Нафийы фарнæй — фæрнджын

0
63

Ирон адæмæн стырдæр хæсты чи бацыд, зонадæн, дзырдаивадæн фарны лæггæдтæ чи фæкодта, йæ уаз дзырдæй нæ дзыллæйы иудзинадыл чи архайдта, йæ цардæгасæй таурæгъты дзуринаг чи сси, нæ уыцы нæртон хъæбултæй иу уыд филологон наукæты доктор, профессор, фыссæг, поэт ДЖУСОЙТЫ Нафи.

Дыууæ азы размæ Хуссар Ирыстоны хæрзаудæн фонды, (йæ сæргъы — зындгонд æхсæнадон архайæг Челæхсаты Хъазыбег) æмæ Самарæйы цæрæг ирæтты æхсæнады сæрдар Хуыгаты Ростиславы хъæппæрисæй бындур æвæрд æрцыд Нафийы номыл Паддзахадон премийæн. Йæ фыццаг лауреаттæ систы номдзыд ахуыргонд, поэт æмæ рухстауæг Джыккайты Шамил (фыццаг преми йын лæвæрд æрцыд йæ амæлæты фæстæ йе ‘взæрст уацмысты æмбырдгонды тыххæй), прозаик Наниты Асиат æмæ газет «Рæстдзинад»-ы хайады сæргълæууæг, РЦИ-Аланийы культурæйы сгуыхт кусæг Багаты Аврам.

Æрæджы та сбæрæг сты, 2016 азы ацы кадджын хорзæхы аккаг чи сси, уыдоны нæмттæ. Æдæппæт преми райсыны конкурсы архайдтой дыууадæс поэты æмæ прозаикы куыд Цæгат, афтæ Хуссар Ирыстонæй дæр. Ивгъуыд æртыццæджы Цхинвалы Профцæдисты хæдзары æмбырдтæгæнæн залы уыд Хуссар Ирыстоны Джусойты Нафийы номыл литературон премийы лауреаттæн кадгæнæн æмбырд. Йæ райдайæны Профцæдисты хæдзары фойейы арæзт æрцыд премийы лауреатты æмæ номинантты сфæлдыстадон куыстыты, чингуыты равдыст.

Кадджын æмбырд йæ раныхасæй байгом кодта Челæхсаты Хъазыбег. Уый загъта:

— Ацы преми сфидар кæныны хъæппæрис нæм куы фæзынд, уæд нæ фарсмæ зæрдиагæй æрбалæууыд, ироны ном йæ зæрдæйы кад æмæ радимæ чи хæссы æмæ, æндæр адæмыхæттыты ‘хсæн цæргæйæ, ирон адæмы фарныл æртывæр хæрдзтæ чи æфтауы, уыцы Хуыцауы уарзон адæймаг Хуыгаты Ростислав. Нафийы номыл преми амæйразмæ чи райста, уыцы лауреаттæ номдзыд ахуыргондæй сæрыстыр æмæ буц кæй сты, уый равдыстой сæ куыстуарзондзинадæй æмæ ирон аив дзырдмæ уарзтæй. Нафийы номæн ахæм премийы хуызы кад кæнын, йæ фарнмæ тырнын махæн не ‘ппæтæн дæр нæ хæс у. Ацы аз та ма снысан кодтам Хуссар Ирыстоны номдзыд ирон поэт Плиты Грисы номыл Паддзахадон преми, æмæ уый хуымæтæджы нæ уыд. Уымæн æмæ Нафи æмæ Грис уыдысты хæлæрттæ, иу уыдысты сæ сагъæс, сæ мæт. Сæ куыст нæ адæмы фарныл уыд, æмæ йыл куыстой, фæллад нæ зонгæйæ, цалынмæ сæ бон уыдис, уæдмæ. Плиты Грисы номыл преми та нырæй фæстæмæ дæтдзыстæм Хуссар Ирыстоны скъолаты ирон æвзаг æмæ литературæйы хуыздæр ахуыргæнджытæн æмæ Тыбылты Алыксандры номыл паддзахадон университеты ирон филологийы факультеты фæзминагдæр студенттæн.

