Ног азы арфæтимæ — Зæрæдты хæдзармæ

0
219

Знон РЦИ-Аланийы Сæргълæууæг БИТАРТЫ Вячеслав æмæ фæллой æмæ социалон рæзты министр ХЪЕСАТЫ Игорь ног азы арфæтæ æмæ лæвæрттимæ бабæрæг кодтой Ацæргæ адæмы æмæ инвалидты хæдзар-интернат «Забота»-йы цæрджыты. Паддзахады æвджид ацы ран цы 62 адæймаджы ис, уыдонæн ис æппæт хъæугæ уавæртæ дæр нывыл цардæн. Афæдзæйафæдзмæ дзы ноджы хъæздыгдæр æмæ мидисджындæр кæнынц хистæрты хиирхæфсæн фадæттæ дæр.

«Забота»-йы директор Хъæцмæзты Фатимæ Битарты Вячеславæн радзырдта, куыд æмæ, цы уавæрты цæрынц зæрæдтæ, уый тыххæй. — Хорз цæстдард сæм цæуы. Алы фадæттæ дæр сын ис, цæмæй иучысыл уæддæр хъæлдзæгдæрæй сæхи æнкъарой, уымæн. Сывæллæттæн цы къордтæ вæййы, ныв кæныны, къухæй ми кæныны, зарыны æмæ æндæртæ, ахæм къордтæ сын мах дæр байгом кодтам, цæмæй сæхи ирхæфсой истæуыл. Æрыгон мультипликатор Кцойты Анжелæ архайы нæхи фысджыты уацмыстæм гæсгæ ирон мультфильмтæ исыныл æмæ нын æрæджы нæ зæрæдты дæр йæ проекты архайынмæ фæхуыдта. Æрбацыд нæм студенттимæ, æмæ дыууæ мæйы дæргъы нæ хистæртæ мультфильмтæ «Æрра фыййау»-ы хъайтарты фæлгонцтæ сæхи къухтæй алы æрмæгæй скодтой. Уыцы мультфильмæн кæнæм презентаци дæр. 13 январы нæ республикæйы, театр «Саби»-йы, уыдзæн анимацион кинойы фестиваль æмæ нæ куыст уым дæр равдисдзыстæм, — загъта Хъæцмæзты Фатимæ. Битарты Вячеслав æмæ Хъесаты Игорь æрзылдысты Зæрæдты хæдзары агъуыстытыл æмæ сæхи цæстæй федтой, куыд цæрынц ацы ран зæронд адæм, уый. Хъæцмæзты Фатимæ ма куыд радзырдта, афтæмæй 62 адæймагæн сæ 90 проценты сты, кæддæр сидзæр сывæллæтты хæдзар «Ласка» куы байгом, уæд, Уæрæсейы алы рæттæй Ирыстонмæ цы сидзæр ноггуырдтæ æрластой, уыцы сабитæ. Æстдæсгай азтæ сыл куы сæххæст, уæд дзы фыццаг къорды инвалид чи уыдис, уыдоны Зæрæдты хæдзармæ æрбарвыстой, æмæ 20 — 30-гай азтæ цæрынц ам. Нæ республикæйы Сæргълæууæг федта, кæрты цы ног бæстыхæйтты арæзтад цæуы, уый дæр. Ацы арæзтадæн сын Уæрæсейы Пенсион фонд æмæ нæ республикæйы разамынд радих кодтой 43 милуан сомы. Æмæ йæ сæйраг куыстытæ æххæстгонд фесты. Бæстыхай уыдзæн 76 адæймагæн, æмæ хъуамæ ацы азы кæронмæ арæзтадон организацитæ сæ куыст фæуой. Республикæйы Сæргълæууæг æрмæст не сразы арæзтады æмгъуыдимæ æмæ Хъесаты Игорь æмæ Хъæцмæзты Фатимæйæн бафæдзæхста афæдзы кæронæй раздæр объекты арæзтад фæуын. Битарты Вячеслав Зæрæдты хæдзары фадæттæ æмæ уавæртæй разыйæ баззад, фæлæ уæддæр йæ хъуыды æргом загъта, Ирыстоны ахæм «хæдзæрттæ» æгады, худинаджы хъуыддæгтæ кæй сты.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here