Цæгат Ирыстоны сбæрæг кодтой РЦИ-Аланийы æмæ Дзæуджыхъæуы бон

0
79

Ивгъуыд хуыцаубоны нæ республикæйы цæрджытæ сбæрæг кодтой республикæйы æмæ Дзæуджыхъæуыл 233 азы сæххæсты бон. Сæйрагдæр мадзæлттæ конд æрцыдысты Хетæгкаты Къостайы номыл культурæ æмæ фæлладуадзæн центрон парчы æмæ Сабырдзинады проспекты. Цæрджытæ æхсызгонæй бацархайдтой æппæт мадзæлтты дæр, РЦИ-Аланийы Сæргълæууæг БИТАРТЫ Вячеслав, Хицауады уæнгтæ, æппæт бæрнон адæймæгтæ се ‘мхуызон балæууыдысты бæрæгбоны æппæт хъуыддæгты.

Бæрæгбоны мадзæлттæ райдыдтой 12 сахатыл. Горæты сæйраг уынджы æрбынæттон сты алыхуызон цымыдисаг æрмадзтæ, къамты æмæ аивадон равдыстытæ, рагон машинæтæ æмæ мотоциклтæ, хæстон техникæимæ кæй бафæндыд, уыдоны бон уыдис базонгæ уæвын. Æрмдæснытæ æвдыстой сæ арæхстдзинад, фæсивæд, рæзгæ сабитæ цымыдисæй кастысты сæ къухты змæлдмæ, сæхи фæлвæрдтой алыхуызон хъуыддæгты. Цалдæр сфæлдыстадон коллективы, семæ — 58-æм æфсады, Уæрæсейы гвардийы æмæ Суанты Кимы номыл эстрадон оркестртæ равдыстой мидисджын концертон программæтæ. Уымæй дарддæр — музыкалон, кафты, зарды æмæ поэтикон сфæлдыстадæй хайджын адæймæгтæн сæ бон уыди бацархайын курдиæтты фестивалы. Республикæйы разамынд бабæрæг кодтой, нациты ‘хсæн змæлд «Нæ Ирыстон» цы фæзуатыл æрбынæттон ис, уый. Уыцы ран национ-культурон æхсæнæдты минæвæрттæ æвдыстой сæ адæмты культурæ æмæ традицитæ. Стыр бынат бæрæгбоны бацахста, республикæйы аст районы се ‘нтыстдзинæдтæ кæм æвдыстой, уый дæр. Алы къæбиц дæр уазджытыл æмбæлдис зæрдиагæй, цæхх, кæрдзынимæ, кафт æмæ зардимæ. Уæдæ парчы ирон чъириты бæрæгбоны дзыллæтæй анкъуысæн нæ уыдис, алкæй дæр фæндыдис чъиритæй скомдзаг кæнын, сæ бон уыдис балхæнын алыхуызон ирон цыхтытæ. Бæрæгбон гом кæнгæйæ республикæйы Сæргълæууæг Битарты Вячеслав загъта: «Абон нæ республикæйæн æмæ Дзæуджыхъæуæн у стыр бæрæгбон, æмæ уын уый тыххæй арфæ кæнын. Æхсызгон нын у, уый бæрц рæсугъд хъуыддæгтæ дзы конд кæй цæуы, уый. Ирон чъириты фестивалы архайджытæн æмæ йæ саразджытæн уæлдай бузныг зæгъын, уымæн æмæ махæн æртæ чъирийы хуымæтæг хойраг не сты. Æртæ чъирийы æмæ ирон бæгæныйы къусимæ кæддæриддæр Стыр Хуыцаумæ кувæм, æмæ нын ахæм арфæ ракæнæд, цæмæй алы хатт дæр нæ фынгтыл уа æртыгай чъиритæ, æмæ нæ бон ахæм рæсугъддзинæдтæ кæнын куыд уа». Уый ма арфæ ракодта, Турчы цæрæг ирæттæй ацы бонты республикæйыл чи сæмбæлд, уыцы æфсымæртæн æмæ хотæн.

