«Ӕппӕты хуыздӕр зӕлтӕ — сывӕллоны зӕрдӕйы цавд»

0
233

Йӕ цард ӕнӕхъӕнӕй дӕр йӕ адӕмӕн лӕггад кӕнынӕн чи снывонд кодта, йӕ дадзинты цавд Ирыстоны зынтӕ ӕмӕ цинтимӕ кӕмӕн баиу, гыццыл Ирыстоны къонатӕй йӕ арф медицинон зонындзинӕдтӕ, йӕ къухты арӕхстдзинад ӕмӕ зӕрдӕйы фарнӕй сывӕллоны кӕуын кӕй руаджы райхъуыст, уыцы Хуыцауысконд дохтыртӕй иу у ХЕТӔГКАТЫ-БАГАТЫ Беллӕ. Абон бӕрӕг кӕны йӕ юбилей, ӕмӕ йын Ирыстоны сылгоймӕгтӕ сӕ бинонтимӕ кӕнынц зӕрдӕбын арфӕтӕ.

Дӕрзӕг ӕмӕ гуыргъахъ уыд Беллӕйы цардвӕндаг. Йӕ фыд Симон куыста партийы Садоны райкомы дыккаг секретарӕй, хъӕбатырӕй фӕмард Фыдыбӕстӕй Стыр хӕсты Севастополь сӕрибар кӕнгӕйӕ. Йӕ мад Багаты-Сидахъты Аннӕ, фыдӕбонджын идӕдз сылгоймаг тыхамӕлттӕй хаста йӕ дыууӕ хъӕбулы — Беллӕ ӕмӕ Мураты. Куыста Къостайыхъӕуы скъолайы ахуыргӕнӕгӕй, уый фӕстӕ та — библиотекӕйы. Ахуыр кӕнынмӕ Беллӕ зӕрдӕрайӕ уад хъӕууон скъоламӕ. Абон дӕр ма диссагӕн радзурынц, цалынмӕ скъола каст нӕ фӕцис, уӕдмӕ Беллӕ бакаст скъолайы, хъӕуы ӕмӕ районы библиотекӕты чингуытӕ иууылдӕр. Чиныгмондаджы уавӕр ӕй тыхсын кодта. Абон ыл кӕд дзӕвгар азтӕ рацыд, уӕддӕр йӕ ахуыр нӕ фехӕлд. Ӕнӕ чиныг ын цард ӕппындӕр ад нӕ кӕны. Уыимӕ, хорз зоны дунейы фӕстаг цаутӕ, у цымыдисаг ныхасӕмбал, уымӕн ӕмӕ царды алы къабазы фарстаты дӕр у дӕсны, арӕхстджын ӕмӕ объективон.

Беллӕ райгуырд Лисрийы, 1943 азы, схъомыл Къостайыхъӕуы. Скъолайы фӕстӕ 1969 азы каст фӕцис Цӕгат Ирыстоны паддзахадон медицинон институт иттӕг хорз бӕрӕггӕнӕнтимӕ. Уыцы аз бацыд клиникон ординатурӕмӕ акушер-гинеколоджы хайадмӕ ӕмӕ 1971 азӕй абоны онг кусы Дзӕуджыхъӕуы 2-ӕм арӕндоны. 47 азы ӕнӕрынцойӕ, удуӕлдайӕ сӕумӕрайсомӕй изӕрмӕ ӕмӕ ма суанг ӕхсӕвыгӕтты дӕр Беллӕ мыдадзын цырагъау, йӕхиуыл нӕ ауӕрдгӕйӕ, лӕууыд, ӕххуысмӕ йӕм чи ӕнхъӕлмӕ каст, уыцы тыхст ӕнхъӕлцау сылгоймӕгты уӕлхъус. Ӕмӕ цыма цӕимӕ ис абарӕн уыцы амондджын ныййарджыты ӕмӕ сӕ бинонты ӕнкъарӕнтӕ, арӕндонӕй дохтыры арфӕйаг уӕззау фыдӕбоны фӕстӕ, сӕ хӕдзӕртты къӕсӕрӕй, сӕ хъӕбысты сӕ хъӕбулты сӕ риумӕ нылхъивгӕйӕ, куы бакъахдзӕф кодтой, уый. Уал азмӕ сын банымайӕн дӕр нӕй.

