Аккаг ӕвӕрӕн

0
74

Аккаг ӕвӕрӕн
Нӕ фыдӕлты цард фидар баст уыд алфамбылай ӕрдзимӕ. Хӕхбӕсты цы дидинджытӕ ӕмӕ кӕрдӕджытӕ задис, уыдоны нӕмттӕ канд зонгӕ нӕ кодтой, фӕлӕ ма арӕхстысты алыхуызон низты ныхмӕ сӕ хостӕ кӕнынмӕ, кӕцыдӕртӕ та сын уыдысты хӕрынӕн бӕзгӕ зайӕгойтӕ. Фӕлӕ, ивгъуыд ӕнусы ссӕдзӕм азтӕй фӕстӕмӕ нӕ адӕм бирӕгӕйттӕй хӕхбӕстӕй быдырмӕ лидзын кӕй райдыдтой, уымӕ гӕсгӕ фӕлтӕрӕй-фӕлтӕрмӕ зайӕгойты нӕмттӕ ферох кодтам, абон хъӕутӕ ӕмӕ горӕттӕм ӕввахс уыдон кадавардӕр кӕй сты, уый тыххӕй. Хъӕугӕ та нӕ уымӕн кӕнынц, ӕмӕ сты нӕ царды бындур. Зӕххыл цы ис, уыцы ӕппӕт организмтӕн уавӕртӕ аразӕг. Ахуыргонд-биолог Къорнаты В. бӕрӕггӕнӕнтӕм гӕсгӕ, ӕрмӕст Цӕгат Ирыстоны территорийыл ис 2018 дидинӕгкалӕг зайӕгойы. Цӕуылнӕ хъуамӕ зонӕм уыдоны ӕппӕт ирон нӕмттӕ, цӕмӕй сӕ ныууадзӕм нӕ фӕстагӕттӕн.
Ацы хъуыддаг сраст кӕнынмӕ ныфсджынӕй бавнӕлдта техникон наукӕты кандидат Цгъойты Таймураз. Фӕлӕ райдайӕнӕй фӕстӕмӕ сӕмбӕлд стыр цӕлхдуртыл. Ныртӕккӕ уавӕр афтӕ у, ӕмӕ дын канд ӕрыгӕттӕй нӕ, фӕлӕ ма хистӕр фӕлтӕрты минӕвӕрттӕй дӕр бирӕтӕ нӕ зӕгъдзысты, иу кӕнӕ иннӕ зайӕгойтӕ нӕ мадӕлон ӕвзагыл цы хуыйнынц, уый.
Ирон ахуыргонд-биологтӕй ацы фарстайыл ныронг чи куыста, уыдонӕн та сӕ наукон фӕллӕйттӕ сты уырыссаг ӕвзагыл фыст, ӕмӕ стӕмтӕй фӕстӕмӕ зайӕгойты нӕмттӕ иронау лӕвӕрд нӕ цӕуынц. Уымӕ гӕсгӕ ныртӕккӕ ӕрмӕстдӕр сӕ иучысыл хайӕн ис ирон нӕмттӕ. Цы литературон гуырӕнтӕй пайдагонд ӕрцыд, уыдонӕй хатдзӕгтӕ куы кӕнӕм, уӕд уӕлдӕр амынд бӕрцӕй 290 зайӕгойӕн разынд ирон нӕмттӕ.
Ахӕм уавӕрты кусгӕйӕ, Цгъойты Таймуразмӕ разынд ӕцӕг наукон кусӕджы стыр зӕрдӕргъӕвддзинад . Арӕхстджынӕй пайда кӕнын ӕй бахъуыд алыхуызон дзырдуӕттӕй, хицӕн авторты наукон куыстытӕй, цӕмӕй ссардтаид алыхуызон зайӕгойты ирон нӕмттӕ. Уыдон сты Константин Поповы чиныг «Мир растений Северной Осетии», Цагъаты Анастасияйы наукон куыст «Топонимия Северной Осетии», бирӕтомон рауагъд «Природные ресурсы РСО-Алания», Олисаты Влади- мир ӕмӕ Владимир Вагины чиныг «Родник здоровья», ӕндӕр литературон гуырӕнтӕ, ӕмӕ ивгъуыд аз рауагъта, 1843 зайӕгойы ирон нӕмттӕ амынд кӕм ӕрцыдысты, ахӕм «Ирон-уырыссаг экологон дзырдуат»-ы фыццаг чиныг. Ахӕм алывӕрсыг наукон-иртасӕн фӕллойыл ӕнцон бакусӕн кӕм уыдаид. Автор ахсджиагыл банымадта йӕ чиныгӕн ирон ӕвзаджы дыууӕ диалектыл дӕр ӕрмӕг ӕрӕмбырд кӕнын. Уымӕн ӕмӕ иу кӕнӕ иннӕ зайӕгой Ирыстоны алы кӕмтты ӕмӕ ныхасыздӕхтыты хатгай вӕййы бынтон ӕндӕрхуызон дзырд. Зӕгъӕм, уырыссаг «подсолнечник»-ӕн нӕм ис ахӕм ӕмсӕр дзырдтӕ: ӕхсынӕн, хурмӕзилӕг, хурмӕзил, сонхура, ӕхсинӕн, галыцӕст, сохуран, семичкӕ; «ромашкӕ» та тӕлмацгонд цӕуы, куыд ӕхсынкъмарӕн, риухосгӕрдӕг, гуырбыл, ӕхсынчъы хос, гуирила, къеренӕг, реухуас- гӕрдӕг, саскмарӕн.
