Футбол. Уӕрӕсейы чемпионат. Дыккаг къорд

0
147

Сабаты Дзӕуджыхъӕуы «Спартак» йӕхи фӕзыл фембӕлд Краснода- ры крайы командӕ «Афипс»-имӕ.

Краснодайрӕгтӕ ныры онг Уӕрӕсейы Хуссайраг зонӕйы командӕты чемпиона- ты уыдысты дыккаг бынаты ӕмӕ тырнынц фыццаг бынатмӕ. Ахӕм тыхджын ныхмӕлӕууӕгимӕ фембӕлды дзӕуджыхъӕуккаг футболисттӕ сӕхи лӕмӕгъӕй кӕй нӕ равдыстой, уымӕн ӕвдисӕн уыдысты, стадионмӕ чи ӕрбацыд, уыцы футболуарзджытӕ. Ӕнӕмӕнг, нӕ командӕйы хъазт хуызджындӕр ӕмӕ мидисджындӕр кӕй кӕны, уый ныфс дӕтты, куыдфӕстӕмӕ ӕмбулын дӕр арӕхдӕр кӕй райдайдзыстӕм, уымӕн. Фӕлӕ та уал ацы хатт дӕр ӕмбылд фӕстӕдӕрмӕ аргъӕвын бахъуыд.

Хъазты фыццаг ӕмбисы «Спартак» зынгӕ фылдӕр ныббырстытӕ бӕргӕ сарӕзта, фӕлӕ-иу уазджытӕ алы хатт дӕр сӕ кулдуар бахъахъхъӕдтой.

Хъазты дыккаг ӕмбисы уазджытӕ сӕ архайд фӕрӕвдздӕр кодтой. Чи зоны, ӕмӕ сын фӕахъаз, улӕфты рӕстӕг, чемпионаты фыццаг бынат бацахсыныл кӕимӕ ерыс кӕнынц, ома, «Армавир»-имӕ, уый йӕ радон хъазт «Биолог-Новокубанск»- имӕ хӕрӕгсастӕй кӕй фӕци, уый. Ахӕм уавӕры «Афипс»-ӕн фадат фӕци «Армавир»-ы разӕй фӕуынмӕ. Уый тыххӕй та йӕ рамбулын хъуыди ацы фембӕлды. Уазджытӕ 60, 62, 63-ӕм минуттыл цалдӕр хатты тӕссаг уавӕртӕ сарӕзтой фысымты иварон фӕзы, фӕлӕ нӕ хъахъхъӕнджытӕ ӕмӕ дуаргӕс Хайманты Алан къӕрцхъусӕй фӕлӕууыдысты ӕмӕ нӕ кулдуар бахъахъхъӕдтой. Уый фӕстӕ та нӕ футболисттӕ размӕ бӕргӕ атындзыдтой, фӕлӕ 71-ӕм минутыл уазджыты ныббырст бауромынмӕ нал фӕцарӕхстысты. Уазджытӕ къуымонӕй куы ӕрбалӕвӕрдтой пурти, уӕд ӕм сӕ размӕбырсӕг Дмитрий Воробьев нӕ хъахъхъӕнджытӕй фӕцырддӕр”, ӕмӕ йын йӕ цӕфы фӕстӕ пурти бауромын Хайманты Аланы бон дӕр нал баци — 0:1. «Афипс» размӕ рацыд. Хъазты кӕронмӕ ма цы рӕстӕг баззад, уым нӕ лӕппутӕ иу иннӕйы фӕстӕ ныб- бырстытӕ бӕргӕ арӕзтой, фӕлӕ та спортивон амонд нӕ командӕмӕ йе ‘ргом нал раздӕхта. Ӕндӕр куыд ис бамбарӕн 74-ӕм, 77-ӕм, 83-ӕм ӕмӕ 86-ӕм минутты нӕ хъазджытӕ цы уавӕртӕ сарӕзтой, уыдонӕй иу дӕр кӕй нӕ фӕрӕстмӕ, ӕмӕ хъазт 0:1 — уазджыты пайдайӕн кӕй ахицӕн, уый? Хъазты фӕстӕ нӕ командӕйы сӕйраг тренер Гӕззаты Юри уый тыххӕй загъта: «Нырма нӕ ӕрыгон хъазджытӕ рӕдыдтытӕ уадзынц, фӕлӕ сӕ лӕппутӕ сраст кӕнынмӕ кӕй тырнынц, уый хорз у. Куыдфӕстӕмӕ нӕ командӕйы иумӕйаг архайд мидисджындӕр кӕй кӕны, уый дӕр бӕрӕг у, фӕлӕ кусын хъӕуы сӕ арӕхстдзинад ӕмӕ фӕлтӕрддзинад фылдӕр кӕныныл. Уый тыххӕй «Афипс» ӕмӕ «Армавир»-ы хуызӕн командӕтимӕ хъазын махӕн пайдайы хос у. Ӕз бузынг зӕгъын футболуарзджытӕн. Уыдоны разӕнгардгӕнӕг хъӕлӕстӕ лӕппутӕн ныфсы хос сты. Ӕз уынын, ныртӕккӕ командӕ ӕнгомӕй-ӕнгомдӕр кӕй кӕны, нӕ футболистты тынг кӕй фӕнды сӕ хъазтӕй сӕ иузӕрдион фарсхӕцджыты зӕрдӕтӕ барухс кӕнын, ӕмӕ уымӕ тырндзыстӕм».

