Барадхалджыты ныхмӕ тох

0
206

 

 

Знон РЦИ-Аланийы Хицауады хӕдзары уыд республикӕйы барадон фӕткӕн хъӕугӕ фадӕттӕ аразыны фӕдыл иудадзыгон кусӕг координацион советы ӕмбырд. Амыдта йӕ РЦИ-Аланийы Сӕргълӕууӕг БИТАРТЫ Вячеслав.

Координацион советы уӕнгтӕй уӕлдай ма ӕмбырды архайынмӕ хуынд ӕрцыдысты Национ ахастдзинӕдты фарстаты фӕдыл министр Цуциты Аслан, Фӕсивӕды хъуыддӕгты фӕдыл комитеты сӕрдар Джусойты Руслан, физикон культурӕ ӕмӕ спорты министры хӕстӕ рӕстӕгмӕ ӕххӕстгӕнӕг Бӕройты Хасан, Сӕйраг тӕрхондоны сӕрдары хӕстӕ рӕстӕгмӕ ӕххӕстгӕнӕг Гусаты Сергей, паддзахадон исбонад ӕмӕ зӕххы ахастдзинӕдты министр Тедеты Руслан, ӕндӕр ведомствоты бӕрнон кусджытӕ ӕмӕ районты администрациты сӕргълӕуджытӕ.

— Сывӕллӕтты республикӕйы фӕндӕгтыл транспортон фыдбылызтӕй бахизыныл кӕд ӕппынӕдзух кусӕм, уӕддӕр уый у нӕ риссагдӕр фарстатӕй иу. Алы бон дӕр нӕм цӕуы фӕндаггон бӕллӕхтӕ. Арӕхдӕр аххосаг вӕййы, шофыр нозтджын кӕй вӕййы, кӕнӕ та ӕгӕр тагъд кӕй скъӕры йӕ хӕдтулгӕ, уый. ӕрмӕст Мидхъуыддӕгты министрадмӕ нӕ хауы ацы фарста, фӕлӕ не ‘ппӕтмӕ дӕр. Уый тыххӕй нӕ хъӕуы нӕ куысты домӕнтӕ фӕкарздӕр кӕнын, скъоладзаутимӕ ноджы бӕстондӕр кусын ӕмӕ сын амонын фӕндаджы ӕгъдӕуттӕ. Тагъд рӕстӕджы ӕхсӕнадон бынӕтты ӕмӕ фӕндӕгтыл ӕвӕрд ӕрцӕудзӕн 300 видеоцӕстдарӕны, ӕмӕ уӕд барадхалджыты нымӕц хъуамӕ фӕкъаддӕр уа. Ацы фарстайы фӕдыл цы мадзӕлттӕ арӕзт цӕуы, уый тыххӕй докладтӕ скодтой фӕндӕгтыл ӕдӕсӕй цӕуыны паддзахадон инспекцийы хицау Хуадонты Айвар ӕмӕ республикӕйы ахуырад ӕмӕ наукӕйы министр Иринӕ Азимова.

Уыдон радзырдтой, скъолатӕ ӕмӕ рӕвдауӕндӕтты цы профилактикон мадзӕлттӕ арӕзт цӕуы ӕмӕ дарддӕр дӕр сӕ размӕ цы хӕстӕ сӕвӕрдтой, уый тыххӕй. Профилактикон мадзӕлтты фӕархайынц ныййарджытӕ дӕр. Бӕлвырд куыд у, афтӕмӕй фылдӕр фыдбылызтӕ ӕрцӕуы 15.00 сахатӕй 19.00 сахатмӕ, сывӕллӕттӕ скъолайӕ куы рацӕуынц кӕнӕ урокты фӕстӕ сӕхи бар куы вӕййынц, уыцы рӕстӕг.

