Цæгат Ирыстон — Красноярскы край: фидар æмгуыстадæн сæвæрдтой бындур

0
46

Нæ газеткæсджытæ куыд зонынц, афтæмæй 22-23 июлы Красноярскы крайы цыдысты Республикæ Цæгат Ирыстон-Аланийы бонтæ. Ацы ахсджиаг æхсæнадон-политикон мадзалы архайдта нæ республикæйы официалон делегаци БИТАРТЫ Вячеславы разамындæй. Красноярскмæ абалц кодтой УФ-йы Президенты цур РЦИ-Аланийы Æххæстбарджын минæвар ДЗАНАЙТЫ Барис, æндæр бæрнон кусджытæ, стæй Цæгат Ирыстоны аивад æмæ культурæйы архайджыты стыр къорд.

Республикæйы бонты фæлгæты цы æмбырдтæ арæзт æрцыд, уыдонæй иу уыд Битарты Вячеславы фембæлд Красноярскы регионалон национ-культурон автономи «Ирыстон»-ы уæнгтимæ. Не ‘мзæххонтимæ ныхасы рæстæг Битары-фырт куыд фæбæрæг кодта, афтæмæй алы уæрæсейаг регионты кусæг ирон æхсæнадты архайдæн ис стыр ахадындзинад. «Ахæм фембæлдтытæ мын алкæддæр æхсызгон вæййынц. Сымах, республикæйæ дард цæргæйæ æмæ кусгæйæ, ном кæнут уæ чысыл фыдыбæстæйæн. Æмæ уын уый тыххæй бузныг зæгъын. Мæ зæрдæ дарын, абон Красноярскы крайы зæххыл цы бæрæгбон аразæм, уый иннæ адæмты минæвæрттæн дæр фæзминаг кæй суыдзæн, ууыл», — загъта Битарыфырт. Цæгат Ирыстоны Сæргълæууæг йæ раныхасы сæрмагондæй фæбæрæг кодта, æнæххæст бæрнондзинады æхсæнад «Новоангарский обогатительный комбинат»-ы генералон директор Гуыриаты Владимир Красноярскы крайы, стæй Цæгат Ирыстоны дæр цы активон архайд кæны, дыууæ регионы бастдзинæдтæ æнгомдæр кæныныл куыд кусы, уый. — Гуыриаты Владимиры зæрдиаг архайд ахады Красноярскы крайы экономикон хъомысыл, стæй дзы рох нæу Цæгат Ирыстон дæр, къæрцхъус у республикæйы цæуæг цаутæм, йе ‘ххуысы хай хæссы культурæйы объекттæ цалцæг кæнын æмæ æндæр хъуыддæгтæм. Ныртæккæ цы бæрæгбоны архайæм, уым дæр ис йæ къухты февнæлд æмæ йæ дзыппы бæркад. Цæгат Ирыстоны бонтæ бацæттæ кæныныл чи бакуыста, æппæт уыцы адæмæн æз арфæ кæнын, — бафиппайдта Битарыфырт. РЦИ-Аланийы Сæргълæууæджы ныхасмæ гæсгæ, республикæйы Хицауад дæр кусдзæн, цæмæй, æндæр регионты чи цæры, нæ уыцы æмзæххонтæ сæхиуыл æнкъарой Ирыстоны аудындзинад. «Кæй зæгъын æй хъæуы, не ‘мзæххонтæ-иу Ирыстонмæ куы здæхиккой, уæд хорз уаид. Фæлæ ууыл кусын хъæуы, æппæт мадзæлттæй архайдзыстæм ног кусæнбынæттæ байгом кæныныл, цæмæй нæ дæсны специалисттæ æндæр бынæттæ ма агурой», — загъта Битары-фырт. Фæстæдæр Цæгат Ирыстоны бонты фæлгæты Татышев-парчы кадджын уавæры байгом кодтой музейон экспозици æмæ алыхуызон равдыстыты фæз. Бæрæгбонмæ æрбацæуæг адæмæн уым фадат уыд ирон национ уæлæдарæсы, ирыстойнаг нывгæнджыты куыстыты, рагон къамты, æрмдæсныты къухæй арæзт дзаумæтты равдыстытимæ базонгæ уæвынæн. Республикæйы Национ музейы кусджытæ красноярскæгты зонгæ кодтой рагон ирон цардыуагимæ, сæрмагонд равдысты равæрдтой, 19 æнусы ирон хæдзары цы дзаумæттæй пайда кодтой, уыдон. Цæгат Ирыстоны делегацийы уæнгтæ æмæ фысымтæ æрзылдысты æппæт экспозицитыл дæр. Крайы губернатор Виктор Толоконский æмæ Красноярскы мэр Эдхам Акбулатов стыр цымыдисдзинад равдыстой ирон адæмы национ культурæ æмæ æгъдæуттæм. Крайы губернатор йемæ уæвæг бæрнон кусджыты æргом аздæхта ирон æрмдæсныты куыстытæм. Йæ ныхасмæ гæсгæ, ахæм диссаджы