Финляндийæ — хæрзиуджытимæ

0
166

Фæстаг дæс боны Беслæны аэропортмæ бацæуæны фæз цыппæрæм хатт ссис бæрæгбонхуыз. Ардæм нæ уæлахиздзау-фæсивæдыл бацин кæнынмæ æрбацæуынц сæдæгай спортуарзджытæ. Уыдонимæ вæййынц спортсменты хæстæджытæ, хæлæрттæ, спортивон æмæ æхсæнадон кусджытæ…

Афтæ рауад 4 августы дæр. Уыцы бон Финляндийæ сæ райгуырæн Ирыстонмæ сыздæхтысты, фæсивæды ‘хсæн уæгъдибар хъæбысхæстæй дунеон чемпионаты Уæрæсейы спортивон кад чи хъахъхъæдта, уыцы ирон богæлттæ Байаты Давид, Найфонты Артур, Къозонты Зауыр æмæ Уалыты Радик. Куыд хъусын кодтам, афтæмæй финляндийаг горæт Тамперейы Байаты Давид (65 кг) æмæ Найфонты Артур (84 кг) рамбылдтой сыгъзæрин майдантæ. Къозонты Зауыр (120 кг) та бацахста 3-аг бынат. Байаты Давид (тренер Цакъоты Илья) йæ ныхмæлæуджытыл се ‘ппæтыл дæр фæуæлахиз рæстæгæй раздæр. Куы йæ бафарстам, уый дæ къухы куыд бафтыди, зæгъгæ, уæд дзуапп радта: «Мæ тренер Цакъоты Илья æмæ уый фæстæ та Уæрæсейы иугонд командæйы тренертимæ дæр нæхи цæттæ кодтам æрмæстдæр фыццаг бынат бацахсынмæ. Æз кæдфæндыдæр тырнын, техникон æгъдауæй, куыд гæнæн ис, афтæ алывæрсыг уæвын æмæ мын уый ацы хатт дæр та баххуыс кодта. Ме ‘ппæт ныхмæлæуджытыл дæр фæуæлахиз дæн дæс баллæй фылдæр сæ рамбулгæйæ. Уый тыххæй бузныг мæ тренер Цакъоты Ильяйæн». Найфонты Артур дæр равдыста æвæджиауы арæхстдзинад æмæ уæлахизмæ тырнындзинад. 84 кг онг уæзы фæуæлахиз йæ фондз ныхмæлæууæгыл æмæ ссис дунейы чемпион фæсивæды ‘хсæн. «Мæ ныхмæлæуджытæй æппæты тыхджындæр уыди америкаг богал Захид Валенсия. Уыимæ хæцыдтæн кæронбæттæны, æмæ суанг фæстаг секунды онг дæр нæ тох цыди хъазуатонæй. Мæнæн бантыст 7:5 хыгъдæй рамбулын. Раст куы зæгъон, уæд мæ хъуыдытæ уыдысты æрмæстдæр уæлахизимæ баст. Ноджы ма нæ тренертæ нæ фарсмæ кæй уыдысты, уый дæр уыд ныфсы хос», — загъта Артур. Къозонты Зауыр фæхæрд æрмæстдæр иу хатт, фæлæ уый уыди æрдæгкæронбæттæны æмæ йын 3-аг бынатæй уæлдæр схизынæн фадат нал уыд. Америкаг богал Дэн Стивенсонимæ йæ тох куыд рауад, уый тыххæй Зауыр загъта: «Чемпионатмæ æз цыдтæн æрмæстдæр фыццаг бынат бацахсыныл фæндонимæ. Мæ æртæ фыццаг фембæлды куы рамбылдтон, уæд æрдæгкæронбæттæны дæр рацыдтæн фæуæлахиз уæвыны зондимæ. Хъыгагæн, фембæлды райдайæны, размæ бырсгæйæ, рæдыд æруагътон, фæхæрд дæн цалдæр баллы æмæ атындзыдтон хыгъд мæхи пайдайæн раивынмæ. Иуныхасæй, мæ рæдыдтытæй Стивенсон спайда кодта æмæ фембæлд уый пайдайæн ахицæн. Ныр мæ рæдыдтытæм лæмбынæгæй æркæсдзынæн æмæ мæ тренертæ Лалыты Георги æмæ Вадимимæ сæ аиуварс кæныныл бакусдзыстæм». Уæрæсейы фæсивæды иугонд командæйы хистæр тренер Лалыты Вадим, нæ лæппутæ куыд рахæцыдысты, уый тыххæй загъта: «Кæй зæгъын æй хъæуы, мах нæ зæрдæ дардтам, Уалыты Радик æмæ Къозонты Зауыр дæр уæлахиздзаутæ кæй уыдзысты, ууыл. Фæлæ алы хатт хъуыддæгтæ фæндонмæ гæсгæ нæ рауайынц. Давид æмæ Артурæй куы зæгъæм, уæд сæ дыууæ дæр сты арфæйы аккаг. Не ‘руагътой рæдыдтытæ, равдыстой хорз цæттæдзинад æмæ æнæгуырысхойæ бырстой уæлахизмæ». Лалыты Георги ма бафтыдта: «Зауырыл нæ зæрдæ дарæм, йæ рæдыдæй раст хатдзæгтæ кæй скæндзæн æмæ тагъд, ас спортсментимæ ерыс кæнгæйæ, йæхи хъомысджынæй кæй равдисдзæн». Тынг цин кодтой беслæйнæгтæ сæ хъæуккаг Найфонты Артуры уæлахизыл. Йæ тренер Æрчъегкаты Тотрадз загъта: «Артур у зæрдæргъæвд æмæ коммæгæс лæппу. Йæ абоны æнтыстдзинад ын фæстаг кæй нæ уыдзæн, уый мæ уырны. Артур сывæллонæй бахауд Беслæны 1-æм скъолайы стыр бæллæхы. Мæлæтæй аирвæзт йæ дзæнæты бадинаг мады фæрцы æмæ ныр спорты ахæм бæрзæндтæм кæй тырны, уый махæн уæлдай зынаргъдæр у. Æз не ‘ппæты номæй дæр бузныг зæгъын, абон нын ахæм кады фембæлд чи сарæзта, уыдонæн се ‘ппæтæн дæр. Мах та тырндзыстæм фидæны ног уæлахизтæм!»

ОСТАВЬТЕ ОТВЕТ

Please enter your comment!
Please enter your name here