Дӕ рагуалдзӕджы, дам, цы байтауай, уый бӕркадджын фӕззӕджы ӕркӕрддзынӕ, амоны ирон ӕмбисонд. Беллӕйӕн йӕ хуымы бӕркад цыма йӕ гонты дӕр нӕ бацӕудзӕн, афтӕ мӕм кӕсы. Нӕртон ӕфсир рауагътой. Ӕхсӕнадон бынӕтты, горӕтты, гъе кӕцы фӕнды хъӕуты уынгты ацыд, уӕд ӕм адӕм йӕ номӕй дзурын райдайынц, «нӕ мӕ хъуыды кӕныс, дӕ фӕрцы куы аирвӕзтӕн», «дӕ фӕрцы нын хъӕбул куы райгуырд», «бындар нын ды куы балӕвар кодтай» ӕмӕ бирӕ ӕндӕр зӕрдӕмӕхъаргӕ ныхӕстимӕ фырнымд, уӕздан сылгоймаджы уӕлӕрвтӕм сисынц сӕ цинтӕй. Фӕлӕ чи бахъуыды кӕндзӕн уыйбӕрц адӕмы номӕй номмӕ. 47 азмӕ цал сылгоймагӕн балӕггад кодта, уыдонӕн нымӕц дӕр нӕй. Абон дӕр Ирыстонӕй Мӕскуымӕ хуыздӕр дохтыртӕм медицинон ӕххуыс агурӕг чи ацӕуы, уыдон уым арӕх фехъусынц ахӕм дзуапп: «ӕмӕ ахӕм дард фӕндагыл уӕхи цӕмӕн батыхсын кодтат, уӕхимӕ диссаджы дохтыр куы ис, Хетӕгкаты Беллӕ».

Беллӕ йӕ цардӕмбал, зындгонд нывгӕнӕг, Хетӕгкаты Къостайы номыл Паддзахадон премийы лауреат, дзӕнӕты бадинаг Хетӕгкаты Хъазыбегимӕ фӕцадысты кӕрӕдзийӕн аргъ кӕнгӕйӕ. Хуыцау сын балӕвар кодта дыууӕ ныфсы: фырт Аслан ӕмӕ чызг Дзерассӕйы. Ныййарджыты кад кӕстӕртӕн фӕзминаг у. Сӕ дыууӕ дӕр сты Ирыстоны культурӕ ӕмӕ наукӕйы зиууонтӕ. Аслан йӕ фыды фӕндаг равзӕрста, у РЦИ-Аланийы сгуыхт нывгӕнӕг, Дзерассӕ — филологон наукӕты кандидат, алайнаг иртасӕнты институты наукон кусӕг. Хъазыбег кӕд раджы ацыд йе ‘цӕг дунемӕ, уӕддӕр йӕ фарн ныууагъта уӕлӕуыл йӕ кӕстӕртӕн. Беллӕ та, сылгоймаг уӕвгӕйӕ, уыйбӕрц хъаруджын разынд ӕмӕ иунӕгӕй сывӕллӕтты царды раст фӕндагыл сӕвӕрдта.

