«Машук»: фæсивæдон форум байгом

0
298

6 августы горæт Пятигорскы кадджын уавæры байгом Цæгат Кавказы æрвылазон фæсивæдон форум «Машук». Ацы хатт регионы егъаудæр фæсивæдон æмбырды архайджытæ суыдзысты 2 мин æрыгон адæймаджы — Цæгат Кавказы æппæт субъектты минæвæрттæ. Уыдонæй уæлдай, форумы уазджытæ уыдзысты æндæр уæрæсейаг регионтæ, стæй фæсарæйнаг бæстæты минæвæрттæ дæр.

Куыд амæй размæ азты, афтæ ныр дæр «Машук» кусдзæн дыууæ радæй. Фыццаг рад цæуы 5 августæй 12 августы онг, йæ сæйраг темæ у «Развитие территории: экология региона» (кусынц дзы ахæм секцитæ: «Проект. Команда», «Карьера. Творчество» æмæ «Наука. Бизнес»), дыккаг рад та цæудзæн 12-19 августы, уым та сæйрагдæр уыдзæн ахæм темæ: «Развитие территории: экология общества» (кусдзысты дзы секцитæ: «Лидерство. Общество», «Информация. Безопасность» æмæ «Спорт. Патриотизм»). Зæгъын хъæуы, форумы архайыны фæдыл курдиæттæ 5 мин адæймагæй фылдæр кæй æрбарвыстой, уый дæр. Оргкомитет фæсивæдæн бацæттæ кодта цымыдисаг программæ: лекцитæ, мастер-класстæ, пресс-конференцитæ, пленарон æмбырдтæ æмæ секцион ахуыртæ, хъæппæристы армукъатæ, спортивон ерыстæ, бæстæзонæн экскурситæ, алыхуызон хиирхæфсæн мадзæлттæ. Сæрмагонд ныхасы аккаг у, форумы архайджытæ цы æхсæнадон проектты конкурсы фæархайынц, уый. Æрвылаз дæр фæсивæд форумы гранттæ райсыны фæдыл æрбадæттынц æхсæнадон цардыл ахадæг, амалхъомады райрæзтæн ахъазгæнæг алыхуызон проекттæ. Афтæ у ныр дæр. Ацы аз грантты конкурсæн федералон бюджетæй радих кодтой 85 милуан сомы. Уыцы проектты конкурсы уæлахиздзаутæн æмæ призертæн саккаг кæндзысты фæйнæ 300, 400 æмæ 500 мин сомы (æдæппæт хорзæхджын æрцæудзысты 100 проектæй фылдæр). «Машук»-ы мадзæлттæ райдыдтой 5 августы, 6 августы та фæсивæдон форум кадджын уавæры байгом кодтой. Уый фæдыл æмбырдмæ æрбацыдысты æмæ форумы архайджытæн арфæтæ ракодтой УФ-йы Президенты Æххæстбарджын минæвар Цæгат Кавказы федералон зылды Олег Белавенцев, Фæсивæды хъуыддæгты фæдыл федералон агентады разамонæг Александр Бугаев, Цæгат Кавказы федералон зылды субъектты сæргълæуджытæ, зындгонд æхсæнадон архайджытæ. Уыцы æмбырды уыд Цæгат Ирыстон-Аланийы стыр делегаци дæр, йæ сæргъы — республикæйы Сæргълæууæг Битарты Вячеслав, афтæмæй. Фæсивæдон форум «Машук»-ы архайджыты номыл арфæйы фыстæг сæрвыста Президент Владимир Путин. Президенты арфæйæ райдыдта æмбырд. «Ацы бонты та горæт Пятигорскы æрæмбырд сты Цæгат Кавказы курдиатджын æмæ хъæппæрисджын фæсивæд. Зæрдæмæдзæугæ у, уыцы фæсивæд регионы социалон-экономикон хъомыс раргом кæныныл кæй архайынц, егъау программæтæ æххæст кæнынмæ сæ ныфс кæй хæссынц, уый. Форумы оргкомитет бацархайдта, цæмæй, Стъараполы крайы цы рæстæг арвитат, уый уæнгрог æмæ пайдаджын уа. Ныфс мæ ис, ацы бонтæ уын бирæ алыхуызон цымыдисаг фембæлдтытæ кæй балæвар кæндзысты, ног хæлæрттæ æмæ æмхъуыдыгæнджытæ уын кæй фæзындзæн, уæ фæллад дзæбæх кæй суаддзыстут, уымæй», — загъд ис Президенты фыстæджы. Уæрæсейы Президенты Æххæстбарджын минæвар Олег Белавенцев йæ раныхасы куыд фæбæрæг кодта, афтæмæй форум «Машук» у Цæгат Кавказы фæсивæды царды азы ахсджиагдæр цау, йæ архайджытæ та сты, бирæнацион Уæрæсейы иудзинад фидæны чи хъахъхъæндзæн, уыдон. «Сымах æрыгон, зæрдæргъæвд æмæ курдиатджын стут. Абон уал «Машук»-ы хицæуттæ стут, фидæны та уæ бæрны уыдзæн сæйрагдæр хæзна — не стыр Фыдыбæстæйы хъысмæт. Фидарæй мæ уырны, нæ бæстæйы иудзинад æмæ рæзтыл æнтыстджынæй кæй архайдзыстут, уый», — загъта Олег Белавенцев. «Машук»-ы архайджытæн арфæтæ ракодтой æмæ ныстуантæ загътой Фæсивæды федералон агентады разамонæг Александр Бугаев, Цæгат Ирыстоны Сæргълæууæг Битарты Вячеслав, Стъараполы крайы губернатор Владимир Владимиров, иннæ кадджын уазджытæ. Рæствæндаг æмæ æнтыстджын у, «Машук»!

Æрмæг бацæттæ кодта СЛАНТЫ Аслан

ОСТАВЬТЕ ОТВЕТ

Please enter your comment!
Please enter your name here