Уый фæстæ сценæмæ схызт РЦИ-Аланийы Парламенты депутат Уататы Зелим æмæ, сæрмагонд къонверт байгомгæнгæйæ, фехъусын кодта, Хуссар Ирыстоны Джусойты Нафийы номыл Паддзахадон æртыккаг преми ацы аз лæвæрд кæй æрцыд Тыбылты Алыксандры номыл паддзахадон университеты философийы кафедрæйы ахуыргæнæг Джыккайты Бэлæйæн сывæллæттæн фыст радзырдты чиныг «Хетæджы мæсыджы» тыххæй. Дыккаг премийы аккаг та сси зындгонд поэт Кокойты Эльзæ йе ‘мдзæвгæты чиныг «Поэзийы арт»-ы тыххæй. Эльзæ йæ хæрзиуæг райста Республикæ Хуссар Ирыстоны хæрзаудæн фонд «Амонд»-ы бындурæвæрæг Хуыгаты Ростиславы къухæй. Хуыгайы-фырт зæрдиаг арфæ ракодта Эльзæйæн æмæ кадджын изæры æппæт архайджытæн загъта, дарддæр дæр зæрдиагæй кæй архайдзæн, ирон дзырдæн лæггад чи кæны, уыцы поэттæ, фысджытæ æмæ ахуыргæнджытæн хæрзты цæуыныл. Æмæ мæнæ ралæууыд Джусойты Нафийы литературон премийы фыццаг къæпхæны лауреаты ном базоныны рæстæг. Уый тыххæй та сценæмæ рацыд Республикæ Хуссар Ирыстон — Паддзахад Аланийы Президент Бибылты Анатоли. Уый байгом кодта сæрмагонд къонверт æмæ æхсызгонæй фехъусын кодта, фыццаг премийы аккаг кæй сси Цæгат Ирыстоны адæмон газет «Рæстдзинад»-ы сæрмагонд уацхæссæг, РЦИ-Аланийы культурæйы сгуыхт кусæг, Уæрæсейы Федерацийы Журналистты æмæ Фысджыты цæдисты уæнг, поэт Абайты Эдуард (йе ‘мдзæвгæты чиныг «Цæххы тæпп»-ы тыххæй). Бибылты Анатоли Эдуардæн премийы майдан æмæ лауреаты диплом куы радта, уæд йæ арфæйы ныхасы загъта: Ахæм кадджын мадзалы кæй архайын, уымæй дæн буц. Нафийы хуызæн фарны лæгтæн кад кæнын, мæрдтæм æгъдау дæттын мæхицæн кæддæриддæр стыр хæсыл нымайын, ахæм номдзыд лæджы фæллæйттæ дзыллæйы ‘хсæн парахат кæнын та у стыр арфæйаг хъуыддаг.

— Джусойты Нафийы номыл фыццаг премийы аккаг мæ кæй скодтат, уый мæнæн стыр кады нысан у. Фыццаджыдæр, уымæн æмæ, Нафи уыдис стыр фыссæг, удуæлдай фæллойгæнæг æмæ диссаджы адæймаг. Уый ирон литературæйы æппæт къабæзты дæр дæллаг галы куыст кæм нæ бакодта, ахæм иу дæр нæй æмæ, цы æвидигæ хъаруйы хицау уыдис, уый цы диссæгтæ скодта, уыдонæн нырма аргъгæнæг аргъ не скодта. Махмæ-иу «Рæстдзинад»-ы редакцимæ куы ‘рбацыд, уæд-иу цæмæдæр гæсгæ, мæнмæ дæр æрбауад. Мæнæ-иу мæм раст, цыма, зæд æрбатахт, афтæиу фæдæн. Сбад, Нафи, сбад, Нафи, зæгъгæ-иу ын фæкодтон, фæлæ мын никуы бакуымдта. Уæдмæ-иу иннæтæ дæр æрбамбырд сты æмæ йæм хъусынæй не ‘фсæстыстæм, йæ алы ныхас дæр нын уыдис зонды хос, зонды къуыбылой уыдис, зонды къуыбылой! Нафийы номыл преми мын зынаргъ ноджы уый тыххæй у, æмæ мæхицæн дæр мæ уидæгтæ хуссайраг сты, Сыбайы хъæуæй рацæугæ сты мæ фыдæлтæ. Иу рæстæджы дзы хос дæр уæхскуæзæй фæкарстон. Иу боны хосдзау дзы нæ уыдтæн, иу боны хосдзауæй цæй хосдзау ис. Банызтон Сыбайы диссаджы суарæй, бахордтон йæ лæхурæг картофæй, сыхсы, хъæддаг æрæскъæф, саунæмыг — уæд Тæхгæ дон (афтæ хонынц æхсæрдзæны) Табу йæхицæн, Сыбайы Сыгъзæрин дзуары бынмæ гомкъахæй дæр ссыдыстæм нæ кувинæгтимæ.