Беллӕ куысты тынг бӕрнон у. Йе ‘мкусджытӕ йын кӕнынц аргъ ӕмӕ кад йӕ профессионалон зонындзинӕдтӕ, арӕхстдзинад, адӕймаджы хуыздӕр миниуджытӕй хайджын кӕй у, уый тыххӕй. 1997 азӕй 2017 азмӕ Беллӕ разамынд лӕвӕрдта арӕндоны потологийы хайадӕн. У уӕлдӕр къӕпхӕны фӕлтӕрдджын дохтыр, цыфӕнды уӕззау операци дӕр бӕрзонддӕр уагыл чи сӕххӕст кӕндзӕн. ӕвирхъау уавӕры бахаугӕйӕ дӕр ссары амал. Зӕрдыл ӕрбалӕууы иу цау Багианы куыстӕй. Ӕрыгонӕй арӕндонмӕ кусынмӕ куы ӕрбацыд, уӕд ӕй иу бон санавиацимӕ тагъд ӕххуыс бакӕнынмӕ цӕуын бахъуыд Цыколамӕ. Уым иу ӕнхъӕлцау сылгоймаг фӕтыхст, ӕмӕ Беллӕ фӕфӕдисон. Операци кӕнгӕйӕ, сывӕллоны мады хуылфӕй куыд систа, афтӕ хъӕуы рухсытӕ ахуыссыдысты. Ныр зӕнӕгдоны дадзинты туг тынгдӕр фемӕхст ӕмӕ гыццыл ма бахъӕуа ӕвирхъау хабар ӕрцӕуа. Фӕлӕ нӕ дохтыр сарӕхст. Тугкалгӕ зӕнӕгдон йӕ армы бакодта ӕмӕ йӕ йӕ къухтӕй нылхъывта, цӕмӕй туг рӕстӕгмӕ баурома. Тӕссаг уыд сылгоймаг куы ӕрчъица уымӕй дӕр, уымӕн ӕмӕ анестезиолоджы бон дадзинты хос бауадзын нӕ уыд талынджы аххосӕй. Уӕдмӕ чидӕр фӕхабар кодта, хъӕуы уазӕгуаты кӕмӕдӕр ис дӕсны хирург Цӕрионы-фырт ӕмӕ йӕм Беллӕ ӕвӕстиатӕй хонӕг арвыста. Уый уайтагъд ӕнӕзивӕгӕй схӕццӕ, Беллӕ уӕддӕр зӕнӕгдон нӕ уӕгъд кӕны. Сылгоймагӕн йӕ дадзинтӕ ссардта, наркозы хос дзы бауагъта ӕмӕ уӕдмӕ кӕддӕр цырӕгътӕ дӕр ссыгъдысты ӕмӕ операци кӕронмӕ ахӕццӕ кодта. Уый уыд стыр хъӕбатырдзинад. Уыцы сылгоймаджы Беллӕ уӕдӕй фӕстӕмӕ никуыуал федта, нӕдӕр ын йӕ ном бахъуыды кодта, фӕлӕ йӕ арӕх ӕрымысы.

Канд Ирыстоны нӕ, фӕлӕ нӕ сыхаг республикӕтӕ ӕмӕ ӕндӕр сахарты цӕрджыты артдзӕстытӕй дӕр Беллӕйы фӕрцы бирӕ хӕттыты райхъуыст ноггуырдты цъӕхахст. Кӕцы дохтыр сыстдзӕн ӕхсӕвыгон йӕ хуыссӕнуатӕй йӕ рынчынӕн ныфсӕвӕрӕн ныхӕстӕ зӕгъынмӕ, йӕ хуыссӕны уӕлхъус бадгӕйӕ йын ныййарӕгау йӕ сӕр лӕгъзытӕ кӕнгӕйӕ? Ӕрмӕстдӕр Симоны чызг Беллӕ! Кӕцы дохтыр уаид куыстмӕ, йӕ ӕххуысӕй ныййарӕг чи ссис, уымӕн йӕ дӕларм лӕвӕрттӕ хӕсгӕ, кӕйдӕр циныл сывӕллонау цин кӕнгӕйӕ? Чи нӕ бауадзид йӕхицӕн аргъ ӕмӕ уӕлдай кад кӕнын, адӕмӕн цы лӕггӕдты бацыд, уый тыххӕй? Ӕрмӕстдӕр Симоны чызг Беллӕ! Чи загъта, дунейы музыкӕты ‘хсӕн мады гуыбынмӕ сывӕллоны зӕрдӕйы цавдмӕ хъусынӕй хуыздӕр музыкӕ, хуыздӕр зӕлтӕ нӕй, зӕгъгӕ? Хетӕгкаты-Багаты Беллӕ!

 

ТУАТЫ Жаннӕ, Дзӕуджыхъӕуы 2-ӕм арӕндоны сӕйраг дохтыр:

