Бӕстон ныхас — национ мыхуыры уавӕр ӕмӕ дарддӕры райрӕзтыл

0
310

Республикон адӕмон газет «Рӕстдзинад» йӕ 95 азы юбилейы фӕдыл афӕдзы дӕргъы цы бирӕ ахсджиаг хъуыддӕгтӕ снысан кодта, уыдонӕй иу арӕзт ӕрцыд знон — юбилейы фӕлгӕты Дзӕуджыхъӕуы йӕ куыст кодта дунеон конференци «Национ мыхуырӕн йӕ абоны уавӕр ӕмӕ дарддӕры рӕзты нысантӕ». Конференци саразӕг уыдысты республикӕйы Мыхуыры хъуыддӕгтӕ ӕмӕ дзыллон коммуникациты комитет, республикӕйы Национ ахастдзинӕдты фарстаты фӕдыл министрад ӕмӕ газет «Рӕстдзинад».

Конференцийы куысты архайдтой Цӕгат Кавказы федералон зылды ӕмӕ Уӕрӕсейы дзыллон информацийы фӕрӕзты разамонджытӕ, хицаудзинады паддзахадон оргӕнты бӕрнон кусджытӕ, ахуыргӕндтӕ, ӕхсӕнадон организациты минӕвӕрттӕ. Уымӕй уӕлдай конференцимӕ хуынд ӕрцыдысты Уӕрӕсейы национ дзыллон информацийы фӕрӕзты ассоциацийы правленийы разамонджытӕ ӕмӕ Хуссар Ирыстоны минӕвӕрттӕ. Конференци амонӕг уыд Ассоциацийы правленийы сӕрдар, Республикӕ Саха (Якутийы) ӕнӕххӕст бӕрнондзинады ӕхсӕнад «Медиагруппа «Ситим»-ы генералон директор Мария Христофорова.

Республикӕ Цӕгат Ирыстон — Аланийы Сӕргълӕууӕг Битарты Вячеславы номӕй конференцийы архайджытӕ ӕмӕ уазджытӕн зӕрдиаг арфӕ ракодта рес- публикӕйы Хицауады Сӕрдары хӕдивӕг Анатолий Поляков:

«Цӕгат Ирыстоны Сӕргълӕууӕджы номӕй, стӕй республикӕйы Хицауады номӕй зӕрдиаг арфӕ кӕнын конференцийы архайджытӕн. Национ мыхуыры уавӕр у ахсджиаг фарста. Йӕ ахсджиагдзинад ноджы ирддӕрӕй бӕрӕг дары, конференци нӕ республикӕйы адӕмон газет «Рӕстдзинад»-ы юбилейы фӕлгӕты арӕзт кӕй ӕрцыд, уымӕй. Национ культурӕ, ӕвзаг, ӕрыгӕтты хъомылады рӕзт ӕнгом баст сты национ мыхуыры рӕзтимӕ, ӕмӕ сын фӕхицӕн кӕнӕн нӕй», — загъта уый. Йӕ ныхасмӕ гӕсгӕ, мадӕлон ӕвзаг, ирон адӕмы удварн ӕмӕ культурӕ бахъахъхъӕнынӕн ахӕм конференцитӕ сты ахъаз, фӕлӕ йӕ фыццаг къахдзӕф адӕймаг акӕны йӕ хӕдзары, алцыдӕр райдайы бинонтӕй, ӕмӕ, фыццаджыдӕр, бинонты ‘рдыгӕй хъуамӕ уа фаг ӕргом здӕхт национ удварны бындуртыл кӕстӕрты хъомылады фарстатӕм. «Конференцийы куыст ӕнтыстджын уӕд. Мӕ зӕрдӕ уын зӕгъы, цӕмӕй газеткӕсджыты нымӕц фылдӕр кӕна», — загъта Анатолий Поляков.

