Бахъахъхъӕнӕм ын йӕ сыгъдӕгдзинад

0
182

 

Зӕхх адӕймагӕн йӕ мад у. Цардмӕ йӕ рантысын кӕны, йӕ хъӕбысы йӕ бакӕны, йӕ бӕркӕдтӕй йӕ дары ӕмӕ йӕ фӕстагмӕ йӕ хъарм хъӕбысы йӕ фӕлмӕн ӕмбӕрзӕнӕй ӕрӕхгӕны. Уыдӕттыл хъуыды кӕнгӕйӕ йын адӕймаг дӕр хъуамӕ хъӕбулы лӕггад кӕна, узӕла йыл, ауда йыл, кӕна йын аргъ.

1971 азӕй 22 апрелы адӕм бӕрӕг кӕнынц Зӕххы дунеон бон. Уыцы бон горӕттӕ ӕмӕ хъӕуты цӕрджытӕ скӕнынц зиутӕ, бафснайынц сӕ амфамбылай, ныссадзынц бӕлӕстӕ ӕмӕ дидинджытӕ.

Зӕрдыл ӕрбалӕууы, Антуан Сент-Экзюперийы уацмыс «Чысыл принц»-ы хъайтар-иу йӕ алы бон дӕр йӕ гыццыл зӕххы къори ӕфснайынӕй кӕй райдыдта, уый. Ахуыргӕндты иртасӕнтӕм гӕсгӕ, Зӕхх у, 3,8 милуан азы размӕ цард кӕм фӕзынд, уыцы иунӕг планетӕ. Зӕххыл цы адӕм цӕры, уыдоны нымӕц ӕмткӕй райсгӕйӕ 2017 азы уыд 7,5 миллиарды.

Ахуыргӕндты иртасӕнтӕм гӕсгӕ та 2050 азмӕ Зӕххыл цӕрӕг адӕмы нымӕц хӕццӕ кӕндзӕн 9,2 миллиардмӕ. ӕнусты дӕргъы адӕймаг Зӕхмӕ кӕсы куыд Зӕххы къори ӕмӕ куыд хӕдзарадон бынат.

Уӕдӕ цымӕ цы у Зӕхх? Ацы фарстӕн астроном ратдзӕн дзуапп — «планетӕ», биолог— «цард кӕм ӕхсиды, уый», геолог — «химион элементты чыргъӕд». Кæмӕндӕрты та Зӕхх у, ӕрвылбон ӕлгъаг чъырттытӕ кӕдӕм кӕны, уыцы асфальтгонд фӕндаг, иннӕтӕн у, дзабыры бын цы цъыф баззад, уый. Ома, адӕмы иу къордӕн зӕхх удгоймаг нӕу, фӕлӕ, чи ницы хъусы, чи ницы уыны, уыцы куырм, къуырма, гоби, ӕнӕуд матери. Рӕстаг адӕймаг та, ӕнӕмӕнг, зӕгъдзӕн, Зӕхх адӕймагӕн йӕ мад кӕй у.

Уӕдӕ ма иу уалдзыгон райсом ног хуымгонд зӕххы раз ӕрлӕуу, кӕддӕра нӕ банкъарис, зӕхх йӕ риуы дзаг куыд улӕфы, уый.

«Уый мах зӕхх у, ӕмӕ йӕ никӕмӕн ратдзыстӕм», — баззад адӕмы ‘хсӕн ныхас, зондахаст. Зӕрдыл ӕрбалӕууынц уӕззау историон цаутӕ дӕр. Цас туг ныккалд зӕххыл тохы алы адӕмыхӕттыты ‘хсӕн.

Скӕсӕны политиктӕ, дунейы «хицӕуттӕ» арӕх фӕзӕгъынц, Сыбыр, дам, Уӕрӕсейӕн ӕгӕр уӕрӕх у.

Фӕрсын, уый нӕ фыдӕлтӕ сӕ цард цӕуыл радтой, сӕ фӕстаг сулӕфты размӕ дӕр ма сӕ риумӕ хӕзнайау цы зӕхх ӕлхъывтой, уыцы зӕххы кой кӕнынц? ӕмӕ йын мах уӕд абон цы кусӕм, фыдыусы цӕстӕй йӕм цӕмӕн кӕсӕм? Цы ныл ӕрцыд? ӕрдзы хъӕбысмӕ нӕ фӕллад уадзынмӕ рацӕуӕм ӕмӕ нӕ фӕстӕ змӕстӕй ныууадзӕм. Зӕххы алы къуымты знаггадхӕссӕг «хъацӕнтӕ» ӕнхъизынц. Ӕмӕ нын сӕ Зӕхх ныййарӕг мадау ӕнӕдзургӕйӕ ныххатыр кӕны. Раст цыма афтӕ фӕзӕгъы, ныххатыр сын кӕн, Хуыцау, цы кӕнынц, уый не ‘мбарынц.

