Сывæллæтты клиникон рынчындоны ног бæстыхай цæттæ у

0
164

Уæрæсейы Федерацийы Президенты майы Указты медицинон къабазы кусджытæн мызд фидыны хъуыддаджы цы нысантæ æвæрд уыд, уыдон 2017 азы æххæстгонд æрцыдысты. Уый тыххæй РЦИАланийы Сæргълæууæг БИТАРТЫ Вячеславимæ йæ кусæг фембæлды рæстæг фехъусын кодта республикæйы æнæниздзинад хъахъхъæнынады министр Михаил РАТМАНОВ.

Уымæй уæлдай, министр куыд радзырдта, афтæмæй 2018 азы республикон бюджеты снысан кодтой æмбæлгæ фæрæзтæ Президенты майы Указтæ æххæст кæнынæн. Уыцы æууæл хыгъд æрцыд ацы азæн Æнæмæнг медицинон фæдзæхстады фонды бюджеты дæр. Михаил Ратманов бæстон æрлæууыд, республикæйы æнæниздзинад хъахъхъæнынады къабазы лыггæнинаг фарстатæ аиуварс кæныныл цы куыст цæуы, ууыл. Зæгъæм, ныридæгæн цæттæ у Сывæллæтты республикон клиникон рынчындоны хæцгæ низты хайады ног бæстыхай. Министры ныхасмæ гæсгæ, хæцгæ низты хайады кусджытæ æмæ рынчынты январы кæронмæ раивдзысты æппæт хъæугæ медицинон техникæйæ ифтонггонд ног бæстыхаймæ. — Куыд зонæм, афтæмæй ацы объекты арæзтад тынг ныддæргъвæтин, арæзтадæн фаг æхца лæвæрд нæ цыд, подрядон организациты дæр раивбаив кодтой. Афтæмæй уавæр къуырцдзæвæнмæ æрцыд. Æппæт уыцы æууæлтæ хынцгæйæ, нæ материалон æмæ финансон гæнæнтæ æрбамбырд кæныныл бацархайдтам æмæ уыцы ахсджиаг объекты арæзтад кæронмæ ахæццæ кодтам. Нæ сывæллæтты нын кæм дзæбæх кæнынц, уыцы кусæндоны архайдыл ногдзинад хорзæрдæм кæй сахаддзæн, уый дызæрдыггаг нæу, — йæ раныхасы фæбæрæг кодта Цæгат Ирыстоны Сæргълæууæг. Министр дарддæр куыд радзырдта, афтæмæй хæстæгдæр рæстæг радих кæндзысты, ноггуырд сывæллæтты æдасæй ласæн кувез æвæрд кæм уыдзæн, ахæм хæдтулгæ. Уыцы техникон фæрæз зынгæ фæхъомысджындæр кæндзæн æппæты чысылдæр рынчынтæн медицинон æххуысы къæпхæн, уымæн æмæ арæх ноггуырдты æвæстиатæй ласын бахъæуы реанимацимæ. — Нæ республикæйы азы дæргъы вæййы 200 ахæм цауы бæрц. Ныр дохтыртæн фæзындзæн тыхст сывæллонæн æвæстиатæй баххуыс кæныны фадат, — бафиппайдта Михаил Ратманов. Министры нахасмæ гæсгæ, 2017 азы сывæллæтты мæлынады къæпхæн фæкъаддæр. Республикæйы æнæниздзинад хъахъхъæнынады къабазы нывылдзинадыл дарддæр дæр бæстон куыст цæудзæн. Фембæлды архайдта Цæгат Ирыстоны Хицауады Сæрдар Тускъаты Таймураз.

ОСТАВЬТЕ ОТВЕТ

Please enter your comment!
Please enter your name here