«Нӕ конференци у ӕцӕг дунеон, уымӕн ӕмӕ йӕм ӕрцыдысты канд Цӕгат Кавказы республикӕты мыхуыры фӕрӕзты минӕвӕрттӕ нӕ, фӕлӕ Хуссар Ирыстонӕй, Мӕскуыйӕ, Якутийӕ, ис нӕм уазджытӕ суанг Белоруссийӕ дӕр». Йӕ ныхасмӕ гӕсгӕ, мыхуыры фӕрӕзтӕ абон сты паддзахады ӕххуысхъуаг, дыууӕ-ӕртӕ хатты фыл- дӕр ӕххуысхъуаг та сты национ мыхуыры фӕрӕзтӕ. «Уымӕ гӕсгӕ мӕ зӕрдӕ дарын, конференцийы куысты рӕстӕг нӕ къухы кӕй бафтдзӕн ахӕм мадзӕлттыл бакусын, цӕмӕй, национ мыхуыры абон цы бирӕ фарстатӕ ис, уыдон алыг кӕнын нӕ бон бауа», — загъта нӕ республикӕйы Мыхуыры ӕмӕ дзыллон коммуникациты комитеты сӕрдар, конференцийы оргкомитеты сӕрдар Фидараты Юри.

 

Дзурынц дунеон конференци “Национ мыхуыры фӕрӕзты нырыккон уавӕр ӕмӕ сӕ райрӕзт”-ы архайджытӕ

БИТАРТЫ Маринӕ, газет «Рӕстдзинад»-ы сӕйраг редактор:

«Национ дзыллон хабархӕссӕг фӕрӕзтӕ хъахъхъӕнынц ӕмӕ фылдӕр кӕнынц адӕмы удварны хӕзнатӕ ӕмӕ традицитӕ, хъӕздыгдӕр кӕнынц сӕ культурӕ»

«Нӕ зынаргъ уазджытӕ, ӕхсызгонӕй уыл ӕмбӕлӕм Ирыстоны уазӕгуарзаг зӕххыл. Цӕгат Ирыстон- Аланийы Республикӕ йӕ фӕзындӕй фӕстӕмӕ ӕппӕт Кавказы дӕр нымад у, бирӕ адӕмыхӕттытӕ кӕм цӕры, ахӕм бынатыл. Ам баиу ӕмӕ ӕрфидар сты алыхуызон национ, культурон ӕмӕ дины традицитӕ. Уӕрӕсейы адӕмтӕ, куыд иу нацийы минӕвӕрттӕ сфидар кӕнын — нырыккон фарстатӕн сӕ ахсджиагдӕр. Уыцы фарста алыг кӕныныл хъуамӕ бацархайой алыхуызон ӕхсӕнадон институттӕ: паддзахад, ахуырад, бинонтӕ. Сӕйрагдӕр хӕс хауы национ дзыллон хабархӕссӕг фӕрӕзтӕм. Уыдон хъахъхъӕнынц ӕмӕ фылдӕр кӕнынц адӕмы удварны, хӕрзӕгъдаудзинады хӕзнатӕ, традицитӕ, хъӕздыгдӕр кӕнынц культурӕ», — афтӕ райдыдта йӕ ныхас газет «Рӕстдзинад»-ы сӕйраг редактор Битарты Маринӕ.

Куыд бамбарын кодта, афтӕмӕй уыцы хӕзнатӕ ӕмӕ уӕрӕсейаг ӕхсӕнады бын- дуртӕ сты бӕстӕйы национ ӕдасдзинады ахъаззаг рахӕцӕнтӕ. Газеты сӕйраг редактор куыд фӕбӕрӕг кодта, афтӕмӕй национ-культурон традицитӕ сӕхиуыл кӕй схӕцыдысты, уымӕн ис стыр ахадындзинад, уымӕн ӕмӕ нырыккон Уӕрӕсе ӕппынӕдзух ӕмбӕлы ӕддагон тӕссагдзинӕдтимӕ. Афтӕмӕй хъуамӕ уӕрӕсейаг бирӕнацион паддзахад фидардӕргӕнгӕ цӕуа. «Комкоммӕ национ газеттӕ ӕмӕ журналтӕ сты ӕвзаг, традицитӕ ӕмӕ культурӕ хъахъхъӕнджытӕ, ӕнӕ уыдонӕй та адӕймагӕн патриот суӕвын зын у. Фыццагдӕр уал йӕ уарзондзинад райдайы йӕ чысыл Фыдыбӕстӕйӕ, уырдыгӕй рахизы не стыр Уӕрӕсемӕ», — загъта Битарты Маринӕ.

