Хетæгкаты Къостайы номыл паддзахадон премийы лауреаты ном, хорзæхджынгонд æрцыд Адæмты Хæлардзинады орденæй, лæвæрд ын æрцыд Уæрæсейы Федерацийы Хицауады æмæ «Золотой Аполлон»-ы премитæ. Ансамбль «Алан»-æн ныртæккæ арæхстджын разамынд дæтты йæ аивадон разамонæг, РЦИ-Аланийы культурæйы сгуыхт кусæг Тедеты Руслан. Уый кæд уыцы бæрнон бынаты нырма хæрзцыбыр рæстæг кусы, уæддæр йæ арæхстджын разамындæй ансамблы æвæрд æрцыд цыппар ног хореографион кафты. Уыдонимæ — ирон рагон адæмон кафт «Симд» æмæ «Чызджыты вальс». Æрæджы ансамбль «Алан» йæ ног æвæрд кæфтытимæ стыр концерт радта Тæбæхсæуты Балойы номыл Ирон паддзахадон академион театры. Уырдæм æрбацыд тынг бирæ адæм. Концерт фенынмæ æрбацыдысты РЦИ-Аланийы Хицауады Сæрдар Тускъаты Таймураз, нæ республикæйы культурæйы министр Милдзыхты Руслан, Хицауады иннæ бæрнон кусджытæ, æмæ стыр аргъ скодтой ансамблы архайджыты бирæвæрсыг аивадæн. Ирон театры уæрæх залы цы бирæ дзыллæтæ бадт, уыдоны зæрдæмæ уæлдай тынгдæр фæцыдысты адæмон кæфтытæ «Симд», «Хонгæ», «Хъаматимæ кафт», «Гуымсæджытимæ (доулитимæ) кафт», Кавказы цæрæг иннæ адæмты кæфтытæ — гуырдзиаг «Картули», аджайраг «Гандаган», азербайджайнаг чызджыты кафт æмæ æндæртæ. Аивадуарзджыты сæ дæсны, арæхстджын æмæ рæсугъд кафтæй сæхимæ æркæсын кодтой ансамблы архайджытæ РЦИ-Аданийы сгуыхт артисттæ Тедеты Леван, Битарты Руслан, Бæззаты Мака, РЦИ-Аланийы æмæ Кæсæг-Балхъары сгуыхт артисткæ Лолаты Альбинæ, РЦИ-Аланийы адæмон æмæ Республикæ Хуссар Ирыстоны сгуыхт артист Диготы Сослан æмæ иннæтæ.

Нæ уацхæссæг

 

ОСТАВЬТЕ ОТВЕТ

Please enter your comment!
Please enter your name here