«Рæстдзинад»-ы газеткæсджытæм

0
28

Нæ зынаргъ хæлæрттæ, не ‘мцæдисонтæ, «Рæстдзинад»-ы иузæрдион газеткæсджытæ! Сымах афæдзы дæргъы истат æмæ кастыстут «Рæстдзинад». Уæ нымæц уыдис фондз минмæ хæстæг, æмæ уын редакци зæрдиаг арфæтæ кæны, нæ ныфсдæттæг æмбæлццонтæ, нæ фарнхæссæг, нæ хурæмдых æмцæдисонтæ! Ног аз уыл уæнгрог æмæ зæрдæрухсæй æрцæуæд уæ бинонтимæ, уæ уарзон адæмимæ. Ног азы уæ рухс фæндтæ уæ къухы бафтæнт. Мах, редакцийы кусджытæ, стæм уæ рухс хъуыдытæ, уæ сагъæстæ, уæ бæллицтæ æхсæнадмæ, гæнæн æмæ амалæй, раст æмæ æргомæй хæсджытæ. Сымах та, фондз минмæ хæстæг — нæ адæмы фарн хæссæг æмцæдисонтæ, ирон æвзагыл иузæрдион уæвджытæ, зæгъæн ис, нæ иумæйаг адæмон газет дарджытæ, æмæ Хуыцау, стæй фидæны фæлтæрæй арфæгонд уыдзыстут. Мах æй зонæм, газеткæсæг у карз, домаг, фæлæ фылдæр хатт раст æмæ цæстуарзон тæрхонгæнæг. Махмæ, редакцимæ, сымахæй, нæ газеткæсджытæй, æрбадзурынц бирæтæ. Фæзæгъынц сæ хъуыдытæ æргом æмæ цæстуарзонæй. Уæлдай фылдæр дзæнгæрджытæ та нæм æрбацæуы Ног азы хæдразмæ. Газеткæсджытæ фæзæгъынц, цæй тыххæй сæ фæндид бакæсын æрмæджытæ ног азы газет «Рæстдзинад»-ы. Нæ зынаргъ газеткæсджытæ, царды къуылымпытæ аиуварс кæныны хъæугæ мадзæлттæ сымахæй цæуынц æмæ та ныр дæр ма бавгъау кæнут уæ цыргъзонд æмæ арф хъуыдытæ, ма та бавгъау кæнут уæ диссаджы фæндæттæ, газеты уæ арæхдæр бакæсын цæй фæдыл фæнды, уыцы хъуыдытæ. Мах та, редакцийы кусджытæ, æрвылбон дæр архайдзыстæм ууыл, цæмæй уæ куырдиæттæ æмæ уæ фæндæттæ æвдыст цæуой газеты фæрстыл. Сымахæй уæ алчидæр газет кæй кæсы, уымæй архайы не ‘взаг бахъахъхъæныныл, йæ зæлланггæнаг уаз мыртæ йын фидæны фæлтæртæм фæхæссыныл. Алчидæр уæ архайы ирон дзырды фарн, ирон ныхас кæстæртæм адæттыныл. Фæлæ абоны уавæрты уыцы хъуыддагæн фондз мин цæдисоны, куыд уынæм, афтæмæй фаг нæу. Æхсæнадон транспорты сбадгæйæ кæнæ æндæр æхсæнадон бынæтты æрмæст искуы иу хатт фехъусæм ирон ныхас, уæлдайдæр та, бынтон æвзонг сабитимæ нæ хистæртæ куы фæдзурынц, уæд. Мах, ирон адæмон газет «Рæстдзинад»-ы фæрцы не ‘взаг хъахъхъæнджытæ стæм. Æмæ ма нæ алкæцы дæр йе ‘мбæлтты, йæ сыхæгты, йæ мыггаг, йæ къабæзты æхсæн иудыууæ цæдисоны куы ссарид, уæд нæ тых, нæ хъарутæ фæдывæр уаиккой æмæ арфæйаг уаиккам нæ сомбоны фæлтæрæй. Æрмæстдæр 133 сомы хъæуы иу мæймæ газет рафыссынæн. Ау, сымах, нæ зынаргъ газеткæсджытæ, куы нæ бахæлæг кодтат иу мæйæн 133 сомы, уе ‘взагыл цы газет цæуы, уымæн, уæд, цы цæдисон æмбæлттæ агурат, уыдон уын разыйы дзуапп нæ ратдзысты?! Махмæ гæсгæ, ратдзысты. Æмæ уæд, сымах фæрцы æмдых, æмхъару, æмзондæй дарддæр дæр архайдзыстæм нæ сагъæстæ, нæ бæллицтæ, нæ цард æвдисæг æцæг хъуыддæгтæ газеты нæ мадæлон æвзагыл дарддæр мыхуыр кæныныл, кæй зæгъын æй хъæуы, сымах æмæ æрмæстдæр сымах æххуысæй! Ма бавгъау кæнут мæймæ 133 сомы газет «Рæстдзинад» рафыссынæн. Газет «Рæстдзинад»-ы иузæрдион хæлæрттæ, сымах хорз æмбарут, республикæйы Сæргълæууæг Битарты Вячеслав ирон æвзаг æмæ ирондзинад, ирон æгъдæуттæ æмæ адæмы фарн бахъахъхъæнынмæ цы стыр æргом здахы, уый. Ууыл дзурæг у, Дзæуджыхъæуы ирон æвзагыл ахуыр кæныны интернат кæй байгом кодта, уый дæр. Йæ фарсмæ æрбалæууын та у республикæйы æппæт муниципалон арæзтыты разамонджыты хæс, махæн не ‘ппæты хæс дæр, æмæ равдисæм нæ иудзинад не ‘взаг, нæ сомбон, нæ фидæны сæраппонд! Йæ сæххæст кæнынæн та нын стыр ныфс стут сымах, нæ иузæрдион газеткæсджытæ!

ОСТАВЬТЕ ОТВЕТ

Please enter your comment!
Please enter your name here