Бæрæгбон æнæ спортивон хъуыддæгтæй, ерыстæй нæ баззад. Дзæуджыхъæуы муниципалон сконды разамонæг Хæдарцаты Махарбеджы приз райсынæй конд æрцыдис уæгъдибар хъæбысхæстæй гом чемпионат, цирхътæй хæцыны, шашкæтæ, шахмæттæ, армлеслинг æмæ æндæр алыхуызон ерыстæ. «Портал»-ы нывгæнджытæ бацæттæ кодтой армукъа. Изæрæй та уыдис стыр концерт, йæ архайджытæн æмæ æппæт дзыллæтæн æгасцуай загъта Битарты Вячеслав. Куыд бафиппайдта, афтæмæй Цæгат Ирыстон сæрыстыр цæмæй уа, уый йæм ис. «Нæ республикæйæн ис дæргъвæтин историон фæндаг æмæ абон æппæт уæрæсейаг адæмтимæ аразы йæ нырыккон цард, нысантæ æвæры фидæнмæ. Нæ размæ цыдæриддæр хæстæ ис, уыдоныл кусæм æмæ кусдзыстæм, республикæйы рæзтæн цыдæриддæр ахъазгæнæг программæтæ ис, уыдон уыдзысты боны фæткы, парахатдæр кæндзыстæм не ‘мгуыстад хъуыддаджы лæуд адæймæгтимæ. Уыдæттæ уымæн — цæмæй Цæгат Ирыстоны экономикæ суа хъомысджын, социалон æгъдауæй та цæуа хъахъхъæд, нæ граждантæн та уа аккаг æмæ удæнцой цард», — загъта Битары-фырт. Уый фæстæ республикæйы цæрджытæ байхъуыстой кавказаг æмæ уæрæсейаг эстрадæйы минæвæрттæм. Кæронбæттæны та Сæрибардзинады фæзы уыдис фейерверк. Бæрæгбоны фæлгæты йæхи хъæппæрисджынæй равдыста республикон адæмон газет «Рæстдзинад» дæр. Ацы хатт йæ тематикон фæзуат уыд, æрæджы Дзæуджыхъæуы уынгты цы ног трамвайтæ ауагътой, уыдонæй иу. Редакцийы кусджытæ трамвайы скодтой газеты историимæ баст хуызджын равдыст. Уыдис дзы фенæн, алы азты «Рæстдзинад»-ы чи куыста, уыдоны: редакторты, уацхæсджыты, техникон æмæ æндæр кусджыты къамтæ, «Рæстдзинад»-ы фыццаг номыр æмæ газеты тематикон фæрстæ. Трамваймæ цæуджытæн газет «Рæстдзинад»-ы уацхæссæг Касаты Аслæнбег æхсыхгонæй дзырдта газеты равзæрды æмæ йæ историйы тыххæй цымыдисаг хабæрттæ æмæ сын лæвар кодта, Республикæ æмæ Дзæуджыхъæуы бæрæгбоны номыл «Рæстдзинад»-ы кусджытæ цы номыр рауагътой, уый. Уыцы бон «Рæстдзинад»-ы трамвайы къæсæрæй æппынкъаддæр бахызт фондзсæдæ адæймагæй фылдæр. Бæрæгбоны мадзæлтты архайгæйæ трамваймæ саккаг кодта нæ республикæйы Сæргълæууæг Битарты Вячеслав дæр. Бузныджы ныхас æмæ арфæйы аккаг сты уадынгæрзты ансамбль «Уадындз»-ы къорды архайджытæ. Уыдон трамвайы сарæзтой æцæг ирон хъазт.

Нæ уацхæссæг

 

 

 

ОСТАВЬТЕ ОТВЕТ

Please enter your comment!
Please enter your name here