Ныхасгӕнӕг фӕбӕрӕг кодта, национ газеттӕ Уӕрӕсейы Посты ӕргъты политикӕйы тыххӕй цы зындзинӕдтимӕ ӕмбӕлынц, уыдон дӕр. Зындгонд куыд у, афӕмӕй национ фӕрӕзты кусджытӕн фадат нӕй журналистты ерысты архайынӕн, сӕ домӕнтӕм гӕсгӕ ӕппӕт ӕрмӕджытӕ хъуамӕ тӕлмацгонд ӕрцӕуой уырыссаг ӕвзагмӕ. Афтӕмӕй сӕфы ӕрмӕгӕн йӕ апп, йӕ хӕдбындурдзинад. «Куыд зонӕм, афтӕмӕй абон национ ӕмӕ уырыссаг ӕвзӕгтӕ ахуыр кӕныны ис бирӕ алыхуызон зындзинӕдтӕ, уый бӕрӕг дары, национ ӕвзӕгтыл цы газеттӕ ӕмӕ журналтӕ цӕуынц, уыдонӕн уацхӕсджытӕ цӕттӕ кӕныны хъуыддагыл. Газет «Рӕстдзинад»-ӕн фидар бастдзинӕдтӕ ис Цӕгат Ирыстоны паддзахадон университеты ирон филологийы факультетимӕ. Студенттӕ ӕппынӕдзух вӕййынц редакцийы, сӕ курдиат ӕвдисынц практикӕйы фӕрцы. Хорз уаид, университеты журналистикӕйы факультеты национ хайад фӕстӕмӕ куы байгом уаид, уӕд. Ацы фембӕлдмӕ цы ахсджиаг ӕмӕ ахадгӕ фарстатӕ рахастам, уыдоныл ӕрдзургӕйӕ, ӕвӕццӕгӕн, национ дзыллон хабархӕссӕг фӕрӕзты риссагдӕр хъуыддӕгтӕ лыггонд ӕрцӕудзысты», — ахӕм хатдзӕг скодта газет «Рӕстдзинад»-ы сӕйраг редактор Битарты Маринӕ

ХЪОТАЙТЫ Мария, Хуссар Ирыстоны Мыхуыры ӕмӕ информацийы комитеты сӕрдар: “Дзыллон фӕрӕзтӕн ис стыр тых”

«Конференци цы фарстайы фӕдыл ӕрӕмбырд, уымӕн йӕ ахсджиагдзинад ӕмбаргӕйӕ, Хуссар Ирыстонӕй ссыдыстӕм стыр делегацийӕ, немӕ сты Фысджыты цӕдисы сӕрдар Хъазиты Мелитон, газет «Хурзӕрин»-ы сӕйраг редактор Биазырты Роланд, ахуыргӕндтӕ, лингвисттӕ», — загъта уый. Йӕ ныхасмӕ гӕсгӕ, абон дуне ӕнӕхъӕнӕй дӕр Интернет куы бацахста, ахӕм рӕстӕг уӕлдай ахсджиагдӕр ссис национ мыхуыры фӕрӕзтӕ бахъахъхъӕныны фарста. «Уый ӕмбаргӕйӕ, нӕ Республикӕйы Президент Бибылты Анатоли ӕрвылмӕй дӕр ӕхцайы ӕххуыс бакӕны газет «Хурзӕрин»-ӕн. Махӕн ис нӕхи газеткӕсӕг. Уыдон сты, дӕрддзӕф хъӕутӕ ӕмӕ поселокты чи цӕры, уыцы адӕм», — дзырдта Мария. Куыд загъта, афтӕмӕй информацийы дзыллон фӕрӕзтӕн ис стыр тых, адӕмы баиу кӕнын дӕр сӕ бон у, стӕй сӕ ныхӕй-ныхмӕ ӕрлӕууын кӕнын дӕр. Ацы миниуӕг уӕлдай тынгдӕр рабӕрӕг вӕййы политикон змӕстытӕ ӕмӕ ӕндӕр быцӕуты. Уымӕ гӕсгӕ абоны уавӕртӕ журналистӕй домынц бӕстон зонындзинӕдтӕ, дӕсны ӕмӕ быхсондзинад, суанг куырыхондзинад дӕр.