— Цыдӕриддӕр нӕ арӕндоны сывӕллӕттӕ, ныййарджытӕ, ног цардимӕ баст ис, уыдон иууылдӕр сты Хетӕгкаты Беллӕйы фарнӕй. Цы ӕгӕрон уды хъаруйӕ хайджын у, уымӕй ӕрмӕст мӕн нӕ бафтауы дисы. Цал сылгоймаджы ацыд амондджынӕй нӕ бӕстыхайӕ Беллӕйы уды, къухтӕ ӕмӕ зонындзинӕдты фарнӕй, уыдонӕн нымӕц нӕй. Уый у уыцы дохтыр, цы ӕнхъӕлцау сылгоймӕгтӕ йӕм хуыссы, уыдонӕй алкӕй ӕнӕниздзинады тыххӕй дӕр суанг лыстӕг хабӕрттӕ дӕр чи зоны. Йӕ куыстуарзондзинад, быхсондзинад, фӕлтӕрддзинад, удыхъӕды бӕрзонддӕр миниуджытӕ махӕн алкӕмӕн дӕр сты дӕнцӕг. Беллӕ у уыцы дохтыр, гӕнӕн цы хъуыддагӕн нӕ уыд, уый дӕр чи сӕххӕст кодта. Суинаг ныййарджытыл Беллӕ баузӕлы мадау. Йӕ дзыхы фӕлмӕн ныхас, йӕ цыргъ юмор дӕр сты сылгоймӕгтӕн ӕвдадзы хос. Кӕстӕртӕн у зондамонӕг хистӕр. Йӕ ахуыргонддзинад, ӕмӕ уӕздандзинад, интеллигентон удыхъӕд ирдӕй бӕрӕг дары, суанг нӕ бӕстыхай ӕфснайӕгмӕ дӕр, раст цыма паддзах у, ахӕм кад ын кӕй кӕны, алы адӕймагмӕ дӕр, фыццаджыдӕр, хорз миниуджытӕ кӕй уыны, уымӕй.

 

МАГКАТЫ Галинӕ, сылгоймӕгты 3-ӕм поликлиникӕйы дохтыр, Беллӕйы хӕлар, ӕмкурсон:

— Мах Беллӕимӕ иумӕ ахуыр кодтам. Уый иунӕг цыппар дӕр никуы райста медицинон институты ахуыр кӕнгӕйӕ. Йе ‘мбӕлттӕн уыд рӕстдзинады тырыса. Уӕдӕй абонмӕ нӕ хӕлардзинадыл къӕм абадын никуы бауагъта. Нӕ курсы цы ӕртӕсӕдӕ студенты уыд, уыдоны ‘хсӕн ахуыры кӕрон арфӕйы ныхас зӕгъыны бар радтой ӕрмӕстдӕр Беллӕйӕн ӕмӕ афтӕ рӕсугъд раныхас кодта ӕмӕ йӕм хъусынӕй не ‘фсӕстыстӕм. Йӕ фӕстӕ дзургӕйӕ мах, нӕ курсы студенттӕ, бахордтам Гиппократы ард. Беллӕ у, хӕларӕн раст аргъ кӕнын чи зоны, ахӕм адӕймаг. Ӕрыгонӕй цы фӕндаг равзӕрста, ууыл кӕронмӕ дӕр цӕуы кадимӕ, фарнимӕ, адӕмӕн удӕнцой, амонд хӕсгӕйӕ. Ахӕм адӕймӕгтӕ абон стӕм сты нӕ царды. Уымӕ гӕсгӕ йын хъуамӕ кӕнӕм фылдӕр аргъ. Арӕндонӕн, йӕ равзӕрст дӕсныйадӕн снывонд кодта йӕ цард, лӕггад ын кӕны удуӕлдайӕ ӕмӕ йӕ адӕмы хорзӕх уӕд.

 

Виктория РОДИОНОВА, Дзӕуджыхъӕуы 2-ӕм арӕндоны, хистӕр акушеркӕ:

