“Иумæ хæларæй цæрын, иумæ фæрнджын хъуыддæгтæ аразын”

0
26

Рæсугъд æмæ цымыдисаг бæрæгбон ацыдис Ирыстоны — Цæгат Кавказы адæмты Культурæ æмæ спорты VIII фестиваль. Арæзт уыдис УФ-йы спорты æмæ УФ-йы Культурæйы министрадты хъæппæрисæй, Цæгат Кавказы хъуыддæгты фæдыл УФ-йы министрады, РЦИ-Аланийы Сæргълæууæджы æмæ сæрмагонд фонд «Посети Кавказ»-ы æххуысæй.

Бæрæгбоны мадзæлттæ цыдысты стадион «Спартачы» фæзы. Дыууæ боны дæргъы фестивальмæ æрбацыд тынг бирæ адæм. Нæ республикæмæ æрбацыдысты уазджытæ Цæгат Кавказы алы регионтæй. Бæрæгбоны архайдтой: Цæгат Кавказы хъуыддæгты фæдыл министр Лев Кузнецов, йæ хæдивæг Михаил Развожаев, РЦИ-Аланийы Сæргълæууæг Битарты Вячеслав, УФ-йы спорты министры хæдивæг Маринæ Томилова, Республикæ Хуссар Ирыстоны Президент Бибылты Анатоли, Мæхъæлы Республикæйы Сæргълæууæг Юнус-Бек Евкуров, РЦИ-Аланийы Парламенты Сæрдар Алексей Мачнев, нæ республикæйы мидхъуыддæгты министр Михаил Скоков, РЦИ-Аланийы Хицауады Сæрдар Тускъаты Таймураз æмæ Цæгат Кавказы федералон зылды субъектты хицауæдты минæвæрттæ. Фестивалы фыццаг хай байгом, «Бренды Северного Кавказа», зæгъгæ, равдыстыты армукъайæ. Ам фенæн уыдис, ныридæгæн нæ бæстæйы базарады æнтыстджыныл нымад чи у, уыцы хъæууонхæдзарадон æмæ промышленнон куыстуæтты продукци, Цæгат Кавказы зылды 38 куыстуатæй. Армукъайы Ирыстонæй архайдтой товаруадзæг 18 куыстуаты. Нæ республикæйы Сæргълæууæг æмæ кадджын уазджытæ зылдысты армукъайыл æмæ кастысты, равдыстыты кæй равæрдтой, уыцы продукцимæ. Æппæт товарты ‘хсæн та уазджыты зæрдæтыл сæмбæлдысты ирон чъиритæ æмæ бæгæны. Алы куыстуаты минæвар дæр бæлвырд дзырдта йæ продукцийы хæрзхъæддзинадыл, сæ æнтыстыты фæдыл. Лев Кузнецов армукъайы равдысты тыххæй загъта: — Цæгат Кавказы «брендтæ» сты, Уæрæсейы Хуссайраг регионы чи цæры, уыцы адæмты истори æмæ культурæйы æвдисæнтæ. Æвæджиауы ахадындзинад сын ис. Уымæн æмæ экологион æгъдауæй сты сыгъдæг, фæлæ сæ цæмæдæр фаг нæ парахат кæнæм, афтæмæй та хи хойраджы хæрзхъæд продукттæ уадзыныл дзурæм иудадзыг. Ныр архайдзыстæм, стæй нæ иумæйаг хæс уыдзæн ацы куыстуæттæн ноджы хуыздæр уавæртæ саразыныл, уæлдай нæу, чысыл, рæстæмбис æви стыр куыстуат у, уый, — загъта министр. Уый фæстæ делегаци «Национ кæртытæ» бабæрæг кодта. Алы республикæ дæр адæмы размæ равдысты хуызы рахаста йæ æгъдæуттæ, традицитæ æмæ культурæ. Алы ран дæр дзы фенæн уыдис æрмдæсныты куыстытæ, музейон экспонаттæ æмæ национ аивад. Делегацийы уæнгтыл алы «кæрты» дæр æмбæлдысты кафт, зард æмæ нуазæнтимæ, национ хуынтимæ. Æппæты фыццаг делегаци бацыдысты алайнаг-ирон кæртмæ. «Город мастеров», зæгъгæ, фæкодта Лев Кузнецов. Хъæздыг равдыст цымыдисы æфтыдта алкæй дæр.

