Цӕрӕнуӕттӕ — ӕрыгон бинонтӕн

0
169

 

Цӕгат Ирыстоны хицаудзинад фӕнысан кодтой республикӕйы цӕрӕг 224 ӕрыгон бинонты цӕрӕнуӕтты уавӕртӕ фӕхуыздӕр кӕнын. 2008 азӕй фӕстӕмӕ ӕрвылаз ӕрыгон бинонтӕн цӕрӕнуӕттӕ райсыны ӕвдисӕндартӕ 40-ӕй фылдӕр нӕ лӕвӕрдтой.

Знон Дзӕуджыхъӕуы бынӕттон хиуынаффӕйады администрацийы агъуысты ӕрыгон бинонтӕн лӕвӕрдтой цӕрӕнуӕтты сертификаттӕ. Уыцы ӕхсызгон мадзал байгом кодта Дзӕуджыхъӕуы администрацийы сӕргълӕууӕг Ӕлбегаты Барис. Цӕрӕнуӕттӕ фӕхуыздӕр кӕныны тыххӕй ӕвдисӕндартӕм чи ӕрбацыд, уыцы ӕрыгон бинонтӕн раарфӕ кодта, уый ныхасы бар радта республикӕйы Сӕргълӕууӕг Битарты Вячеславӕн.

— Ӕрыгон бинонты цӕрыны фадӕттӕ фӕхуыздӕр кӕнынӕй ма ӕхсызгондӕр хабар цы уа, уӕлдайдӕр та абон сӕ зӕрдӕ кӕмӕн барухс кӕндзыстӕм, уыдон стут сымах, 81 ӕрыгон бинонтӕ. Ӕз бузныг зӕгъын Дзӕ уджыхъӕуы бынӕттон хиуынаффӕйады администраци ӕмӕ республикӕйы Арӕзтад ӕмӕ архитектурӕйы министрадӕн. Уыдоны зӕрдиаг ӕмӕ хъӕппӕрисджын архайды руаджы абон сымах, 81 ӕрыгон бинонтӕ, райсдзыстут цӕрӕнуӕтты сертификаттӕ. Уыдонмӕ гӕсгӕ уӕ бон уыдзӕн, цы цӕрӕнуӕттӕ ӕлхӕнат кӕнӕ аразат, уыдонӕн ӕрмӕст сӕ аргъы 35 проценты бафидын. Сымахӕн уӕ хӕс у бинонтӕ фылдӕр кӕныныл архайын, мах та араздзыстӕм ӕппӕт дӕр уӕ цӕрӕнуӕтты уавӕртӕ фӕхуыздӕр кӕнынӕн, — загъта Битарты Вячеслав ӕмӕ бавнӕлдта ӕрыгон бинонтӕн цӕрӕнуӕтты сертификаттӕ дӕттынмӕ.

Республикӕйы Сӕргълӕууӕг цӕрӕнуӕтты сертификаттӕ арфӕйы ныхӕстимӕ кӕмӕн радта, уыдон уыдысты, 3-4 сы- вӕллоны кӕмӕн ис, ахӕм ӕрыгон бинонтӕ. Уыцы бирӕсывӕллонджынтӕ сты Биазырты Зӕлинӕ, Маринӕ Андреева, Плиты Алан, Татьянӕ Голованова, Багаудин Гаджиев, Болататы Давиды ӕрыгон бинонтӕ. Цин ӕмӕ ӕхсызгондзинад кӕй зӕрдӕты абухта, уыцы ӕрыгон бинонтӕн арфӕтимӕ цӕрӕнуӕтты ӕвдисӕндартӕ дарддӕр радтой РЦИ-Аланийы арӕзтад ӕмӕ архитектурӕйы министр Икъаты Русланбег ӕмӕ Дзӕуджыхъӕуы бынӕттон хиуынаффӕйады администрацийы сӕргълӕууӕг ӕлбегаты Барис.

Ацы ӕхсызгон хабар арӕзт ӕрцыд федералон паддзахадон программӕ «Уӕрӕсейы Федерацийы граждӕнтӕн коммуналон лӕггӕдтӕ фӕхуыздӕр кӕнын, аслам ӕмӕ сын хӕрзвадат цӕрӕнуӕттӕ раттын», стӕй республикон программӕ «ӕрыгон бинонтӕн цӕрӕнуӕттӕ раттын»-мӕ гӕсгӕ. Паддзахадон программӕ «Хъӕуты ӕнӕфӕцудгӕ рӕзтӕн»-мӕ гӕсгӕ Цӕгат Ирыстоны хъӕуты цӕрӕнуӕттӕ чи ӕлхӕна, уыдонӕн 2018 азы субсидиты хуызы дихгонд ӕрцӕудзӕн 25 милуан сомы.

КАСАТЫ Батрадз

ОСТАВЬТЕ ОТВЕТ

Please enter your comment!
Please enter your name here