ПЛИТЫ Гацыр, Хуссар Ирыстоны паддзахадон университеты ирон литературӕйы кафедрӕйы сӕргълӕууӕг:

“Ирон ӕвзаг, ирон культурӕ ӕмӕ ӕгъдӕуттӕ хъахъхъӕны «Рӕстдзинад»”

«Нӕ бинонтӕ алкӕддӕр фыстой «Рӕстдзинад» ӕмӕ гыццылӕй фӕстӕмӕ кастӕн ацы газет. Æхсӕнадон царды ӕппӕт ахсджиаг фарстаты фӕдыл дзы алкӕддӕр уыд бакӕсӕн. Уӕдӕ ирон ӕвзаг, ирон культурӕ ӕмӕ ӕгъдӕуттӕ бахъахъхъӕныныл «Рӕстдзинад»-ы хуызӕн иунӕг дӕр нӕ тох кӕны». 95 азы 95 боны не сты, Ирыстоны царды цыдӕриддӕр исто- рион цаутӕ уыд, се ‘ппӕтимӕ дӕр «Рӕстдзинад» ӕмдзу кодта. Афтӕмӕй йӕ ном бахъахъхъӕдта ӕмӕ йӕ стыр кадимӕ хӕссы абон дӕр. «Рӕстдзинад»-ы рӕзтмӕ стыр бавӕрӕн бахастой йӕ раздӕры редактортӕ Хъаныхъуаты Валодя ӕмӕ Хъесаты Валодя, ӕмӕ уыдон цы бынтӕ ӕмӕ цы фӕлтӕрддзинад ныууагътой, уыдон хъӕуы бахъахъхъӕнын. «Рӕстдзинад»-ы ӕххуыс нӕ хъӕуы, хъӕуы йӕ, цӕмӕй алкӕддӕр уӕм йӕ фарсмӕ, уый тыххӕй та йӕ хъӕуы фыссын ӕмӕ кӕсын, — бафиппайдта Плийы-фырт.

 Мария ХРИСТОФОРОВА, Уӕрӕсейы национ мыхуыры фӕрӕзты Ассоциацийы сӕрдар «Хӕрзхъӕд ӕмӕ мидисджын этникон прессӕ хъӕуы ӕрмӕстдӕр йӕ адӕмыхатты ӕмӕ паддзахады»

Конференцийы амонӕг, Уӕрӕсейы национ мыхуыры фӕрӕзты Ассоциацийы сӕрдар «Медиагруппа «Ситим»-ы генералон директор Мария Христофорова (Республикӕ Саха) бӕстон ӕрныхас кодта национ ӕвзӕгтыл цӕуӕг нырыккон дзыллон хабархӕссӕг мыхуыры фӕрӕзты уавӕр ӕмӕ рӕзты тыххӕй. Цы хатдзӕгтӕ ӕрхаста, уымӕ гӕсгӕ Уӕрӕсейы 2017 азы уыдис 53 910 регистрацигонд мыхуыры фӕрӕзы, 2014 азы та — 64 мин фӕрӕзы

«Кӕд ма посты тарифтӕ фӕфылдӕр кӕныны агъоммӕ национ газеттӕ ӕмӕ журналтӕ сӕ тиражтӕ чысыл рекламӕйы фӕрцы цӕрынхъом уыдысты, уӕд ныр лӕмӕгъӕй-лӕмӕгъдӕр кӕнынц. Зынгӕ фӕкъаддӕр сты сӕ тиражтӕ, бирӕтӕ ӕхгӕд цӕуынц. Ӕцӕгдзинадӕй национ дзыллон хабархӕссӕг фӕрӕзтӕ цы уавӕры сты, уый тыххӕй информаци ссарӕн нӕй. 2017 азы 14 августы онг «Роскомнадзор»-ы бӕрӕггӕнӕнтӕм гӕсгӕ Уӕрӕсейы адӕмты 60 ӕвзагыл уагъд цӕуы 1931 газет ӕмӕ журналы. Фӕлӕ цавӕр ӕвзӕгтыл ӕмӕ цал газет ӕмӕ журналы, уый сбӕрӕг кӕнын нӕ бон нӕ баци. 2014 азы Уӕрӕсейы Постӕн дотацитӕ, газеттӕ ӕмӕ журналтӕ фӕхӕццӕ кӕныны тыххӕй, куы нал дих кӕнынц, уӕдӕй сӕвзӕрд ӕвирхъау уавӕр. Æртӕ азмӕ бӕстӕйы газеттӕ рафыссыны хъуыддаг 40 проценты къаддӕр фӕци», — загъта Мария Христофорова.

