«Классиктæ» рамбылдтой æртæ хæрзиуæджы

0
206

 

Мæскуыйы ивгъуыд къуыри грекъаг-ромаг (классикон) хъæбысхæстæй цыдысты Уæрæсейы фыццаг бынат бацахсыныл ерыстæ фæсивæды (23-аздзыдты) æхсæн.

Ирыстоны «классиктæ» (афтæ хонынц сæхи раздæрау грекъаг-ромаг хъæбысхæцджытæ) Мæскуыйы рамбылдтой иу сыгъзæрин æмæ дыууæ бронзæ майданы.

Нæ богæлттæй фыццаг хорзæхджын ссис тренертæ Хæтæгты Аслан, Фæрниаты Сослан æмæ Хъазыбеджы хъомылгæнинаг Джиоты Дмитри. 77 кг онг уæзы хæцгæйæ, Дмитри æрдæгкæронбæттæны фембæлд Исмаил Саидхасановимæ. Сæ ныхмæлæуд ахицæн 5:5 хыгъдæй, фæлæ уæлахиз лæвæрд æрцыд цæцæйнаг богалæн, куыд фæстаг балл рамбулæгæн. Афтæмæй ма Джиойы-фыртæн фадат уыд æрмæстдæр æртыккаг бынат рамбулыныл бацархайынæн. Дмитри уыцы фадатæй спайда кодта æмæ рацыд æртыккаг бынатмæ.

Æрдæгуæззау уæзы (97 кг) сæрæн хæст ракодта Гаглойты Вахтанджы хъомылгæнинаг Беккуызарты Руслан. Вахтанг куыд зæгъы, афтæмæй ацы ерыстæй чысыл раздæр Руслан ахуырты рæстæг йæ уæраг ныццавта æмæ ерысты райдайæнмæ бынтон дзæбæх нæма уыд. «Русланы тынг фæндыд Мæскуыйы рахæцын æмæ нæ йæ фæндоныл сразы кодта. Фæндыди йæ Европæйы чемпионатмæ балцæг рамбулын æмæ йын «нæ» зæгъын, нæ бон нæ баци. Йæ фыццаг æртæ ныхмæлæууæгыл фæуæлахиз æнæдызæрдыгæй. Рамбылдта сæ зынгæ фылдæр хыгъдтимæ æмæ кæронбæттæны фембæлд Улан Амадалиевимæ. Ацы фембæлды дæр Руслан уыди тыхджындæр æмæ фæуæлахиз 6:3 хыгъдæй. Фыццаг бынат æмæ сыгъзæрин майдан бæргæ рамбылдта, фæлæ йæ къахы цæф ногæй срысти. Ныр цы балцæг рамбылдта Европæйы чемпионатмæ, уымæй спайда кæнын уыдзæн зын хъуыддаг. Баззадис ма дыууæ къуырийы æмæ уæдмæ тынг бацархайын хъæуы уыцы цæф къах бадзæбæх кæнынмæ», — загъта Гаглойты Вахтанг.

Уæззау уæзы хæцыди Гаглойты Вахтанг æмæ Фæрниаты Сосланы ахуыргæнинаг Гæджынаты Георги. Уый фæуæлахиз æртæ ныхмæлæууæгыл, фæлæ æрдæгкæронбæттæны фæхæрд ерысты уæлахиздзау суæвæг Нохчо Лабазановæн æмæ бацахста æртыккаг бынат.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here