Бузныг, Нафийы номы аккаг мæ чи скодта, уыдонæн се ‘ппæтæн дæр. Бузныг, хæрзаудæн фонд «Амонд» кæй фæрцы сырæзт, уыцы фæрнджын ирон лæг Хуыгаты Ростиславæн, фонды директор Челæхсаты Хъазыбегæн, æмæ, кæй зæгъын æй хъæуы, ирон адæмы æвзаг, культурæ, литературæйыл, йæ адæмы фидæныл ныхасæй нæ, фæлæ хъуыддагæй чи архайы, Хуссар Ирыстоны уыцы Президент Бибылты Анатолийæн. Нафийы фарнæй фæрнджын цы уæм, ахæм амонд нæ уæд. Уый та уæд уыдзæнис, æмæ йын йæ бирæ фæллæйттæ хъуыдыгæнгæ куы кæсæм, куы сæ ахуыр кæнæм æмæ нын зонды æмæ зæрдæйы рухс куы уой. Махæн дæр йæ фарнмæ иу чысыл фарн бафтауын нæ бон цы бауа, ахæм амонд нæ уæд, — загъта йæ арфæйы ныхасы Абайты Эдуард. Уыцы бон ма кад кодтой, ацы аз фыццаг хатт номдзыд ирон поэт Плиты Грисы паддзахадон премиты аккаг чи сси, уыцы лауреаттæн. Ирон æвзаг æмæ литературæйы ахуыргæнæг Козаты Иринæ йæ хæрзиуæг райста РХИ-йы Хицауады Сæрдар Пухаты Эрикы къухæй. Поэты номыл кадджын премитæ райстой Хацырты Альбинæ æмæ Цыбырты Анжелæ. Уыдонæн та ирон æвзагыл се ‘нувыддзинады тыххæй зæрдиаг арфæ ракодтой Хуссар Ирыстоны Тыбылты Алыксандры номыл паддзахадон университеты ректор Тедеты Вадим æмæ филологон наукæты кандидат, литературæиртасæг Плиты Гацыр. Уыдон загътой, хæрзиуджытæ лæвæрд кæмæн æрцыд, уыцы фæсивæд, æцæгæйдæр, ахуыры дæр, æхсæнадон куысты дæр фæзминаг кæй сты, æмæ сыл ацы хæрзиуджытæ ноджы стырдæр хæстæ кæй æвæрынц, разæнгардгæнæн базыртæ сыл кæй садзынц, уый, æмæ фæсивæд уыцы æууæнк кæй нæ фæсайдзысты, уымæй кадджын изæры архайджытæн фидар дзырд радтой. Джусойты Нафийы номыл преми райсыны конкурсы разæнгардæй кæй архайдтой, уый тыххæй хæрзаудæн фонд «Амонд»-ы Кады гæххæттытæ лæвæрд æрцыд зындгонд фыссæг æмæ публицист Цхуырбаты Мери æмæ æрыгон поэт Бестауты Аланæйæн. Челæхсаты Хъазыбег кадджын изæры архайджытæн æхсызгонæй загъта, Аланæ кæд нырма æрыгон у, уæддæр курдиатджын поэт кæй у, уый, æмæ йын ракодта æнæнхъæлæджы лæвар. Дзыллæйы рæгъмæ рахаста фонды хъæппæрисæй уагъд æмбырдгонд æрцыд, Аланæйы æмдзæвгæты фыццаг чиныг «Мæ удлæууæн — Ирыстон». Кадджын изæры архайджытæн, фонд «Амонд»-ы разамонджытæн зæрдиаг арфæ ракодта Нафийы хо, филологон наукæты кандидат, ЦИПУ-йы доцент Джусойты Клавдия. Уый загъта:

— Нафийы номæн æмæ курдиатæн аргъ чи кæны, уыдонæн се ‘ппæтæн дæр кæнын зæрдиаг арфæ. Уæлдай бузныджы ныхæстæ та мæ зæгъын фæнды РЦИ-Аланийы Сæргълæууæг Битарты Вячеславæн, РХИ-йы Президент Бибылты Анатолийæн, РЦИ-Аланийы Парламенты депутат Уататы Зелимæн, хæрзаудæн фонд «Амонд»-ы директор Челæхсаты Хъазыбегæн. Ацы лæппутæ хорз кæстæриуæг фæкодтой Нафийæн йæ царды фæстаг бонты онг, йæхæдæг дæр сæм дардта хæлар, æргом зæрдæ, хуыдта сæ йæ кæстæр æфсымæртæ. Æз уе ‘ппæтæй дæр куыд бузныг дæн, уый хуымæтæг ныхæстæй мæ бон зæгъын нæу, мæ бæсты уын Хуыцау арфæ ракæнæд, Нафи та не ‘ппæтыл дæр хæрзмæ аудæд. Кадджын изæры кæрон сæ аивадæй уазджыты, лауреатты зæрдæтæ барухс кодтой Хуссар Ирыстоны Галаты Барисы номыл паддзахадон ансамбль «Симд»-ы зарæггæнджытæ æмæ фæндырцæгъдджытæ. Мах дæр, газет «Рæстдзинад»-ы номæй ноджыдæр ма иу хатт зæрдиаг арфæ кæнæм, Хуссар Ирыстоны Джусойты Нафийы æмæ Плиты Грисы номыл паддзахадон премиты лауреаттæн, нæ цæст сын уарзы æнтыстдзинæдтæ царды, рухстауæн архайды æмæ сфæлдыстадон куысты!

 

ГАСАНТЫ Валери,

Цхинвал-Дзæуджыхъæу

ОСТАВЬТЕ ОТВЕТ

Please enter your comment!
Please enter your name here