Куыд бамбарын кодта, афтӕмӕй национ газеттӕ ӕмӕ журналтӕм Уӕрӕсейы цавӕрдӕр ӕнахуыр ахаст сӕвзӕрд, цыма искӕй ӕккой бадынц, ахӕм цӕстӕй сӕм кӕсынц. Райхуъысы, ома, уӕхӕдӕг февналут амалхъомадон архайдмӕ. Се ‘ппӕтӕй дӕр ферох, национ газеттӕ ӕмӕ журналтӕ кӕй цӕуынц, уый у, паддзахад адӕмыхӕттытӕн аргъ кӕй кӕны, уый ӕвдисӕг. Бирӕтӕ дзурынц, ома, 5-10 азы фӕстӕ национ мыхуыры фӕрӕзтӕ ӕхгӕд ӕрцӕудзысты. Фӕлӕ, уыцы мыхуырон фӕрӕзтӕм паддзахад уӕлӕнгай цӕстӕй хъуамӕ ма акӕса.

Ныхасгӕнӕг бӕстондӕр фӕбӕрӕг кодта «Медиагруппа «Ситим» цавӕр мадзӕлттӕй пайда кӕны, цӕмӕй мыхуыры фӕрӕзтӕ хъахъхъӕд цӕуой, уый тыххӕй. Уыимӕ, фарстатӕ рӕгъмӕ хӕссынц ӕппӕтуӕрӕсеон ӕмвӕзадмӕ. Уӕрӕсейы Федерацийы ӕхсӕнадон палатӕйы байхъуыстой цӕрджытӕм мыхуыры фӕрӕзтӕ фӕхӕстӕгдӕр кӕныны тыххӕй фарстамӕ, уӕдӕ Дагомысы Уацхӕсджыты ӕппӕтуӕрӕсеон XIX фестивалы дӕр скодтой цӕлхӕмбырд. Мария Христофорова ма фӕнысан кодта, национ газеттӕ ӕмӕ журналтӕн баххуысы хъуыддӕгтӕ кӕмӕ хауынц, уыцы гражданты къордтӕ ӕмӕ организацитӕ дӕр. Сӕрӕвӕрӕнӕн та рахаста ахӕм хатдзӕг, ома, хӕрзхъӕд ӕмӕ мидисджын этникон прессӕ хъӕуы ӕрмӕстдӕр йӕ адӕмыхатты ӕмӕ паддзахады. Уымӕ гӕсгӕ йӕм уазал цӕстӕй — мӕнӕ ацы фӕрӕз тагъд фесӕфдзӕн, никӕй хъӕуы — кӕсӕн нӕй. Ахӕм ахаст йӕ фӕстӕ расайдзӕн диссаджы социалон зындзинӕдтӕ. «Кӕд паддзахад абон домы, ома, национ газеттӕ ӕмӕ журналтӕ сӕхи фӕдарынӕн сӕхӕдӕг ӕхца кусӕнт, зӕгъгӕ, уӕд уый у тӕссаг, мӕнгӕфсон зондахаст. Чысыл тиражтӕ ис нымӕцӕй чысыл адӕмыхаттыты прессӕйӕн, хъуамӕ ахӕм газеттӕ ӕмӕ журналтӕ ӕхца куыдӕй кусой? Хъӕуы федералон финансон ӕххуыс», — загъта «Медиагруппа «Ситим»-ы генералон директор.