Уæлдай хъæлдзæг уыдис Стъараполы «кæрты». Ацы ран фенæн уыдис театралон хуызы мадзал, сæ истори, сæ культурæ æмæ æгъдауы фæдыл. Тæвд цай, лауызтæ æмæ гуылтæй хынцтой уазджыты. Æппæт кæртыты дæр делегацийы уæнгтæ сахуыстой алкæй къæбæрæй дæр. Битарты Вячеслав национ кæртыты фæстæ журналисттæн куыд загъта, афтæмæй ахæм мадзæлттæ стыр ахъаз сты хæлар ахастдзинæдтæ, сабырдзинад аразынæн, нæ бæстæйы экономикон рæзтмæ хи æвæрæн бахæссынæн. Уый загъта: — Фестиваль фыццаг хатт Ирыстоны зæххыл цæуы æмæ мæ уырны, азæй-азмæ ноджы егъаудæр кæй кæндзæн, йæ архайджыты нымæц та — фылдæр. Ныридæгæн, фестиваль Цæгат Кавказы арæнтæй кæй ахызт, уымæн æвдисæн сты æндæр рæттæй дæр æрцæуæг уазджытæ. Абон ма иу хатт федтам, Цæгат Кавказы цæрæг адæмтæ сабыр цардмæ куыд тырнынц, хæларæй сæ кæрæдзиимæ цæрын кæй фæнды, уый. Цæгат Кавказы дæр иттæг хорз фадæттæ ис, канд нæ бæстæйы нæ, фæлæ дунеон базарады дæр кæй ис сæрыстырæй сæхи куыстуæтты хæрзхъæд продукци равдисынæн. Кавказы адæмты культурæ æмæ спорты фестиваль хорз фадат дæтты нæ рæзгæ фæлтæр æмæ фæсивæды кæрæдзийы æфсымæрдзинады тæгтæй бæттынæн, спорты бæрзæндтæм тырнынæн. Армукъа æмæ национ кæртытæ феныны фæстæ сæйраг мадзæлттæ стадионы хъазæн фæзы райдыдтой йæ байгом кæнынæй. Нæ республикæйы адæмон артист Æлбегаты Алан трибунæйы бадæг адæмæн амыдта, ерысты чи архайдзæн, уыцы спортивон командæты æмæ аивады сфæлдыстадон къордты. Фестиваль байгом театралон музыкалон сюжетæй. Йæ сæйраг архайджытæ уыдысты Нарты эпосы хъайтартæ æмæ нырыккон царды фæлгонцтæ. Концертон программæйы та архайдтой Цæгат Кавказы федералон зылды хуыздæр сфæлдыстадон къордтæ. Фестивалы фыццаг хатт архайдта æмæ кадджын уазæгыл нымад уыдис Сау денджызы флоты кафты æмæ зарды ансамбль. Æртæ мин адæймаджы трибунæйы цымыдисæй кастысты нæхи бæхты театр «Нартæ»-йы номыртæм. Фестивалы фыццаг хатт æппæт уазджытæ æмæ архайджытæ дæр райстой арфæтæ космосæй. Æппæтадæмон космосон станцæйы экипажы уæрæсейаг космонавттæ Александр Мисуркин æмæ Сергей Рязанский зæрдиаг арфæтæ ракодтой фестивалы архайджытæн. Мадзал адарддæр кодта, иугонд командæты парад. Уыдон дыккаг бон архайдтой спорты дыууадæс хуызы ерысты. Профессионалон нæ, фæлæ нæ рагфыдæлтæ сæ тых, сæ хъарутæ кæм æвдыстой, ахæм спортивон хъæзтыты: рог атлетикæ, армспорт, бæндæн ивазыны, уæззæуттæ хæссыны, голджыты гæпп кæныны, фатæй æхсыны æмæ иннæ хуызты. Ерысты æдæппæт архайдта 350 адæймаджы Цæгат Кавказы зылдæй. Фестиваль байгом кæныны мадзал фæцис «Кавказаг хъæзтыты» сæрмагонд тырыса рахæссынæй. Ацы кадджын хъуыддаг бабар кодтой Цæгат Ирыстонæй — грекъаг-ромаг хъæбысхæстыты олимпаг чемпион Хуыгаты Алан, Кæсæг-Балхъарæй — олимпаг чемпион Асланбег Хуштов, Республикæ Дагестанæй — боксæй Олимпаг чемпион Гайдарбек Гайдарбеков, Стъараполы крайæ — æппæтдунеон Универисиадæйы, рог атлетикæйæ дыууæ хатты уæлахиздзау Надеждæ Лобойко, Цæцæны республикæйæ — уæззау атлетикæйæ Олимпаг хъæзтыты æвзист призер Апти Аухадов, Республикæ Мæхъæлæй — Олимпаг чемпион дзюдойæ Хасан Халмурзаев æмæ Хъæрæсе-Черкесты республикæйæ — Европæйы чемпион дзюдойæ Зафар Махмадовæн. Фестивалы арты символикон къус ссыгъта æртæ хатты Олимпаг чемпион, Паддзахадон Думæйы депутат Таймæзты Артур. Фестивалы дыккаг бон стадионы фæзы арæзт цыдысты концертон программæтæ. Спортивон ерыстæ райдыдтой райсомæй 10 сахатыл. Алы республикæйы командæйы курдиатæн архайджытæ биноныг сæ цæст дардтой, аренæйæ цы цæуы, уырдæм. Изæрæрдæм сбæрæг сты уæлахиздзаутæ. Спортивон хъæзтыты дыууадæс хуызы ерыстæй дæс хъазты фыццаг бынат райста Республикæ Цæгат Ирыстоны командæ. Дыккаг бынат лæвæрд æрцыд Дагестаны командæйæн æмæ æртыккаг бынат Республикæ Мæхъæлы командæйæн. Фестивалы кæронбæттæн мадзæлттæ фесты уæлахиздзауты кадгæнæн изæр æмæ Цæгат Кавказы аивадон коллективты концертæй. Стыр æхсызгонæй фестивалы архайджытæ æмæ уазджытæ бакастысты трио «Фидæн», кафджыты къордтæ «Хохаг», «Бонвæрнон», паддзахадон академион ансамбль «Алан»-ы, Кæсæг-Балхъары «Кабардинка», Дагестаны «Лезгинка», Хъæрæсе-Черкесты ансамбль «Эльбрус», Цæцæны «Нохчо» æмæ иннæты аивадмæ. Командæты схорзæхджын кæныны бартæ лæвæрд уыдис Цæгат Кавказы хъуыддæгты фæдыл министры фыццаг хæдивæг Одес Байсултанов, Цæгат Кавказы хъуыддæгты фæдыл министры хæдивæг Михаил Развожаев, РЦИ-Аланийы Сæргълæууæг Битарты Вячеслав, РЦИ-Аланийы Хицауады Сæрдар Тускъаты Таймураз, æртæ хатты Олимпаг чемпион, Паддзахадон Думæйы депутат Таймæзты Артур æмæ РЦИ-Аланийы физикон культурæ æмæ спорты министр Бæройты Хасанæн. Одес Байсултанов арфæтæ ракодта æппæт командæтæн дæр æмæ загъта, се ‘ппæт дæр сæ регионты ном барзонд бæрæггæнæнтимæ кæй бахъахъхъæдтой. Равдыстой иттæг хорз дæсныйад сæ архайды. — Кавказы адæмты культурæ æмæ спорты фестиваль нæ зæрдæты баззайдзæн, ирд æмæ традициты хуыздæр гæнæнтæ æвдисæг мадзалæй. Курдиатджын æрмдæсныты, куыстуæтты хæрзхъæд продукци æмæ спорты æнтыстджын фæсивæды «цæсгомæй». Бæрзонд æмвæзадыл ацыд, зæрдæрухсæй дзы баззадыстæм иууылдæр, чидæриддæр æрбацыд æмæ дзы архайдта, уыдон. Не ‘ппæт дæр Цæгат Кавказы адæмтæ стæм æмæ нæ фæнды иумæ хæларæй цæрын, иумæ фæрнджын хъуыддæгтæ аразын. Фестиваль æхгæнæм, фæлæ нæ дуæрттæ хæлардзинадæн, æмгуыстадæн кæддæриддæр уыдзысты гом, — загъта Битарты Вячеслав кæронбæттæны.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here