сфæлдыстадон уацмыстæй хуыздæр лæвар ма цы ракæнæн ис адæймагæн? Уыцы фиппаинаг йæ фæдыл расайдта бæлвырд ныхас Красноярскы ирыстойнаг ахæм продукцийæн дукани байгом кæныны тыххæй. Уыимæ, хорз уаид, Красноярскы æрмдæсныты сфæлдыстадон куыстыты дукани та Дзæуджыхъæуы куы фæзынид, уæд. Фембæлды архайджытæ куыд баныхас кодтой, афтæмæй фарстайыл бæстон бакусдзысты. Красноярскæгтæ æмæ горæты уазджытæн уыцы бон сарæзтой алыхуызон мастер-класстæ дæр. Ирыстоны минæвæрттæ сын амыдтой рагон музыкалон инструменттыл цæгъдын, фат æмæ æрдынæй æхсын, чъиритæ кæнын æмæ ирон цыхт ахсын. — Абон базонгæ стæм ирон адæмы хъæздыг истори, национ культурæ æмæ традицитæ æвдисæг æрмæджытимæ. Уæлдай зæрдæмæдзæугæдæр мæм фæкастысты адæмон промыслæты продукцийы хуызæгтæ. Уыцы дзаумæттæ æмæ мигæнæнтæ афтæ аив арæзт сты, æмæ сæм цæст кæсынæй не ‘фсæды. Кæй зæгъын æй хъæуы, бафæндыд мæ ирон дзаджджын чъиритæй саходын дæр, фæлæ уый мæ къухы нæ бафтыд — адæмæй къух бакæнæн нæ уыд, чъиритæ кæм кодтой, уыцы бынаты, — фæстæдæр радзырдта Виктор Толоконский. Æмæ æрмæст равдыстытæй нæ, фæлæ æндæр мадзæлттæй дæр барухс сты крайы цæрджыты зæрдæтæ. Зæгъæм, ирыстойнæгтæ сын балæвар кодтой стыр концерт. Архайдтой дзы зындгонд оперон зарæггæнæг, Пермы Оперæ æмæ балеты театры солисткæ Абайты Зæринæ, æрыгон оперон зарæггæнæг Сланты Тимур, кафæг æмæ актер Кокайты Алан, æвзонг дирижер Муриты Данæ, Цæгат Ирыстоны адæмон артист Тайсауты Олег, дунеон æмæ æппæтуæрæсеон конкурсты лауреат Дулаты Дзамболат, РЦИ-Аланийы сгуыхт артисткæ Дзахоты Зæринæ, Цæгат Ирыстоны Оперæ æмæ балеты паддзахадон театры солист Илаты Тимур, ансамбль «Маленький джигит», вокалон къорд «Фидæн» æмæ доулистты квартет «Сила звука». Концерты размæ та Цæгат Ирыстон æмæ Красноярскы крайы делегациты уæнгтæн сæрмагонд фембæлд уыд губернаторы администрацийы бæстыхайы. Уыцы фембæлды рæстæг Битарты Вячеслав æмæ Виктор Толоконский бафыстой дыууæ регионы ‘хсæн Базарадон-экономикон, наукон-техникон æмæ культурон æмгуыстады бадзырд, стæй документ æххæст кæныны фæдыл бæлвырд мадзæлтты пълан. Фембæлды райдайæны Виктор Толоконский куыд фæнысан кодта, афтæмæй ахсджиаг хъуыддагыл нымайы, Красноярскы край æмæ Республикæ Цæгат Ирыстон-Алани сæ ахастдзинæдты бæрзонддæр къæпхæнмæ кæй схиздзысты, уый. «Абоны æмбырд нын фадат дæтты, цæмæй бæстон æрдзурæм фидæны æмгуыстадыл, снысан кæнæм, дыууæ регионæн дæр цымыдисаг чи уа, ахæм проекттæ æмæ программæтæ», — загъта губернатор. Виктор Толоконский стыр аргъ скодта, Цæгат Ирыстоны минæвæрттæ Красноярскы крайы социалон-экономикон рæзтмæ цы æвæрæн хæссынц, уымæн. Йæ ныхасмæ гæсгæ, советон азты рæстæг крайы егъаудæр объектты арæзтады архайдтой ирыстойнæгтæ дæр, республикæ регионмæ æрвыста дæсны специалисттæ. Уый фæстæ Виктор Толоконский æмæ Битарты Вячеслав бадзырды сæ къухтæ бавæрдтой. Битарты Вячеслав йæ раныхасы фысымтæн бузныг загъта, хорз сæ кæй суазæг кодтой, уый тыххæй. Битары-фырты ныхасмæ гæсгæ, дыууæ регионы æмгуыстады бадзырд хорзæрдæм сахаддзæн республикæйы экономикон рæзтыл. Нæ уацхæссæг

ОСТАВЬТЕ ОТВЕТ

Please enter your comment!
Please enter your name here