— Хетӕгкаты Беллӕ у ахӕм дӕсны дохтыр, йӕ профессионалондзинадӕн абоны онг ӕмбал кӕмӕн нӕй. Мах иумӕ кусӕм 36 азы. Мӕхӕдӕг-иу ӕвдисӕн уыдтӕн ӕнхъӕлцау сылгоймӕгты уӕззау уавӕртӕн, хатгай-иу загътам, нал аирвӕздзӕн, фӕлӕ та-иу Беллӕ операцион блокмӕ куыддӕр бахызт, афтӕ-иу иннӕты дӕр цыдӕр ныфс бацыд ӕмӕ-иу диссагӕн ӕнӕрцӕугӕ нӕ уыд. Фӕлӕ иннӕтӕм диссаг цы каст, уый Беллӕйӕн уыд хуымӕтӕг хъуыддаг. Абоны онг дӕр йӕ хъус дары медицинӕйы ногдзинӕдтӕм ӕмӕ сӕ фыццӕгтимӕ ӕнтыстджынӕй пайда кӕны йӕ куысты. Суткӕйы цы 24 сахаты ис, уыдонӕй кӕцыфӕнды минут дӕр цӕттӕ у адӕмӕн ӕххуыс бакӕнынмӕ. Цы хорздзинад кӕны, уымӕй та бузныг никӕд никӕмӕй бацагуырдта. Йӕхӕдӕг куысты мидӕг куыд бӕрнон у, иннӕтӕй дӕр домы ахӕм бӕрнондзинад. Канд медицинӕ нӕ, фӕлӕ йӕ цымыдис кӕнынц алы темӕтӕ дӕр, адӕмон сфӕлдыстадӕй райдай ӕмӕ спортӕй фӕу, алкӕддӕр цӕттӕ вӕййы кӕцыфӕнды темӕйыл дӕр ӕрныхас кӕнынмӕ, ӕмӕ уымӕй у ноджы бафӕзминагдӕр. У арф ӕнкъараг зӕрдӕйы хицау. Ныртӕккӕ дӕр нӕм ӕнхъӕлцау сылгоймаджы тыхстӕй куы ӕрбаласынц, уӕд, фыццаджыдӕр, фӕдзурынц Хетӕгкаты Беллӕмӕ. Мах ын кӕнӕм стыр аргъ, у нӕ арӕндоны астӕуккаг цӕджындз.

 

ДЗИДАХАНТЫ-ХЪУЫСАТЫ Верӕ, Дзӕуджыхъӕуы цӕрӕг:

— Мах Беллӕимӕ базонгӕ стӕм 36 азы размӕ. Цӕвиттон, 1982 азы бахаудтӕн Дзӕуджыхъӕуы 2-ӕм арӕндонмӕ уӕззау рынчынӕй. Ӕртӕ мӕйы Беллӕ мӕ разы цырагъау лӕууыд, куыд мӕ дохтыр, куыд ӕппӕты хӕстӕгдӕр адӕймаг а зӕххыл, афтӕ. Уыцы ӕртӕ мӕймӕ ӕз уыцы Хуыцауысконд, сыгъдӕгзӕрдӕ, хуыздӕр миниуджытӕй ӕххӕст адӕймагыл афтӕ баууӕндыдтӕн, ӕмӕ йын мӕ цард йӕ къухты бакодтон.

1982 азы 26 декабрь мӕ царды ссис нысанхӕссӕг. Беллӕ цалдӕр боны арӕндоны нӕ уыд, уымӕн ӕмӕ йӕ гыццыл чызг Дзерассӕ фӕрынчын. Ӕхсӕвы ӕртӕ сахатыл бавзӕр дӕн. Дохтыртӕ мӕ алыварс скатай сты. Уыйбӕрц туг мӕ фӕцыд, ӕмӕ ма мӕ уд ӕрдуйыл хӕцыд. Хъару мӕм нал уыд, афтӕмӕй ма дардӕй дзурӕгау дохтырты ныхӕстӕ мӕ хъустыл уадысты. Загътой, дыууӕйӕ иу ӕвзаргӕйӕ, мады аирвӕзын кӕнӕм, нырма йыл 27 азы йеддӕмӕ нӕма цӕуы, сывӕллон уый фӕстӕ дӕр ныййардзӕн, зӕгъгӕ. Куы мӕ бафарстой, ууыл разы дӕ ӕви нӕ, уӕд мӕ фыр тарст ӕмӕ тыхстӕй загътон: «Разы дӕн». Уыцы рӕстӕг ӕз хъуыды кодтон мӕ хистӕр хъӕбулыл, нырма гыццыл уыд ӕмӕ, зӕгъын, цы фӕуыдзӕн. Уӕдмӕ хъустӕ ацахстой, Амыраны ныфс мӕ чи бауагъта, уыцы зонгӕ къӕхты хъӕр. Тыргъы тагъд-тагъд, дугъы уайӕгау, згъордта мӕ дохтыр Беллӕ, ӕмӕ мӕхинымӕр загътон: «Ныр ӕз дӕр цӕрдзынӕн ӕмӕ мӕ хъӕбул дӕр аирвӕздзӕн». Мӕ разы алӕууыд, йӕ къухӕй мын мӕ сӕр ӕрлӕгъз кодта ӕмӕ загъта: «Ма тӕрс, Верӕ, уӕ дыууӕ дӕр цӕрдзыстут». Дарддӕр ӕз ницыуал хъуыды кӕнын. Йӕ бар мӕ бакодтой, скодта мын операци. Бирӕ туг фесафгӕйӕ, мӕ зӕрдӕ йӕ куыстӕй ӕрлӕууыд ӕмӕ ма мӕ мӕхимӕ тыххӕй ӕрцӕуын кодтой. Куы ӕрчъицыдтон, уӕд кӕсын ӕмӕ пъолыл туджы ӕртӕхтӕ. Санитаркӕ сӕ хӕцъилӕй сӕрфы ӕмӕ мӕм куы фемдзаст, уӕд афтӕ зӕгъы, адон Беллӕ Семеновнайы туджы ӕртӕхтӕ сты, зӕгъгӕ. Беллӕимӕ нӕ туг ӕмхуызон рауад ӕмӕ мӕ фарсмӕ иннӕ хуыссӕныл ӕрхуыссыд, афтӕмӕй мын йӕ тугӕй цасдӕр балӕвар кодта, ӕмӕ ӕрмӕст уый фӕстӕ ӕрцыдтӕн мӕхимӕ. Мӕнӕн Беллӕ, куыд мӕ хуызӕн зын уавӕры бахауӕг бирӕ ӕндӕр сылгоймӕгтӕн, у мӕ ирвӕзынгӕнӕг. Уыцы бон ӕз райгуырдтӕн дыккаг хат. Цы хӕсджын мӕ уыд? Ӕппындӕр ницы. Фӕлӕ Беллӕ ӕндӕр хуызӕн цӕрын нӕ зоны. Йӕ цард снывонд кодта ӕнӕхъӕнӕй дӕр адӕмӕн лӕггад кӕнынӕн.