Ӕмбырды иннӕ ахсджиаг фарста уыд, Интернеты тыгъдады адӕмы кӕрӕдзийыл чи ардауы, иннӕ адӕмтыхӕттытимӕ сӕ чи змӕнты, уыцы амидигӕнджыты ныхмӕ куыст куыд цӕуы, уый тыххӕй. Республикӕйы Сӕргълӕууӕг карзӕй бадомдта, цӕмӕй уыцы барадхалджытӕ закъонмӕ гӕсгӕ ӕрцӕуой ӕфхӕрд. Национ фарстаты фӕдыл министр Цуциты Аслан йӕ доклады куыд загъта, афтӕмӕй ӕнгомӕй кусынц хъӕуты ӕмӕ горӕтты фӕсивӕдимӕ, арӕх сын вӕйы фембӕлдтытӕ дӕр.

Уыцы амидингӕнджытӕн закъонмӕ гӕсгӕ ӕмбӕлы фондз азы ахӕстоны бадыны тӕрхон рахӕссын, фӕлӕ, абоны онг цы 26 адӕймаджы ӕрцахстой, уыдон дӕр сты сӕрибар. Цы провокацион сайттӕ байгом кодтой, уыдон та ӕрцыдысты ӕхгӕд. Информацион технологитӕ ӕмӕ дзыллон коммуникациты федералон службӕйы цӕгатирыстойнаг хайады сӕрдары хӕдивӕг Нартыхты Алыксандр цы доклад скодта, уым загъта, нӕ республикӕйы кӕй раиртӕстой адӕмы амидингӕнӕг 350 сайты ӕмӕ сӕ ӕвӕстиатӕй кӕй сӕхгӕдтой. Битарты Вячеслав бахаста фӕндон, цӕмӕй саразой сӕрмагонд къамис ӕмӕ кӕрон кӕной, бӕрнон кусджытыл ӕнӕхъуаджы цъыф чи калы, адӕмы чи змӕнты, нӕ сыхӕгтимӕ нӕ кӕрӕдзийыл чи ардауы, уыдоны зианхӕссӕг митӕн закъонмӕ гӕсгӕ. Адӕмы ӕдасдзинады фарстатыл дзургӕйӕ, Дзӕуджыхъӕуы администрацийы сӕргълӕууӕг ӕлбегаты Барис загъта, Битары-фырты фӕдзӕхстмӕ гӕсгӕ, базары фарсмӕ хӕдбар базарадон куыст чи кӕны, уыдонӕн уавӕртӕ саразыны хъуыддаг лыггонд кӕй цӕуы, ӕмӕ сын базары хицау кӕй рахицӕн кӕндзӕн лӕвар бынӕттӕ сӕ халсартӕ ӕмӕ басгӕрдӕг уӕй кӕнынӕн.

— Алы аз дӕр нӕ республикӕ сӕдӕгай милуантӕй ӕнӕхай фӕвӕййы, зӕххы фарстатӕ раст лыггонд кӕй нӕ цӕуынц, уый тыххӕй. Иннӕмӕй та кӕцыдӕр зӕххытӕ уӕйгонд ӕрцыдысты, цы сын ӕмбӕлд, уымӕй дӕс хатты къаддӕр аргъӕй. Битарты Вячеслав кӕронбӕттӕны арфӕ ракодта Мидхъуыддӕгты министр Михаил Скоковӕн, барадхалджытӕн сӕ ных кӕй къуыры ӕмӕ хъӕугӕ мадзӕлттӕ кӕй аразы, уый тыххӕй. Иннӕмӕй та — тагъд рӕстӕджы, Уӕлахизы бонмӕ йӕ хъӕппӕрисӕй нӕ республикӕйы Барбашовы цыртдзӕвӕны раз мемориалон комплекс кӕй байгом уыдзӕн, уый тыххӕй.

ХЕТӔГКАТЫ Оксанӕ

ОСТАВЬТЕ ОТВЕТ

Please enter your comment!
Please enter your name here