 ХОЗИТЫ Барис, Цӕгат Ирыстоны Хетӕгкаты Къостайы номыл паддзахадон университеты ирон филологийы факультеты сӕргълӕууӕг: “Журналисттӕ цӕттӕ кӕныны фарста у ахсджиаг”

«Абон кӕй ӕрӕмбырд стӕм ӕмӕ национ мыхуыры риссаг фарстатыл афтӕ ӕргомӕй кӕй ныхас кӕнӕм, уый йӕхӕдӕг дӕр у стыр хъуыддаг, ӕмӕ йӕ, ӕнӕмӕнг, хъӕуы адарддӕр кӕнын, иннӕ ахӕм конференци саразын хъӕуы Грознайы, Налцыччы ӕмӕ афтӕ дарддӕр», — загъта раныхасгӕнӕг. «Дзыллон информацийы национ фӕрӕзтӕн кусджытӕ цӕттӕ кӕныны фарстайыл ныхас кӕнгӕйӕ, уый куыд бафиппадта, афтӕмӕй национ журналисттӕ университет цӕттӕ кӕнын райдыдта 25 азы размӕ уӕды ректор Мӕхӕмӕтты Ахуырбеджы хъӕппӕрисӕй. Фӕлӕ цӕмӕдӕр гӕсгӕ фӕстаг цалдӕр азы уыцы хорз фӕтк нал уыд. Ныр университеты журналистикӕйы факультеты декан Хӕбӕлаты Фатимӕ бацӕттӕ кодта курдиат республикӕйы Сӕргълӕууӕджы номыл, цӕмӕй университет ногӕй цӕттӕ кӕнын райдайа ирон журналистты. Хозиты Барис ӕрымысыд, раздӕры азты газетӕн ӕхсӕнадон уацхӕсджытимӕ цы ӕнгом бастдзинад уыд ӕмӕ уыцы бастдзинад газетӕн дӕр ӕмӕ йӕ кӕсӕгӕн куыд стыр пайда кӕй уыд, уыцы хорз ӕгъдау, ӕмӕ йӕ, йӕ хъуыдымӕ гӕсгӕ, хъӕуы сног кӕнын, цӕмӕй газетӕн йӕ кӕс- джыты нымӕц фылдӕр кӕна. Уыимӕ, ӕхсӕнадон уацхӕссӕг, гӕнӕн ис, ӕмӕ уа канд ас адӕймаг нӕ, фӕлӕ скъоладзау дӕр. Национ мыхуыры фӕрӕзтӕм ӕрыгӕтты ӕргом здахын — уый уаид бынтон хорз. Ирон журналисттӕ цӕттӕ кӕныны фарстайы тыххӕй Хозийы-фырт куыд бафиппайдта, афтӕмӕй абон цӕттӕ кӕнын хъӕуы, дыууӕ ӕвзагыл дӕр — ирон ӕмӕ уырыссагыл — ӕмхуызон хорз фыссын чи зона, ахӕм дӕсны кусджытӕ. «Уӕвгӕ та газет «Рӕстдзинад» Гиннесы чиныгмӕ бахӕссыны аккаг у, уымӕн ӕмӕ уал азы дӕргъы йӕ ном нӕ аивта, сыгъдӕгӕй йӕ бахъахъхъӕдта ӕмӕ йӕ сӕ- рыстырӕй хӕссы абон дӕр», — загъта Хозиты Барис.

ТОМАЙТЫ Сергей, сывӕллӕтты литературон аивадон журнал «Ногдзау»-ы редактор: «Сывӕллӕтты журнал хъуамӕ ахада рӕзгӕ фӕлтӕры хиӕмбарындзинадыл

Сывӕллӕтты литературон-аивадон журнал «Ногдзау»-ы сӕйраг редактор Томайты Сергей конференцийы архайджыты базонгӕ кодта ацы мыхуыры фӕрӕзы нырыккон уавӕримӕ, фӕбӕрӕг кодта, цы фидӕн ӕм ӕнхъӕлмӕ кӕсы, уый. Бӕстондӕр ӕрныхас кодта, рӕзгӕ фӕлтӕры национ хиӕмбарындзинадыл сывӕллӕтты журнал куыд хъуамӕ сахада, уый тыххӕй.