Бары, нырма уал…

Акӕсӕм-ма, нӕ хӕххон сыр-сыргӕнаг цӕугӕдӕттӕ цы уавӕрмӕ ӕртардтам, уымӕ. Бырондӕттӕ фестадысты. Уӕ зӕрдыл ма ӕрлӕууын кӕнут, Хъӕрмӕдоны Хъолайы цъитийы зӕй куы рацыд, уӕд цас ӕнаххос адӕм фӕцис йӕ быны. Иннӕ ахӕм Тайланды — фурды егъау уылӕнтӕ былгӕрӕтты цӕрджыты сӕ быны куы фӕкодтой, уӕд. Сомихы, Хуссар Ирыстоны ӕмӕ ӕндӕр рӕтты цы зӕххӕнкъуыстытӕ ӕрцыд, уыдон хуымӕтӕджы уыдысты? Уӕдӕмӕ адӕймаджы ӕппӕрццӕг энерге- тикӕ цыма фӕстӕмӕ Зӕхмӕ йӕ ных саразы, ӕрдзон фыдбылызтӕ йӕ фӕдыл расайгӕйӕ, афтӕ мӕм кӕсы. Зӕхх алцынкъараг удгоймаг у.

Ацы хъуыддаджы ныгуылӕны цӕрджытӕ ӕрдзмӕ бынтон ӕндӕр цӕстӕй кӕсынц. Арӕхстгай йӕм ӕвналынц, узӕлӕгау ыл кӕнынц. Хӕдзары мигӕнӕнтӕ аразӕг ӕлыг не ‘ркъахдзӕн, цалынмӕ йӕ Зӕххӕй ракура, уӕдмӕ. Порфирий Ивановы куырыхон ахуырты ис ахӕм фӕдзӕхст: «Арӕхстгай архай ӕрдзимӕ, ма йыл чъырттытӕ кӕн».

Киноныв «Гладиатор»-ы сӕйраг хъайтар Максимус Децим Меридий-иу карз тохы размӕ йӕ къухмӕ систа сыджыт ӕмӕ йӕ йӕ армы тъӕпӕнты ӕууӕрдгӕйӕ Зӕххы хъару йӕ буары бацыд, йӕ хъаруйыл ӕфтыд хъару, ӕмӕ йын-иу тыхгӕнӕг тых нал ардта. Мӕнмӕ гӕсгӕ, тагъд рӕстӕджы нӕ хистӕртӕ дӕр фыццаг куывдтытӕй иу сӕрмагон- дӕй кӕндзысты ӕрдзӕн, цӕмӕй нӕ йӕ фыдӕхӕй бахиза. Фидарӕй мӕ уырны, зындгонд уырыссаг классик Лев Толстой йӕ гениалон уацмыстӕ кӕй нӕ ныффыстаид, зӕххы куыстмӕ ӕмхиц куы нӕ уыдаид, удӕнцой йын куы нӕ хастаид, уӕд. Быдыры зӕххы куыстытӕ адӕймаджы удыхъӕдыл ӕндӕр хуызы сахадынц, аивынц ын йӕ зондахаст дӕр. Адӕй-маджы ӕххуысӕй зӕхх свӕййы ноджы бӕркадджындӕр, зӕхх та уый хыгъд адӕймаджы хорздзинадӕн дзуапп дӕтты йӕ тыллӕгӕй, сыгъдӕгдӕр ӕмӕ йын хъӕздыгдӕр кӕны йӕ миддуне.

Адӕймаг аргъуанмӕ куы бацӕуы, уӕд, уазнывты раз ӕрлӕугӕйӕ, йӕ сӕрӕй ныллӕг акувы. Уӕдӕ ма банымайут, цалынмӕ адӕймаг фӕззӕджы йӕ куысты бӕркад ӕрӕмбырд кӕны, уӕдмӕ Зӕххӕн цал хаты акувы сӕрӕй, уый дӕр.

Зӕххӕн космонавттӕ бынтон ӕндӕр аргъ кӕнынц. «Зӕххы къорийыл науӕмдзугӕнӕгыл ӕрзилгӕйӕ, ӕз мӕхи дыууӕ цӕстӕй федтон, куыд рӕсугъд у, уый. Адӕм, курын уӕ, бахъахъхъӕнӕм ӕй ӕмӕ йын дывӕр кӕнӕм йӕ алӕмӕтаг хуыз знаггады бӕсты», — загъта Юрий Гагарин, фӕстӕмӕ куы ӕрыздӕхт, уӕд.

Фидӕны фӕлтӕртӕ Зӕххы бонмӕ, ӕрдзмӕ цы цӕстӕй кӕсдзысты, цы аргъ сын кӕндзысты, цы зӕрдӕ сӕм дардзысты, уый аразгӕ у абон махӕй алкӕмӕй дӕр.

ДЗӔГЪОЙТЫ Вячеслав, «Иры Стыр Ныхас»-ы сӕрдары хӕдивӕг

ОСТАВЬТЕ ОТВЕТ

Please enter your comment!
Please enter your name here