Фæсивæды дунеон форум: æрыгæтты хъæппæрис æмæ сфæлдыстад

0
124

Горæт Сочийы йæ куыст фæци Фæсивæд æмæ студентты дунеон XIX-æм фестиваль. Фæсивæдон форум сæхгæныны размæ цæгатирыстойнаг экспозици бабæрæг кодтой фестивалы кадджын уазджытæ Цæгат Кавказы федералон зылды Уæрæсейы Президенты Æххæстбарджын минæвар Олег БЕЛАВЕНЦЕВЫ разамындæй. Президенты минæваримæ регионты стендтæ федтой Цæгат Ирыстоны Сæргълæууæг БИТАРТЫ Вячеслав, Хъæрæсе-Черкесийы республикæйы Сæргълæууæг Рашид ТЕМРЕЗОВ æмæ Мæхъæлы республикæйы Сæргълæууæг Юнус-Бек ЕВКУРОВ.

Ирыстоны делегацийы уæнгтæ сæ уазджыты размæ рацыдысты æртæ чъириимæ, акафыдысты сын «Симд». Презентацитæ æмæ равдыстыты республикон фонды директор Сокаты Марат Президенты минæвар æмæ регионты разамонджытæн радзырдта экспозицийы тыххæй. Стендты æрмæджытæй ирдæй зынд, культурæйы, спорты, наукон æмæ инновацион архайды къабæзты Цæгат Ирыстоны къухы цы бафтыд, уый. Уазджытæн равдыстой республикæйы зæрдылдарæн бынæтты видеопрезентаци, стæй сын цыбырæй радзырдтой йæ историйы тыххæй. Олег Белавенцев Цæгат Ирыстоны делегацийы уæнгтæн бузныг загъта сæ зæрдиаг архайды тыххæй. «Зынаргъ хæлæрттæ! Тагъд рæстæджы не Стыр Уæрæсейы хъысмæт сымах къухты уыдзæн. Уарзут æмæ хъахъхъæнут Уæрæсе! Сабырдзинад æмæ фæрныгадæй хайджын ут!» — ныффыста Арфæты чиныджы Президенты минæвар. Битарты Вячеслав йæ раныхасы куыд фæбæрæг кодта, афтæмæй, Цæгат Ирыстоны минæвæрттæ Фæсивæд æмæ студентты дунеон фестивалы кæй архайдтой, уый ахсджиаг хъуыддаг у. Республикæйы разамонæг арфæ ракодта, Цæгат Ирыстоны экспозицийыл чи бакуыста, æппæт уыцы адæмæн, стæй хорзыл банымадта, нæ республикæйы делегацийы уæнгтæ фестивалы цы æнтыстдзинæдтæ равдыстой, уыдон дæр. — Сымах æрыгон æмæ хъомысджын стут, ис уæм, республикæйы рæзтыл чи сахаддзæн, ахæм хъуыдытæ æмæ хъæппæристæ. Уæ размæ стыр нысæнттæ æвæрут æмæ сыл кусут. Æхсызгон мын у, дунеон форумы архайгæйæ, уæхи ныфсджын æмæ бæрнонæй кæй равдыстат, уый. Цæгат Ирыстонæн ном кæй кæнут, уый тыххæй уæ бызныг дæн, — загъта РЦИ-Аланийы Сæргълæууæг. Фæсивæды фестиваль цы бонты куыста, уыдоны рæстæг Цæгат Ирыстоны экспозици бабæрæг кодтой 28 мин адæймаджы бæрц — се ‘ппæтæн дæр цымыдисаг уыд нæ республикæйы ивгъуыд, абоны цард æмæ фидæны нысæнттæ базонын. Фæсивæд æмæ студентты дунеон XIX-æм фестиваль уыд горæт Сочийы 14 октябрæй 22 октябрьмæ. Форумы архайдтой 29 мин æрыгон адæймаджы 180 бæстæйæ. Цæгат Ирыстон форуммæ арвыста 80 курдиатджын æмæ зæрдæргъæвд делегаты — алыхуызон конкурстæ æмæ олимпиадæты уæлахиздзауты, спортсменты, æхсæнадон архайджытæ æмæ дзыллон информацийы фæрæзты минæвæртты.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here