«Цӕмӕдӕр гӕсгӕ, нырыккон дуджы йӕ тыхы бацыдис ирон адӕмы удварны хӕзнатыл цъыф калыны, былысчъилтӕ кӕныны фӕзынд. Цивилизацийы уыцы уылӕнӕй, йӕ маргӕй фӕхъӕстӕ сты уынгтӕ, скъолатӕ, Интернет, телеуынынад. Мах уыцы тӕссагдзинӕдтӕн цӕлхдуртӕ ӕрӕвӕрыны охыл хъуамӕ нырыккон сабийы ӕмӕ йӕ ныййар- джыты хиӕмбарынадыл фӕзынӕм, рӕстӕг кӕй бафӕлвӕрдта, уыцы литературон, музыкалон ӕмӕ дзыхӕйдзургӕ сфӕлдыстады фӕрцы», — загъта Томайы-фырт. Куыд радзырдта, афӕмӕй рӕхджы журналӕн фӕзындзӕнис, аивадон ӕмӕ мультипликацион кино- нывтӕ, алыхуызон хъӕзтытӕ, дзырдбыдтӕ, ерыстӕ ӕмӕ ӕндӕр хиирхӕфсӕн мадзӕлттӕ кӕм уыдзӕн, ахӕм сайт. Сайты фӕрцы рӕзгӕ фӕлтӕры патриотон ӕмӕ удварны хъомылад, ирон ӕвзаг базоныны хъуыддаг фӕахадгӕдӕр уыдзысты, уым бакӕсӕн уыдзӕн курдиатджын ирон поэттӕ ӕмӕ нывгӕнджыты уацмыстӕм. Кӕд «Ногдзау» сывӕллӕтты журнал у, уӕд сӕ, фыццагдӕр, зонгӕ кӕны алфамбылайы дунеимӕ, ӕххӕст кӕны рухстауӕн ӕмӕ зонынадон хӕстӕ.

Журналы сӕйраг редактор куыд бафиппайдта, афтӕмӕй ныртӕккӕ чиныг кӕсынмӕ тырнындзинад къаддӕрӕйкъаддӕр кӕны суанг райдайӕн кълӕсты ахуырдзауты ‘хсӕн дӕр. Уымӕ гӕсгӕ агурдзысты алыхуызон гӕнӕнтӕ, пайда кӕндзысты, ныртӕккӕ сывӕллӕттӕн хӕстӕгдӕр ӕмӕ уарзондӕр цы фӕрӕзтӕ сты, уыдонӕй. «Мӕ зӕрдӕ дарын, ӕмӕ «Ногдзау» суыдзӕн нӕ республикӕйы цӕрӕг ӕппӕт адӕмыхӕттытӕн дӕр ирон культурӕ базоныны ӕмӕ бауарзыны фӕрӕз. Махӕй рох нӕу, журналмӕ хъомыладон хӕс дӕр кӕй хауы, уый. Уымӕ гӕсгӕ Ирыстонӕн ӕмӕ Уӕрӕсейӕн хъомыл кӕндзыстӕм ныфсджын, ахуыргонд, удварнӕй хъӕздыг гражданинты», — загъта Томайы-фырт.

Иван ГАВРИЛЬЕВ, газет «Кыым»-ы сӕйраг редактор (Республика Саха): “Уавӕр алы ран дӕр у иухуызон”

«Национ мыхуыры фӕрӕзты абоны уавӕр, мадӕлон ӕвзаг бахъахъхъӕныны фарста, национ ӕвзагыл фыссӕг журналисттӕ кӕй нӕ фаг кӕны, уыцы фарста ис алы республикӕйы дӕр. Национ мыхуыры фӕрӕзтӕн сӕ тиражтӕ кӕнынц къаддӕр. ӕз уыдтӕн Татарстаны дӕр, Башкортостаны дӕр, Комийы дӕр, Бурятийы дӕр, ӕмӕ уавӕр алы ран дӕр иухуызон, кӕм дӕр иуцасдӕр хуыздӕр, кӕм уӕззаудӕр, — загъта уый. — Уынгты фӕцӕйцӕугӕйӕ адӕймаг мадӕлон ӕвзаг куы нӕ хъуса, уӕд уый у ӕвзагӕн йӕ уавӕры фыццаг бӕрӕггӕнӕн, ӕмӕ уый у ахъуыдыйаг».

