Ног Бæтæхъойыхъæуы байгом культурæйы артдзæст

0
168

Ног азы къæсæрыл БИТАРТЫ Вячеславы кусæг балц Ирыстоны кадджындæр хъæутæй иу Ног Бæтæхъойыхъæумæ хуымæтæджы нæ уыд. Уым кадджын уавæры байгом кодтой ногарæзт Культурæйы хæдзары бæстыхай. Хъæубæсты цы 2889 адæймаджы цæры, уыдон ацы хорздзинадмæ бæллыдысты фондз æмæ ссæдз азæй фылдæр. Уал азы æнæ Культурæйы хæдзарæй цæрджытæ тухæнтæ кодтой. Сывæллæтты сфæлдыстадон къордты архайынмæ Беслæнмæ ласын алы бинонты къух, кæм та сæ рæстæг дæр нæ амыдта. Хъæубæсты цæрджыты фæндонмæ гæсгæ ацы артдзæстæн лæвæрд æрцыд сæ кадджын æмхъæуккаг, УФ-йы æмæ РЦИ-Аланийы адæмон артист, Ирон театры зæрингуырд, кинойы артист Уататы Бибойы кадджын ном. Уыцы хъуыддагæй равдыстой сæ уарзондзинад Ирыстоны хъæбулмæ, сæнусон ын кодтой йæ рухс ном дарддæры фæлтæртæн.

Бæрæгбоны архайдтой РЦИ-Аланийы культурæйы министр Милдзыхты Руслан, Рахизфарсы районы администрацийы минæвæрттæ, бынæттон цæрджытæ æмæ дзыллон хабархæссæг фæрæзты минæвæрттæ. Битарты Вячеслав арфæ ракодта, ацы хъуыддагыл зæрдиагæй чи бакуыста, уыдонæн номæй-номмæ. — Ацы хъæуæй рацыд бирæ кадджын адæм, æмæ сын кæстæртæ сæ кадыл кад куыд æфтауой, царды размæцыд æмæ æнтыстджын куыд уой, Хуыцау уый зæгъæд! — загъта Битарты Вячеслав æмæ районы бынæттон хиуынаффæйады администрацийы сæргълæууæг Фрайты Сослан æмæ хъæубæсты кæстæртимæ алыг кодтой сырх лент. Уыцы нысанхæссæг уысмæй байгом Культурæйы хæдзары историйы фыццаг сыф. Хъæубæсты хистæр Чыпыраты Ирбег цæрджыты номæй бузныг загъта нæ бæстæйы Президент Владимир Путинæн, Битарты Вячеславæн, районы разамындæн æмæ, бæстыхай афойнадыл чи сарæзта, уыцы хъазуатон кусджытæн. Культурæйы хæдзары залы ис 300 бынаты. У райдзаст æмæ зæрдæмæдзæугæ. Ифтонг у хъæугæ дзаумæттæй. Йæ директор Берозты Риммæ куыд загъта, афтæмæй дзы уыдзæн кафджыты, фæндырдзæгъдджыты, далафæндырæй цæгъдджыты къордтæ, сфæлдыстадон изæртæ. Йæ бæллиц у, хъæуы хистæр кары цæрджытæ кæм архайой, ахæм адæмон зарæггæнджыты къорд байгом кæнын. Культурæйы министр ныфс бавæрдта, уадынгæрзтæ сын кæй самал кæндзæн, уымæй. Бæрæгбоны кадджын уазджытæ уыдысты Уататы Бибойы хо Токаты-Уататы Азæ æмæ Бибойы чызг Зæлинæ. Битарты Вячеслав æмæ хъæуы бынæттон хиуынаффæады администрацийы сæргълæууæг Куыдзиаты Ацæмæз æрзылдысты бæстыхайыл æмæ федтой, арæзтадон куыстытæ хъæугæ уагыл æххæстгонд кæй æрцыдысты, уый. Уый фæстæ Битарты Вячеслав районы алы къабæзты хуыздæр кусджыты схорзæхджын кодта кадджын нæмттæ, Кады æмæ Арфæйы гæххæттытæй. РЦИ-Аланийы хъæууон хæдзарады сгуыхт кусæджы номæй хорзæхджынгонд æрцыдысты кооператив «Ирбис»-ы механизатор Хъуылымбегты Витали æмæ кооператив «Дон»-ы бригады разамонæг Мæргъиты Юри. Кады гæххæттытæ райстой районы клиникон рынчындоны дохтыр Бтемыраты Аллæ, районы администрацийы хайæдты сæргълæуджытæ Дзампаты Бэлæ æмæ Лолаты Азæ. Республикæйы Сæргълæууæджы Арфæйы гæххæттытæ райстой: кæсагдарæн хæдзарад «Брут»-ы кæсагдар Бадриаты Ерик, Санайы-фырты номыл колхозы механизатор Борис Джорджикашвили, сæйраг инженер Хъараты Владимир, Беслæны 16-æм рæвдауæндоны хицау Еленæ Киселева, Беслæны 5-æм скъолайы географийы ахуыргæнæг Торчынты Людмилæ. Ирыстоны зындгонд артисттæ, районы сфæлдыстадон къордтæ равдыстой зæрдæмæдзæугæ концерт. Æмбæрзæн байгом! ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here