Кӕцыдӕр зайӕгойтӕн нӕ баззад сӕ ирон нӕмттӕ, кӕд раздӕр уыдаиккой, уӕддӕр. Уымӕ гӕсгӕ чиныгаразӕг спайда кодта сӕ уырыссаг нӕмттӕй ирон ӕвзагмӕ тӕлмацгондӕй. Уыдон та уымӕй размӕ равзӕрдысты латинаг кӕнӕ грекъаг нӕмттӕй. Зӕгъӕм, зайӕгой «дрема» ӕмӕ «дреммиг» афтӕ амонынц, ӕмӕ раздӕр ацы зайӕгойтӕн райхӕлынц сӕ дӕллаг дидинджытӕ, уӕллӕгтӕ та ма къуыбыртӕ вӕййынц. Афтӕ ӕнхъӕлӕн вӕййы, цыма уыдон фынӕй кӕнынц.
Ардыгӕй латинаг дзырд «melandium» ирон ӕзагмӕ тӕлмацгондӕй амоны «фынӕй кӕнын». Уырыссаг-ирон экологон дзырдуат»-ы уый тыххӕй фыст ӕрцыдысты: ирон диалектыл — «рӕдзӕ- мӕдзӕ», дыгуроныл — «рӕхцун». Уымӕ гӕсгӕ зайӕгой «дрема»-йы ирон ном у «рӕхцунӕг», «дремлик»-ы — «рӕдзмӕдзӕг». ӕндӕр дӕнцӕг куы ‘рхӕссӕм, уӕд зайӕгой «дрок»-ы ном равзӕрд дзырд «тонын»-ӕй. Автор ӕй уый тыххӕй схуыдта «тонӕг», ӕмӕ ирон ӕвзаджы дзӕбӕх кӕй сфидыдта, ууыл ныхас дӕр нӕй.
Цгъойты Таймуразы чиныджы фыццаг хайы хорздзинад ма уым ис, ӕмӕ зайӕгойты нӕмтты дзырдуатон уацтӕ лӕвӕрд цӕуынц уырыссаг ӕмӕ ирон ӕвзӕгтыл. Иу кӕнӕ иннӕ зайӕгойы тыххӕй базонӕн вӕййы бӕлвырд бӕрӕггӕнӕнтӕ. Зӕгъӕм, «персик» — алтъами кӕнӕ атъами. У сасирхуыз сыфджын бӕлас. Йӕ дидинджытӕ вӕййынц ӕнӕдидинкъах, уардихуыз кӕнӕ сырх, фӕзынынц сыфтӕр ракалыны размӕ.
Ахӕм хуызы амынд цӕуынц ӕндӕр зайӕгойтӕ дӕр. Иу кӕнӕ иннӕ дзырд ӕнцондӕр ссарӕн цӕмӕй уа дыууӕ ӕвзагыл дӕр, уый тыххӕй чиныджы дыккаг хайы ис «Зайӕгойты нӕмтты ирон-уырыссаг дзырдуат» дӕр. Зайӕгойтӕ фӕйнӕхуызон кӕй сты, уый тыххӕй чиныджы ис «Хуызты нӕмтты ирон-уырыссаг дзырдуат» дӕр. Фӕлӕ иу кӕнӕ иннӕ зайӕгойтӕ цавӕртӕ сты, уый ӕрмӕст сӕ бӕрӕггӕнӕнтӕ бакӕсынӕй базонӕн нӕй. Уымӕ гӕсгӕ автор хорз бакодта, «Зайӕгойты бындурон хуызты къамтӕ» йӕ чиныджы хицӕн хайы кӕй рауагъта, уымӕй.