Куы мӕ рафыстой, уӕд мӕ мад Гуыбиаты Сафирӕт хуынимӕ ӕрбацыд Хетӕгкатӕм сӕ хӕдзармӕ, ӕмӕ Беллӕйӕ йӕхицӕн загъта чызг. Афтӕмӕй мӕнӕн уӕдӕй фӕстӕмӕ у мӕ хо, мӕ дадзинты уайы йӕ туг. Кӕм ссарон ӕз уыцы адӕймаджы аргъ ныхӕстӕ? Мӕ фыртыл сӕвӕрдтам ном Андрей, афтӕ йӕ хуыдта Беллӕ гуыбынмӕ, сӕумӕрайсом-иу мӕм палатӕмӕ куы ӕрбауад, уӕд йемӕ ныхӕстӕгӕнгӕйӕ. Абон Андрей у царды ӕнтыстджын. Йӕ цардӕмбал Дзидаханты-Хъодзаты Маринӕ дӕр у сылгоймӕгты дохтыр. Маринӕйы дӕр ординатурӕйы ахуыр кӕнгӕйӕ, бирӕ фӕрӕвдыдта Беллӕ, сахуыр ӕй кодта сӕ дӕсныйады сусӕгдзинӕдтыл. Афтӕ йын фӕзӕгъын, Беллӕйы хуызӕн дохтыр дӕ куы нӕ рауайа, уӕд дӕ куыст ныууадз. Уӕрӕсейы рынчындӕтты дӕр вӕййын мӕ ӕнӕниздзинады уавӕрмӕ гӕсгӕ, фӕлӕ ӕз Беллӕйы хуызӕн дохтырыл никуы сӕмбӕлдтӕн.

Мах Беллӕимӕ куы фембӕлӕм, уӕд хъӕбыстӕ нӕ фӕкӕнӕм. Ӕз ын райсын, цы дыууӕ къухы мӕ фервӕзын кодтой, уыдон, мӕ риумӕ сӕ нылхъивын ӕмӕ сын фӕкӕнын батӕ. Мӕ хойы къухтӕн батӕ… Мӕ хӕдзары Беллӕ у бинонтыл нымад. Ӕнӕрхъуыдыйӕ мын цы бон баззайа, уыцы бон ӕгас нал дӕн.

