Кӕстӕрты арӕхстдзинад

0
222

 

Цӕгат Ирыстоны республикон ӕхсӕнадон змӕлд «Иудзинад»-ы ӕркаст-конкурс «Ирон дӕн ӕз» дарддӕр ӕнтыстджынӕй цӕуы республикӕйы районты. Ацы хатт ӕй суазӕг кодта Цыколайы фыццӕгӕм скъола, арӕзт ӕрцыд ӕрӕфы районы иумӕйагахуырадон кусӕндӕтты ахуырдзауты ӕхсӕн. Ардӕм хуынд ӕрцыдысты ӕркаст- конкурсы архайджыты бацӕттӕгӕнӕг ирон ӕвзаг ӕмӕ литературӕйы ахуыргӕнджытӕ, скъоладзауты ныййарджытӕ, районы иумӕйагахуырадон кусӕндӕтты педагогон коллективты минӕвӕрттӕ ӕмӕ ӕндӕртӕ.

Ацы ныхӕсты фӕстӕ Увыдзыхъоты Зӕлинӕ сценӕмӕ рахуыдта ӕркаст- конкурсы архайӕг чызджыты. Уыдон уыдысты: Советон хъӕуы иумӕйагахуырадон скъолайы ахуырдзау Охъазты Данӕ, Цыколайы ӕртыккӕгӕм иумӕйагахуырадон скъолайы ахуырдзау Зехъеты Дианӕ, Лескены иумӕйагахуырадон скъолайы ахуырдзау Хъараты Изабеллӕ, Сырх Дыгуры иумӕйагахуырадон скъолайы ахуырдзау Гобеты Дианӕ, Сечеры иумӕйагахуырадон скъолайы ахуырдзау Нафиты Олеся ӕмӕ Толдзгуыны иумӕйагахуырадон скъолайы ахуырдзау Хӕмыцаты Аринӕ. Сӕ арӕхстдзинадӕн та сын аргъ кодтой Цӕгат Ирыстоны республикон ӕхсӕнадон змӕлд «Иудзинад»-ы советы уӕнгтӕ Байсонгъуырты Мухтар, Зассеты Сослан, районы культурӕйы управленийы методист Малиты Фатимӕ, районы социалон хъахъхъӕнынады службӕйы директоры хӕдивӕг Баймӕтаты Эммӕ ӕмӕ районы ахуырады управленийы хицауы хӕдивӕг Медойты Фатимӕ.

Ныр та ӕркаст-конкурс райдыдта нывӕцӕн «Ирон дӕн ӕз» ныффыссынӕй, ӕмӕ амонӕг фыццаг ныхасы бар радта Охъазты Данӕйӕн. Уый бафиппайдта, зӕгъгӕ, бӕласӕн йӕ уидӕгтӕ куы алыг кӕнай, уӕд бахуыскъ уыдзӕн. Уымӕ гӕсгӕ, дам, хъуамӕ ахуыр кӕнӕм хистӕрты хорз хъуыддӕгтыл. Мадӕлон ӕвзаджы хъысмӕтыл дзургӕйӕ та ӕрхаста РЦИ-Аланийы раздӕры сӕргълӕууӕг ӕгъуызарты Тамерланы ныхӕстӕ «Ирон лӕг иронау куы нӕ зона, уӕд дзы мӕ цӕсты кад нӕй» ӕмӕ загъта, хъуамӕ зӕрдиагӕй ахуыр кӕнӕм нӕ мадӕлон ӕвзаг, зӕгъгӕ.

Ацы хъуыды сӕ нывӕцӕнты дарддӕр ахӕццӕ кодтой Зехъеты Дианӕ, Хъараты Изабеллӕ ӕмӕ Хӕмыцаты Аринӕ дӕр. «Ирон адӕймаг хъуамӕ ӕдзухдӕр хъуыды кӕна, ирон кӕй у, ууыл», — дзырдта Нафиты Олеся. Зӕрдӕмӕдзӕугӕ уыдысты Хъараты Изабеллӕ ӕмӕ Гобеты Дианӕйы нывӕцӕнтӕ дӕр, ӕмӕ сын амонӕг раарфӕ кодта: «Стыр бузныг, чызджытӕ! Ирон ӕвзаджы рӕзтыл архайут, ӕмӕ уӕ кад бӕрзондӕй- бӕрзонддӕр кӕнӕд, ӕнтыстдзинӕдтӕ уӕ къухы ӕфтӕд».