Фӕлӕ Цгъойты Таймураз наукон кусӕг нӕ уыдаид, цы ахсджиаг фӕллой райдыдта, уый ӕрдӕгыл куы ныууагътид, уӕд. Абон уавӕр афтӕ у, ӕмӕ зайӕгойты хуызӕн мах нал зонӕм хъӕддаг сырдты, мӕргъты, кӕсӕгты, ӕндӕр цӕрӕгойты нӕмттӕ дӕр. Уымӕ гӕсгӕ ахуыргонды бахъуыд «Ирон-уырыссаг экологон дзырдуат»-ыл дарддӕр бакусын, ӕмӕ ӕрӕджы рацыд ацы рауагъды дыккаг чиныг «Цӕрӕгойты нӕмтты уырыссаг-ирон дзырдуат». Чиныджы разныхасы автор дзуры, зӕгъгӕ, зайӕгойты хуызӕн цӕрӕгойты ахадындзинад дӕр стыр у ӕрдзӕн. Уыдон рыгдзагъд кӕнынц зайӕгойты, ӕмӕ сӕ кӕцыдӕрты мыггӕгтӕ пырх кӕнынц не ‘рдзон алыварсы. Бактериты хуызӕн къӕвдайы уаллӕттӕ, мӕлдзыджытӕ ӕмӕ ӕндӕр лыстӕг цӕрӕгойтӕ иудадзыг органикон буаргъӕдтӕ хӕссынц мӕрмӕ, цъӕх зайӕгойтӕ холлаг сты, кӕрдӕгӕй чи цӕры, уыцы цӕрӕгойтӕн, уыдон та сӕ рады — тугдзыхтӕн.
Иу ныхасӕй, алцыдӕр ӕнгом баст у ӕрдзы. Мах афтӕ ӕнхъӕл стӕм, ӕмӕ Цгъойты Таймуразы дыккаг чиныг «ӕхсырӕйхӕсгӕты нӕмтты уырыссаг-ирон дзырдуат ӕмӕ сӕ цыбыр миниуджыты ӕрфыст» стыр ӕххуыс фӕуыдзӕн цӕрӕгойты дуне хуыздӕр базонынӕн. Фыццаджыдӕр та, нӕ зӕгъын фӕнды: Цӕгат Ирыстоны территорийы, кӕрдӕгӕй чи цӕры, ахӕм цӕрӕгойтӕ ис 86 хуызы. Фӕлӕ адонӕй ӕрмӕстдӕр 66 сӕ нӕмттӕ иронау фыст ӕрцыдысты литературон гуырӕнты. Махмӕ цӕрӕг мӕргъты 308 хуызӕн та суанг се ‘ртӕ цыппӕрӕм хайӕн дӕр нӕй ирон нӕмттӕ.
Уымӕй ӕвзӕрдӕр зонӕм кӕсӕгты, алыхуызон хилджыты, уырынгонты, ӕндӕр къласты цӕрӕгойты нӕмттӕ дӕр, уыдоны нӕ республикӕйы цӕрӕгойты дунеиртасӕг ахуыргӕндтӕ сӕ наукон фӕллӕйтты ирон ӕвзагыл кӕй нӕ фӕнысан кодтой, уый тыххӕй. Фӕлӕ Цгъойты Таймураз нӕ фӕтарст ахӕм ӕмӕ ӕндӕр цӕлхдурты сӕрты ахизынӕй. «Зайӕгойты нӕмтты уырыссаг-ирон дзырдуат» аразгӕйӕ куыд уыдис, афтӕ ныр дӕр спайда кодта иу кӕнӕ иннӕ цӕрӕгойты нӕмттӕ ӕндӕр ӕвзӕгты куыд сты, уымӕй, ӕмӕ сӕ уырыссагӕй тӕлмац кӕны ирон ӕвзагмӕ. Зӕгъӕм, лангур — даргъкъӕдзилӕг, кӕнӕ тӕнӕгбуарон маймулиты бинонтӕй маймули. Хӕры зайӕгойты сыфтӕ. Куы нӕ йӕм цӕуай ӕввахс ӕмӕ дзы куы нӕ хынджылӕг кӕнай, уӕд нӕ лӕбуры адӕймагмӕ. Фылдӕр хатт даргъкъӕдзилӕгтӕ, ахуыргӕндтӕ ма сӕ хонынц тӕнӕгбуарон маймулитӕ, аразынц дзугтӕ. Ном «лангур» цӕуы дзырд «Iungooi»-ӕй. Уый хиндиаг ӕвзагыл амоны «даргъкъӕдзилӕг».