 

УАТАТЫ Людмилӕ, Дзӕуджыхъӕуы цӕрӕг:

— 2001 азы 2 мартъи мӕ бинонтӕн баззад уӕлдай зӕрдылдаринагӕй. Дыууӕ мӕйы фӕстӕ ма нӕ бинонтыл хъуамӕ бафтыдаид иу хъӕбул, фӕлӕ уыцы ӕхсӕв фӕтыхстӕн ӕмӕ Дзӕуджыхъӕуы дыккӕгӕм арӕндоны ӕппӕт дохтыртӕ дӕр ӕртӕ сахаты ӕмӕ ӕрдӕг тох кодтой мӕ цардыл. Сывӕллон нал аирвӕзт. Ӕвзӕрӕй-ӕвзӕрдӕр куы кодтон, уӕд фӕфӕдис сты Хетӕгкаты Беллӕмӕ хӕдзармӕ ӕмӕ уайтагъд мӕ уӕлхъус ӕрбалӕууыд. Йӕ дыууӕ сыгъзӕрин къухы, йӕ арф медицинон зонындзинӕдтӕ ӕмӕ фӕлтӕрддзинады фӕрцы мӕ раздӕхтой фӕстӕмӕ цардмӕ. Операцигӕнӕн стъолыл цалдӕр минуты мӕ зӕрдӕ йӕ куыстӕй кӕй ӕрлӕууыд, уый ӕз фӕстӕдӕр базыдтон, мӕ цӕстытӕ байгом кӕнгӕйӕ мӕ алыварс дохтыртӕ, медицинон хотӕ мӕ базмӕлдӕй фырцинӕй хӕрдмӕ хаугӕ, «фӕуӕлахиз стӕм», зӕгъгӕ, хъӕргӕнгӕ куы федтон, уӕд.

Куыд радзырдтой, афтӕмӕй уымӕй гыццыл раздӕр та тыргъмӕ мӕ цардӕмбалмӕ сӕркъулӕй рахызт анестезиолог, ома, дӕ бинойнаг йӕ цардӕй ахицӕн, зӕгъгӕ, махӕй аразгӕ цы уыд, уыдон иууылдӕр скодтам. Уый дохтырты ныхӕстыл ӕппындӕр не ‘ууӕндыд ӕмӕ, дыууӕрдӕм рауай-бауай кӕнгӕйӕ, хъӕр кодта: «Нӕ, уымӕн гӕнӕн нӕй, ӕз ӕй фӕстӕмӕ куы сарӕзтон! Уымӕн гӕнӕн нӕй!». Йӕ ныхӕстӕ йын ничи ӕмбӕрста. Уый фӕстӕ Зелим радзырдта, дыууӕ боны размӕ цы фын федта, уый. Цӕвиттон, нӕ хӕдзары цы амад каминпец ис, уый йӕ фыны ныккалд ӕмӕ ма, дам, ӕм рӕвдз бауадтӕн ӕмӕ йӕ фӕстӕмӕ ацарӕзтон. Пец йӕ раздӕры хуыз райста, ӕрмӕст ма йыл фӕрсӕрдыгӕй лыстӕг халау хъӕдгом баззад. Зелимы фын ӕцӕг ӕрцыд. Уыцы райсом мӕ фӕдзӕхсгӕ дӕр ма кодта, цыдӕр ӕнахуыр фын федтон ӕмӕ мӕ фыдӕнхъӕл ма фӕкӕн, зӕгъгӕ. Уый фӕстӕ бамбӕрстам хабӕрттӕ, хъӕдгом та мӕ операцийы бынат кӕй нысан кодта, уый. Мӕ разы лӕууыд, зӕххыл мӕ уыцы уысм ӕппӕты стырдӕр ныфс кӕмӕй бацыд, мӕ цардыл мӕлӕтимӕ тохы чи бацыд ӕмӕ дзы уӕлахиздзау чи ссис, уыцы зӕды хуызӕн сылгоймаг йӕ урс-урсид халаты. Беллӕ канд мӕныл нӕ, фӕлӕ иннӕ сылгоймӕгтыл дӕр аудыдта, карк йӕ бӕдултыл куыд фӕтыхсы ӕмӕ сӕ куыд фӕхъахъхъӕны, афтӕ. Мӕнӕн мӕ риу дзаг у ацы стыр кады аккаг адӕймагмӕ уарзондзинады ӕнкъарӕнтӕй.

