Газет «Северная Осетия»-йы бæрæгбон

0
73

Республикон газет «Северная Осетия» сбæрæг кодта йæ 100 азы юбилей. Уыцы цауы фæдыл кадджын æмбырд ивгъуыд майрæмбоны сарæзтæуыд Ирон академион театры.

Фембæлдмæ æрбацыд бирæ адæм, фæлæ, кæй зæгъын æй хъæуы, æмбырды сæйрагдæр архайджытæ уыдысты, ныртæккæ газет чи уадзы, уыцы адæм — уацхæсджытæ, техникон кусджытæ, разамонджытæ æмæ иннæтæ, стæй, раздæры азты газеты редакцийы дзæвгар рæстæг чи бакуыста, уыцы ветерантæ. Йæ хъæздыг æмæ дæргъвæтин историйы рæстæг газет йæ ном цалдæр хатты аивта, фæлæ йын алкæддæр кад уыд адæмы ‘хсæн.

«Северная Осетия»-йы коллективы уæнгтæн сæ бæрæгбоны фæдыл раарфæ кæнынмæ æрбацыдысты РЦИ-Аланийы Сæргълæууæг Битарты Вячеслав, Цæгат Ирыстоны Парламенты Сæрдар Алексей Мачнев, РЦИ-Аланийы Хицауады Сæрдары хæдивæг — УФ-йы Президенты цур РЦИ-Аланийы Æххæстбарджын минæвар Дзанайты Барис, æндæр бæрнон кусджытæ. Фембæлды кадджын уазджытæй иу уыд Мæскуыйы М. Ломоносовы номыл паддзахадон университеты Телеуынынады уæлдæр скъолайы декан Виталий Третьяков. Театры фойейы уыцы бон куыста редакцийы бирæазон историйыл дзурæг къамты равдыст — экспозицийы æрмæджытимæ уазджыты зонгæ кодта «Северная Осетия»-йы сæйраг редактор Касаты Алан. Артисттæ та газеты юбилеймæ бацæттæ кодтой театрализацигонд цымыдисаг равдыст. Цæгат Ирыстоны Сæргълæууæг Битарты Вячеслав йæ арфæйы ныхасы куыд фæнысан кодта, афтæмæй «Северная Осетия» алкæддæр къæрцхъус у республикæйы царды ахсджиагдæр æхсæнадон-политикон цаутæм. «Газет бацæттæ кæнын æмæ йæ рауадзыны хъуыддаг хуымæтæг нæу. Уымæ гæсгæ мæ бузныг зæгъын фæнды, газеты редакцийы абон чи кусы, стæй дзы раздæры азты чи фыдæбон кодта, æппæт уыцы адæмæн. Уæлдай арфæйаг сты газеты ветерантæ — уыдонæй сæрбæрзонд у Цæгат Ирыстоны журналистикæ», — загъта Битары-фырт. Газеты юбилейы фæдыл коллективы кусджытæй цалдæрæн радтой хæрзиуджытæ. Цæгат Ирыстоны журналистикæмæ стыр бавæрæны тыххæй РЦИ-Аланийы Сæргълæууæджы Указæй «Северная Осетия»йы бæрнон секретарь Валентинæ Зыгинайæн лæвæрд æрцыд майдан «Ирыстоны Намыс»-æн. Цæгат Ирыстоны культурæйы сгуыхт кусæджы кадджын ном саккаг кодтой уацхæсджытæ Всеволод Рязанов æмæ Еленæ Толоконниковайæн. Республикæйы Сæргълæууæджы Арфæйы фыстæджытæ радтой инженертæ Алексей Петров æмæ Шалва Шармадинийæн. Цæмæй редакцийы кусджыты архайд æнтыстджындæр уа, уый нысанимæ та Битарты Вячеслав ног хæдтулгæйы дæгъæлтæ балæвар кодта сæйраг редакторæн.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here