Дзырдуатыл кусгӕйӕ, автор сӕмбӕлд ӕндӕр зындзинӕдтыл дӕр. Хицӕн цӕрӕгойтӕн алы кӕмтты ӕмӕ литературон ӕрмӕджыты ис алыхуызон нӕмттӕ. Зӕгъӕм, «ягуар»-ӕн ирон ӕвзаджы ис ахӕм нӕмттӕ: ӕгуар, мысы, фыранк, фӕранк, мусу, мусуй фӕланк, ягуар. Уымӕй уӕлдай «белка» хуыйны ӕхсӕрӕг, ӕхсӕрсӕттӕг, тин, арг, тыртына, тӕхсалӕ, тӕхсалаг, тӕхсал, ӕхсӕруӕг, туртуна.
Фӕстаг азты Цӕгат Ирыстоны территорийы бӕрӕггонд ӕрцыд ӕхсырӕйхӕсгӕты (ӕнӕ хӕдзары цӕрӕгойтӕй) 86 хуызы. Адонӕй ирон нӕмттӕ ис 66 цӕрӕгойӕн. Кӕцыдӕртӕн ирон ӕвзаджы ис алыхуызон нӕмттӕ.
Ахсджиаг у, дыккаг чиныджы «Ирон-уырыссаг ӕхсырӕйхӕсгӕты нӕмтты дзырдуат кӕй ис, уый дӕр. Стыр дамгъӕтӕй амынд цӕуынц бындурон цӕрӕгойты нӕмттӕ, курсивӕй та мыхуыргонд сты литературон гуырӕнты амынд ӕндӕр нӕмттӕ. Уый фадат дӕтты, дзырд цы нысан кӕны, уый тагъддӕр ссарынӕн. Зӕгъӕм, даргъбазыр хӕлынбыттыр — длиннокрыл обыкновенный, хъисуыр ондатра или крыса мускуснай; чобӕсаг—кабарга.
Дыккаг чиныджы дыккаг хайы ис «Мӕргъты нӕмтты уырыссаг-ирон дзырдуат» дӕр. Ардӕм автор бахаста мӕргъты 644 хуызы. Адонӕй Цӕгат Ирыстоны территорийы цӕры 308 хуызы. Фӕлӕ ӕрмӕстдӕр 70 хуызӕн ис нӕмттӕ ирон ӕвзаджы. Уымӕ гӕсгӕ чиныджы автор ахъаззаджы фӕллой бакодта уыдоны нӕмттӕ дӕр сбӕрӕг кӕныны тыххӕй. Дӕнцӕг: альбатрос — сиахъон, кӕнӕ альбатрос — денджызы уари; бекас — мӕга кӕнӕ даргъбырынкъ доны ацц; беркут — дурдзӕгӕс, кӕнӕ цӕргӕс, дордзӕргӕс, тъыфылцӕргӕс — ӕппӕты стырдӕр цӕргӕс; дудак-дудахъ — стыр гогызы ӕмиас; лидзӕг мӕргъты хицӕн мыггаг.
Хъыгагӕн, мах хъӕддаг сырдты, мӕргъты хуызӕн ӕвзӕр зонӕм кӕсӕгты, донзӕххон цӕрӕгойты, саскты, хӕлуарӕгхуызты ӕмӕ фӕлмӕнбуар цӕрӕгойты нӕмттӕ, ӕмӕ сӕ алкӕцытӕн дӕр Цгъойты Таймуразы дыккаг чиныджы хицӕн хӕйтты сты уырыссаг-ирон ӕмӕ ирон-уырыссаг дзырдуӕттӕ. Фӕлӕ афтид хус ныхӕстӕй ӕрдзон уавӕрты базонӕн нӕй цӕрӕгойты дӕр. Уымӕ гӕсгӕ алы дзырдуаты фӕстӕ дӕр хицӕнӕй лӕвӕрд цӕуынц сӕ хуызджын къамтӕ, ӕмӕ уый алкӕмӕндӕр фадат дӕтты сӕ бахъуыды кӕнынӕн.
Авторы наукон ӕнтыстдзинад уым ис, ӕмӕ ныр махӕн гӕнӕн фӕцис зайӕгойты ӕмӕ цӕрӕгойты ирон нӕмттӕ ӕххӕстдӕрӕй сахуыр кӕнынӕн. Стыр ӕххуыс фӕуыдзӕн, ботаникӕ ӕмӕ зоологи чи ахуыр кӕны, уыцы скъоладзаутӕ ӕмӕ студенттӕн нӕ алфамбылай ӕрдзон алыварсы зайӕгойты ӕмӕ цӕрӕгойты дуне хуыздӕр базонынӕн. Уымӕй уӕлдай Цгъойты Таймураз цы дзырдуӕттӕ сарӕзта, уымӕй аккаг ӕвӕрӕн бахаста ирон лексикографимӕ дӕр. Уымӕн та ис историон ахадындзинад.

ТОХСЫРТЫ Къоста

ОСТАВЬТЕ ОТВЕТ

Please enter your comment!
Please enter your name here