Дзӕуджыхъӕуы 2-ӕм арӕндон мӕнӕн ссис мӕ дыккаг хӕдзар. Уӕды сӕйраг дохтыр Гасситы Светланӕ, профессор Цӕллагты Людмилӕ, анестезиолог Бабиты Юри, дохтыр Нинӕ Чарьянц, УЗИгӕнӕг Фардзинты Изетӕ, дохтыр Джыккайты Людмилӕ ӕмӕ арӕндоны кусджытӕ иууылдӕр, ӕмткӕй райсгӕйӕ, мӕнӕн систы хи бинонтау. Афтӕ чи зӕгъа, Ирыстоны хорз дохтыртӕ нӕй, уый раст нӕ уыдзӕн. Никуы мӕ ферох уыдзӕн, мӕ чызг Тамарӕ куы гуырд, уӕд дӕр Беллӕ ӕхсӕвы йӕ цӕст кӕй не ‘рцъынд кодта, скодта мын ӕппӕт хъӕугӕ мадзӕлттӕ дӕр. Мыдадзын цырагъау куыд сыгъдис, афтӕ абон дӕр йӕ уды фарнӕй лӕггад кӕны сылгоймӕгтӕн ӕмӕ уымӕй фидардӕр кӕны Ирыстоны абон ӕмӕ фидӕн йӕ демографийы руаджы. Йӕ уды фарн ӕмӕ арф зонындзинӕдты фӕрцы цы бирӕ ӕнӕниз сывӕллӕттӕ райгуырд Дзӕуджыхъӕуы дыккӕгӕм арӕндоны, уыдонӕн нымӕц нӕй. Уӕдӕй абонмӕ дзӕвгар рӕстӕг рацыд, фӕлӕ иунӕг бон дӕр ахӕм нӕ уыд, Беллӕ мӕ зӕрдыл цы бон ма ӕрлӕууӕ. Уый мӕн ӕрмӕст мӕлӕтӕй нӕ аирвӕзын кодта, фӕлӕ бахъахъхъӕдта Уататы хӕдзары артдзӕст ӕмӕ абон у хъарм, нӕ хъӕбултӕн ис ныййарӕг мад, къонайы — ӕфсин. Мӕ сӕрӕй ныллӕг кувын Беллӕйӕн ӕмӕ йын зӕгъын бузныг. Уӕвгӕ та, йӕ лӕггӕдтӕн дзыхы ныхасӕй аргъ скӕнӕн нӕй.

Хетӕгкаты Беллӕ Ирыстонӕн цы лӕггӕдты бацыд, уый тыххӕй хъуамӕ афонмӕ хорзӕхджынгонд ӕрцыдаид ӕппӕты бӕрзонддӕр хорзӕхтӕй ӕмӕ кадджындӕр нӕмттӕй, фӕлӕ йын йе ‘вӕрӕнтӕм ӕркӕс, уӕд дзы ис, рӕстӕджы цыдӕй чи фӕбур, ӕрмӕст ахӕм цыппар Кады гӕххӕтты. Уӕвгӕ, Паддзахадон хорзӕхтӕ райсын Беллӕйӕн йӕ бӕллиц никуы уыдысты, нӕдӕр сӕм тырныдта. Уымӕн ӕмӕ ӕппӕты фылдӕр аргъ кӕны, адӕмы ‘хсӕн ын цы кад ис, уымӕн. Йӕ фырнымддзинад, фидар граждайнаг позици, уды бӕркад ӕмӕ сыгъдӕгдзинад, алкӕй рыстыл хи рисау хъыггӕнӕг, рӕстдзинадыл дзурӕг, адӕмы хорзмӕ бӕллӕджы йӕхи уд барӕвдауынмӕ ӕппындӕр никуы равдӕлд дзыллӕйӕн лӕггад кӕнынӕй. Адӕмы цӕрайӕ цӕры, зӕгъгӕ, Беллӕйы хуызӕттӕй фӕзӕгъынц. Абоны онг бӕрзонд хӕссы сылгоймаджы, хойы, дохтыры, мады, ӕфсины, нанайы ном. У адӕмӕн сӕ ныфс. Йӕ юбилейы фӕдыл ын зӕрдиаг арфӕтӕ кӕнынц газет “Рӕстдзинад”-ы кусджытӕ. Ирыстонӕн удуӕлдай лӕггад кӕныс, ӕмӕ дӕ йӕ хорзӕх уӕд! Мады-Майрӕмы фӕдзӕхст у дӕ уарзон бинонтимӕ!

 

Дохтыры лӕггӕдтӕн аргъгӕнӕг сылгоймӕгты номӕй — ГАБЕТЫ Ангелинӕ

ОСТАВЬТЕ ОТВЕТ

Please enter your comment!
Please enter your name here