Ӕркаст-конкурсы архайджытӕ дарддӕр ерыс кодтой, ирон бӕрӕгбӕттӕ сӕ чи хуыздӕр зоны, ууыл. Авдӕнбӕттӕн, кӕрдӕгхӕссӕн, кӕхцгӕнӕн нӕ фыдӕлты заман куыд бӕрӕг кодтой, уый тыххӕй радзырдтой Охъазты Данӕ, Гобеты Дианӕ, ӕмӕ Хӕмыцаты Аринӕ. Чындзӕхсӕвы ӕмӕ чызгӕрвысты ӕгъдӕуттӕ, сӕрызӕды хӕцъил, сиахсы цыды ӕмӕ ӕндӕрты тыххӕй ӕнӕрӕдыдӕй радзырдтой Нафиты Олеся, Хъараты Изабеллӕ ӕмӕ Хъараты Аринӕ дӕр.

Ӕркаст-конкурсы архайӕг ӕвзонг чызджытӕ хорз сарӕхстысты рагон ирон хӕдзары кусӕнгӕрзты тыххӕй радзурынмӕ дӕр. Ӕрхастой сасир, арынг, авдӕн ӕмӕ ӕндӕр дзаумӕттӕ дӕр, ӕмӕ сӕ алкӕцыйы тыххӕй дӕр ерысдзауты ныхас уыдис бӕлвырд. Уӕдӕ ирон хӕринӕгтӕ кӕнынӕй дӕр амбылдтой. Ӕркаст-конкурсы фӕстаг къӕпхӕн та уыдис аивадон хӕслӕвӕрд, ӕмӕ ам дӕр ӕвзонг чызджытӕ сӕхи хорзӕй равдыстой. Чи дзы кафгӕ акодта, чи заргӕ, чи та йӕ курдиат равдыста хицӕн сценикон нывты.

Ӕркаст-конкурс кӕронмӕ ахӕццӕ, ӕмӕ сценӕмӕ хуынд ӕрцыд жюрийы сӕрдар Байсонгъуырты Мухтар. Уый загъта: «Абон чызджыты сбӕрӕг кодтам фӕлварӕнты, ӕмӕ, стыр арӕхстдзинад кӕй равдыстой, уый тыххӕй арфӕ кӕнын сӕ ахуыргӕнджытӕн, ӕркаст-конкурсмӕ сӕ хорз кӕй бацӕттӕ кодтой, уый тыххӕй.

Дарддӕр та Байсонгъуыры-фырт фехъусын кодта, ӕркаст-конкурсы бӕрӕггӕнӕнтӕ бахынцгӕйӕ, ӕртыккаг бынатмӕ кӕй рацыд Советон хъӕуы иумӕйагахуырадӕн скъолайы ахуырдзау Охъазты Данӕ. Бацӕттӕ йӕ кодта ирон ӕвзаг ӕмӕ литературӕйы ахуыргӕнӕг Дзабайты Аллӕ, ӕмӕ сын лӕвӕрд ӕрцыд фӕйнӕ 3 мин сомы. Дыккаг бынат бацахста Сырх Дыгуры иумӕйагахуырадон скъолайы ахуырдзау Гобеты Дианӕ. Ирон ӕвзаг ӕмӕ литературӕйы ахуыргӕнӕг Годзойты Анжелӕимӕ сӕ алчидӕр райста фӕйнӕ 5 мин сомы. Ӕркаст-конкурсы жюри фыццаг бынат саккаг кодта Цыколайы ӕртыккӕгӕм иумӕйагахуырадон скъолайы ахуырдзау Зехъеты Дианӕйӕн. Ирон ӕвзаг ӕмӕ литературӕйы ахуыргӕнӕг Химилонты Фатимӕимӕ сын лӕвӕрд ӕрцыд фӕйнӕ 7 мин сомы.

Уымӕй уӕлдай, ӕркастконкурсы архайӕг иннӕ чызджытӕй дӕр хъӕстагӕй ничи баззад. Уыдоны ӕмӕ сӕ ахуыргӕнджыты Цӕгат Ирыстоны республикон ӕхсӕнадон змӕлд «Иудзинад» схорзӕхджын кодта Кады гӕххӕтт ӕмӕ зынаргъ лӕвӕрттӕй.

ТОХСЫРТЫ Къоста

ОСТАВЬТЕ ОТВЕТ

Please enter your comment!
Please enter your name here