Равзæрстой ахсджиаг закъоны проекттæ

0
28

«Уый диссаг нæу, дæс азы дæргъы ацы федералон закъоны проектыл ныхас кæнæм, кæддæриддæр йемæ сразы вæййæм, уымæн æмæ Фыдыбæстæйы Стыр хæсты рæстæджы сывæллæттæн хъуамæ паддзахад æнæмæнгæй цавæрдæр социалон зæрдæдарæнтæ кæна. Фæлæ та рацæй-рабон вæййы æмæ Паддзахадон Думæ закъоны проект иуварс авæры, финансон æгъдауæй йæ баххæст кæнынæн бæстæйы æхца нæй. Æнæмæнг ацы хатт дæр йемæ разы стæм», — знон Парламенты Сæрдар Алексей Мачнев парламентон советы æмбырды йæ хъуыдытæ загъта «Фыдыбæстæйы Стыр хæсты сывæллæтты статусы тыххæй» федералон закъоны проекты тыххæй.

Конституцион тæрхондоны сæрдар Къесаты Станислав куыд бафиппайдта, афтæмæй растдæр уаид Уæрæсейы хицаудзинадæн зæгъын, æвæццæгæн, æнхъæлмæ кæсут, цалынмæ уыцы адæм сæ цардæй ацæуой, уæдмæ. Ныртæккæ 80 азмæ ’ввахс кæуыл цæуы, уыдон ма хъуамæ цас фæцæрой æнхъæлмæ кæсгæйæ?!

Советы æмбырдмæ хаст æрцыди бирæ ахсджиаг закъоны проекттæ, баст уыдысты социалон-экономикон, культурон-ахуырадон хъуыддæгтимæ. Закъонæвæрынады, закъонад æмæ бынæттон хиуынаффæйады комитеты сæрдар Ортабайты Тимур фæбæрæг кодта цалдæр акты, уыдонимæ – «Уæрæсейы Федерацийы бынæттон хиуынаффæйады куыст аразыны иумæйаг бындурты тыххæй» закъонмæ æмæ Уæрæсейы Федерацийы хицæн закъонæвæрынады акттæм ивддзинæдтæ бахæссыны тыххæй закъоны проект дæр. Зындгонд куыд у, афтæмæй Уæрæсейы Федерацийы Президенты цур Совет сфидар кодта,  горæтты зæрдæйыфæндиаг удæнцойдзинæдтæ æмæ фадæттæ скæныны тыххæй проект. Уый фæрцы хъуамæ бирæуæладзыгон хæдзæртты кæртытæ, æхсæнадон бынæттæм базилой. Уыцы ран ахсджиаг у сæ историон бакаст бахъахъхъæнын. Муниципалон зылдты уыцы проект æххæст кæныны уагæвæрдтæ æййафынц хъуагдзинæдтæ, уымæн æмæ куыстытæ кæнгæйæ рæдыдтытæ куы ’руадзой, уæд бæрæг нæу, хъуамæ  бæрнондзинад куыдæй æмæ кæмæй бадомой, уый. Советы уæнгтæ сразы сты ацы закъоны проектимæ.

Цæрæнуæтты коммуналон хæдзарад æмæ арæзтадон политикæйы комитеты сæрдар Бокоты Эльбрус куыд бамбарын кодта, афтæмæй Уæрæсейы Федерацийы Цæрæнуæтты кодексы дыууæ статьямæ хъæуы бахæссын ивддзинæдтæ, уымæн æмæ бирæуæладзыгон хæдзæрттæн разамынд дæттыны хъуыддаг домы паддзахадон цæстдард. Лицензион домæнтæ хъуамæ æххæстгонд цæуой, сæ хæрзхъæддзинадмæ та сын кæсдзæн Цæрæнуæтты паддзахадон службæ. Костромайы облæсты цæрæнуæтты инспекцимæ 2016 азы æрбарвыстæуыд 4 888 курдиаты, хъасты, уыдонæн сæ фылдæр баст уыди бирæфатерон хæдзæрттæн разамынддæттыны бадзырды æууæлтæ хуызæнæн æххæстгонд кæй нæ цæуынц, уыимæ. Ацы ивддзинæдты фæрцы стыр хæдзæртты иумæйаг исбонадæн разамынддæттыны хъуыддæгтæ нывылгонд цæудзысты, бадзырд чи бафыста, уыдонæн хъуамæ уа фидар бастдзинæдтæ, æмгуыстад. Уый фæрцы паддзахадон цæстдарæн службæ æмæ тæрхонадон органтыл уыййас уæз не ’нцайдзæн.

Социалон политикæйы, æнæниздзинад хъахъхъæнынад æмæ Ветеранты комитеты сæрдар Реуазты Ларисæ дæр рæгъмæ рахаста бирæ ахсджиаг закъоны проекттæ. Сæ иу – «Уæрæсейы Федерацийы Фæллойадон кодексмæ ивддзинæдтæ бахæссыны тыххæй» федералон закъоны проект. Кæд æмæ Конституцийы  бинонтæ, ныййарджыты хъахъхъæнынæн æппæт мадзæлттæ дæр фыст æрцыдысты, уæддæр Уæрæсейы Президенты ныхасмæ гæсгæ, сæйрагдæр у нæ адæм бахъахъхъæнын цæмæй сæ нымæц куыд Уæрæсейы сæйрагдæр хъæздыгдзинад, афтæ фылдæргæнгæ цæуа. Уымæ гæсгæ ацы закъоны проект, æртæ æмæ фылдæр сывæллæттæ цы бинонты ис, уыдонæн дæтты фадат, цæмæй ныййарджытæ сæрдыгон отпуск райсой кæд сæ  бафæнда, уæд.

Советы æмбырды ма равзæрстой æмæ сфидар кодтой æндæр ахсджиаг закъоны проекттæ дæр.

БУТАТЫ Эльзæ

 

ОСТАВЬТЕ ОТВЕТ

Please enter your comment!
Please enter your name here