Гӕззаты Юрийы ӕрмдзӕф ныридӕгӕн хорзӕрдӕм кӕй фӕзынд нӕ командӕйы архайдыл, уый бӕлвырд у, фӕлӕ ӕвиппайды байрагӕй бӕх кӕнӕн куыд нӕй, афтӕ нӕ командӕ йӕ абоны уавӕры ӕваст чемпион акӕнӕн нӕй. «Спартак» ацы бонты акӕндзӕн дыууӕ хъазты. Райсом, 25 апрелы, нӕ командӕ уазӕгуаты фембӕлдзӕн Назраны «Ангушт»-имӕ, уый фӕстӕ та, 4 майы, Дзӕуджыхъӕуы йӕ арӕхстдзинад ӕвдис- дзӕн «Армавир»-имӕ.

Ирон дзюдоисткӕ рамбылдта Европӕйы кубок

Чехаг горӕт Теплицейы дзюдойӕ цыдысты Европӕйы кубок рамбулыныл ерыстӕ ӕрыгӕтты ‘хсӕн.

Уӕрӕсейы чызджыты командӕйӕ иттӕг хорз рахӕцыди тренер Кӕсойты Сталиславы хъомылгӕнинаг Хуыбылты Иренӕ. Йӕ цыппар ныхмӕлӕууӕгыл дӕр Иренӕ фӕуӕлахиз рӕстӕгӕй раздӕр. Кӕронбӕттӕны йӕ ныхмӕлӕууӕг уыди немыцаг дзюдоисткӕ Беттина Бауер, фӕлӕ уымӕн дӕр йӕ турнирон хъысмӕт лыггонд ӕрцыд 7-ӕм секундыл. Иренӕ йӕ ныхмӕлӕууӕджы уайтагъд ацахста ӕмӕ йӕ йе уӕнтыл авӕрдта — «Иппон!» Гъе, ахӕм сӕрӕнӕй йӕхи равдыста, уый размӕ кӕимӕ хӕцыд, уыдонимӕ фембӕлдтыты дӕр. Иренӕ дзюдойӕ хӕцыныл фӕцалх Кӕсойты Сократы номыл клубы, ныртӕккӕ та ис нӕ республикӕйы спортивон-цӕттӕгӕнӕн центры, куыд суинаг спортсменкӕ. Центры директор Фидараты Аслан зӕгъы: «Иренӕ у, абон нӕ фӕсивӕдӕй фидӕны стыр уӕлахизмӕ кӕмӕй ӕнхъӕлмӕ кӕсӕм, уыдонӕй. Дарддӕр дӕр афтӕ зӕрдиагӕй куы куса йӕхиуыл, уӕд нӕ зӕрдӕ дардзыстӕм, Олимпаг хъӕзтыты йӕ искӕдбон кӕй фендзыстӕм, ууыл. Теплицейы уӕрӕсейӕгтӕй фесгуыхтысты: Изнаур Сааев (50 кг), Абу Парчиев (55 кг), Кантемир Кодзоев (60 кг), Абрек Нагуев (66 кг), Хуыбылты Иренӕ (48 кг).

БАСКАТЫ Уырызмӕг

ОСТАВЬТЕ ОТВЕТ

Please enter your comment!
Please enter your name here