Дзæуджыхъæуы байгом ног медицинон центр

0
47

Республикон клиникон рынчындоны кусын райдыдта цæфтæ дзæбæхгæнæн центры ног корпус. Йæ байгом кæныны æхсызгон хъуыддаджы архайдтой РЦИ-Аланийы Хицауады Сæрдар ТУСКЪАТЫ Таймураз, республикæйы æнæниздзинад хъахъхъæнынады министр Михаил РАТМАНОВ, РЦИ-Аланийы Мидхъуыддæгты министрады Фæндæгтыл æдасæй цæуыны паддзахадон инспекцийы управленийы разамонæг ХУАДОНТЫ Айвар æмæ Республикон клиникон рынчындоны сæйраг дохтыр МОРГУАТЫ Аслæнбег.

Центрæн йæ ног корпус аразын райдыдтой ацы азы райдайæны. Рынчынтæн дзы ис цыппар стационарон бынаты, фæлæ сæм бахъуаджы рæстæг уæлæмхасæнæн бафтауæн ис дыууæ. Уыдонæй уæлдай хайады ис операцитæгæнæн блок æмæ интенсивон терапийы палатæ. Ацы ран æнæаргъæвгæ медицинон æххуыс дохтыртæ кæндзысты, уыцы-иу хаттæн алыхуызон цафтæ чи баййæфта, уыцы рынчынтæн. Ахæмтæ фылдæр хатт вæййынц фæндаггонтранспортон бæллæхты хъыгдард баййафджытæ. Уæззау рынчынты ардæм ласдзысты комкоммæ исæнуатæй, рæстæг дзæгъæлы куыд нæ сæфа, афтæ.

— Нæ раздæры уавæртæ куыд амыдтой, уыдонмæ гæсгæ фæндаггон-транспортон фыдбылызы хъыгдард баййафæг рынчынтыиу бахъуыд ласын иу корпусæй иннæмæ хъæугæ иртасæнтæ æмæ анализтæ кæныны тыххæй. Æмæ-иу уыдæттыл рæстæг сæфтам. Ныр та æппæт хъæугæ медицинон мадзæлттæ æмæ æххуыс, суанг операцитæ дæр, кæнæм уыцы-иу ран. Иу ныхасæй, уыцы-иу рæстæг алыхуызон цæфтæ баййафæг рынчыны цыдæриддæр хъæуы, алцыдæр сын кæнæм ацы уæладзыджы. Арфæ ракæнын мæ фæнды Æнæххæст бæрнондзинады æхсæнад «Спецтепломонтаж»-ы разамонæг Дзебысаты Майрæмæн — йæ фæрцы нæм фæзынд, йæ аргъ 2,5 милуан сомы кæмæн у æмæ вазыгджын операцитæ кæнынæн нын фадат чи дæтты, бирæфункционалон операцитæгæн ахæм стъол, — зæгъы Республикон клиникон рынчындоны сæйраг дохтыр Моргуаты Аслæнбег.

— Фæндæгтыл æдасæй цæуыны паддзахадон инспекциимæ республикæйы фæндæгтыл мах аразæм рейдтæ æмæ сбæрæг кæнæм нозтджын, кæнæ наркотик хъæстæ чи фæци, ахæм шофырты. Фæндаггон-транспортон бæллæхтæй бахъахъхъæныны тыххæй фæндæгты тæссагдæр рæтты æвæрд æрцыд фæндаджы тæссагдзинад амонæг нысантæ. Ацы аз уал æвæрд æрцыд æхсæз ахæм фæндаггон нысаны. Ног азы сæ нымæц фæфылдæр уыдзæн, — загъта республикæйы æнæниздзинад хъахъхъæнынады министр Михаил Ратманов. Йæ ныхасмæ гæсгæ, уæлдай стырдæр æргом аздахын хъæуы чындзхæсджыты машинæтæм, уымæн æмæ сæ аххосæй арæх цæуы фæндаггон-транспортон фыдбылызтæ, сæ шофыртæ нозтджын кæй вæййынц, уый тыххæй. Бæрæггæнæнтæ куыд амонынц, афтæмæй ацы азы 8 мæймæ фæндаггонтранспортон бæллæхты нымæц фæкъаддæр. Ацы аз январæй августы онг фæндаггон-транспортон бæллæхты фæмард 42 адæймаджы, уый у 20 адæймаджы къаддæр, фароны ацы рæстæгимæ абаргæйæ.

— Фæндагыл цæугæйæ адæймаг цæфтæ кæй баййафы, ацы уавæр аразгæ у бирæ хъуыддæгтæй, зæгъæм, фæндæгтыл цыд куыд арæзт цæуы, уыцы æгъдауæй, профилактикон куыстæй, фæндæгтыл цæуыны уагæвæрдтæ фыддæрадæн дæр чи халы, уыдоны ныхмæ арæзт мадзæлттæй, нозтджын шофыртæн ныхкъуырд чи дæтта (адонимæ æндæр гæнæн нæй), ахæм карз мадзæлттæй, стæй, кæй зæгъын æй хъæуы, фæндæгтыл фæнды машинæйæ, фæнды фистæгæй чи цæуы, уыдонæн сæ культурæйæ, — бафиппайдта республикæйы Хицауады Сæрдар Тускъаты Таймураз. Бæрæг куыд у, афтæмæй Республикон клиникон рынчындоны бындурыл цæфтæ дзæбæхгæнæн 1аг къæпхæны центр (бынат дзы уыд 20 рынчынæн) арæзт æрцыд, Уæрæсейы Федерацийы Æнæниздзинад хъахъхъæнынады министрад æмæ РЦИ-Аланийы Хицауад 2011 азы октябры се ‘хсæн цы бадзырд сарæзтой, уый бындурыл. Уымæй размæиу бирæ цæфтæ баййафæг рынчынты ластой сæ цæрæн бынатмæ гæсгæ районты рынчындæттæм. Уыдонæн та сæ гæнæнтæ, кæй зæгъын æй хъæуы, нæ амыдтой ахæм уæззау рынчынтæн аккаг медицинон æххуыс бакæнынæн. 1аг къæпхæны цæфтæ дзæбæхгæнæн центр Республикон клиникон рынчындоны кусын цы бон райдыдта, уæдæй абонмæ дзы баххуыс кодтой 1 985 рынчынæн.

РЦИ-Аланийы Æнæниздзинад хъахъхъæнынады министрады пресс-службæ

ОСТАВЬТЕ ОТВЕТ

Please enter your comment!
Please enter your name here