Уӕлахизы 73 азы агъоммӕ

0
192

 

Ноджыдӕр ма 73 азы куы рацӕуа, уӕддӕр советон адӕмы байзӕддӕгтӕй нӕ ферох уыдзӕн, 1941 азӕй 1945 азы онг, махӕн абон сӕрибар цард цӕмӕй уа, уый тыххӕй цы цардхъуаг хӕстонты туг ныккалд Фыдыбӕстӕйы Стыр хӕсты, уый. Уыдон нын сӕ хъарм туджы ӕртахӕй балхӕдтой сӕрибар цард. Уымӕ гӕсгӕ сын сӕ ном мысынӕн ӕрмӕст 9 май хъуамӕ ма уа, фӕлӕ алы бон дӕр, хъуамӕ хуымӕтӕг дон нуазгӕйӕ дӕр уыдонӕн арӕм сӕ ном

Уый уӕвгӕ афтӕ кӕй у, ууыл гуырысхо нӕ кӕнӕм. Фӕлӕ уӕддӕр уӕлдай хъӕӕппӕрисджындӕрӕй нӕхи бацӕттӕ кӕнӕм 9 маймӕ. Афтӕ та у ацы аз дӕр, нӕ Ирыстоны фӕсивӕд ацы боны агъоммӕ алыхуызон мадзӕлттӕй уӕлдай, мӕй раздӕр расидынц акци «Георгиевская ленточка». Ацы акцийы фӕлгӕты Ирыстоны алы къуымты байуарынц лентытӕ. Уаргӕ та сӕ фӕкӕнынц, афӕдзы дӕргъы фӕсивӕды ӕхсӕнадон царды йӕхи хуыздӕр чи равдисы, уыдон.

Ацы аз ацы акци расидтысты нӕ республикӕйы Фӕсивӕды хъуыддӕгты комитет ӕмӕ паддзахадон автономон кусӕндон «РЦИ- Аланийы фӕсивӕды ӕфсӕддон-патриотон хъомылады центр». Мадзалмӕ ӕрбахуыдтой РЦИ-Аланийы Ветеранты советы сӕрдары хӕдивӕг, булкъон Леонид Зенковы, хӕсты ӕмӕ ӕфсӕддон службӕйы ветеранты комитеты сӕрдар, булкъон Азиты Алыксандры, «РЦИ-Аланийы десантникты цӕдис»-ы разамонӕг Золойты Игоры, Хӕлардзинады республикон хӕдзары сӕрдары хӕдивӕг Хъайтыхъты Тамарӕйы, газет «Рӕстдзинад»-ы сӕрмагонд уацхӕссӕг Касаты Аслӕнбеджы. Адон кадджын уавӕры, сӕхи афӕдзы дӕргъы хуыздӕр чи равдыста фӕсивӕды ӕхсӕнадон царды, уыдонӕн радтой сӕрмагонд риуылдаргӕ нысантӕ ӕмӕ, адӕмӕн уынгты кӕй уардзысты, ахӕм лентытӕ.

РЦИ-Аланийы фӕсивӕды ӕфсӕддон-патриотон хъомылады центры уӕнгтӕ Тъехты Эльбрус ӕмӕ Цыбырты Хетӕг куыд загътой, афтӕмӕй сын ӕрвылаз дӕр вӕййы тынг ӕхсызгон ацы акцийы архайын. «Ацы лентӕ адӕймаджы риуыл куы вӕййы, уӕд цыма уӕнгтӕ рогдӕр вӕййынц, афтӕ мӕм фӕкӕсы…» — загъта Тъехы- фырт.

Золойты Игорь фӕсивӕдмӕ фӕсидт ӕмӕ сын фехъусын кодта, фаронӕй фӕстӕмӕ Уӕрӕсейы хаст кӕй ӕрцыд закъон, кӕцымӕ гӕсгӕ Георгийы лент дарӕн ис ӕрмӕстдӕр риуыл галиуӕрдыгӕй, машинӕйы фӕстаг рудзынгыл — мидӕгӕрдыгӕй. ӕндӕр бынаты кӕмӕн уа, уый ӕмбӕлгӕ ведомствоты бон у фӕивар кӕнын…

Акцийы кӕронбӕттӕны фӕсивӕд систой чысыл киноныв ӕмӕ Георгийы лент апарахат кӕныны фӕдыл эстафетӕ алӕвӕрдтой Кӕсӕг-Балхъары республикӕйы фӕсивӕдмӕ…

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here