 Мухаммед ХАФИЦЕ, Кӕсӕг-Балхъары Республикӕйы газет «Адыгэ псалъэ»-йы сӕйраг редактор:

“ Стыр хӕс ӕвӕрд ис национ мыхуыры фӕрӕзтыл”

«Нӕ мадӕлон ӕвзаг бахъахъхъӕныны фарста махӕн дӕр у ахсджиаг, ӕмӕ йӕ бахъахъхъӕныны тыххӕй ӕххӕст кӕнӕм алыхуызон проекттӕ. Уыдонӕй иу у, Кӕсӕг-Балхъары, Адыгейы ӕмӕ Хъӕрӕсе-Черкесты Республикӕйы адыгаг ӕвзагыл цӕуӕг газетты редакцитӕ ныр фӕстаг 33 азы дӕргъы квартӕл иу хатт кӕй бацӕттӕ кӕнынц ӕмӕ иумӕйаг номыртӕ кӕй рауадзынц, уый. Уал азмӕ бацӕттӕ кодтам ӕмӕ рухс федтой нӕ газетты 120 ахӕм иумӕйаг номыры. Ныхас дзы фӕцӕуы мадӕлон ӕвзаг бахъахъхъӕныныл, фӕсарӕнты цӕрӕг не ‘мзӕххонтимӕ культурон бастдзинӕдтӕ фидар кӕныныл, глобализацийы процесстӕ алы адӕмыхатты хицӕндзинадыл куыд ахадынц, ууыл ӕмӕ ӕндӕр ахсджиаг фарстатыл». Куырыхон ӕмӕ фӕлтӕрдджын журналист Мухаммед Хафицейы хъуыдымӕ гӕсгӕ, алы наци дӕр йӕ хицӕндзинад цӕмӕй бахъахъхъӕна, уый тыххӕй, фыццаджыдӕр, бахъахъхъӕнын хъӕуы йӕ мадӕлон ӕвзаг, ӕмӕ ацы ран стыр хӕс ӕвӕрд ис национ мыхуыры фӕрӕзтыл.

 

Владимир МАМОНТОВ, “РУ ФМ” (“Говорит Москва”-йы) генералон директор:

“Алы адӕмӕн дӕр се ‘взаг у сӕ хӕзна”

— Мӕхӕдӕг райгуырдтӕн Дард Скӕсӕны, фӕлӕ стыр ӕхсызгонӕй базонгӕ дӕн Цӕгат Ирыстонимӕ, мӕ зӕрдӕмӕ тынг фӕцыдысты ирон адӕм, сӕ культурӕ. Аланты зӕхмӕ мӕ мӕ фӕндаг ӕркодта нӕ бӕстӕйы проект «Уӕрӕсе-Белорусси». Йӕ фӕлгӕты алы адӕмыхӕттыты минӕвӕртты ‘хсӕн арӕзт цӕуынц фембӕлдтытӕ, зонгӕ кӕнӕм нӕ кӕрӕдзи культурӕимӕ, ӕгъдӕуттимӕ, ахуыр кӕнӕм кӕ кӕрӕдзимӕ хъусын, кӕрӕдзи ӕмбарын. Алы адӕмӕн дӕр се ‘взаг у стыр хӕзна, ӕмӕ абоны глобали- зацийы дунейы уый у уӕлдай хъахъхъӕнинагдӕр. Мӕнмӕ гӕсгӕ, национ мыхуыр уыцы хъуыддаджы цы стыр бавӕрӕн хӕссы, уымӕн аргъ скӕнӕн нӕй. Нациты ‘хсӕн ӕнгом бастдзинад, адӕмы иудзинад куыд ахсджиаг сты, уый уӕлдай тынгдӕр ӕмбарӕм мах, Советон Цӕдисы чи райгуырд ӕмӕ йӕ чи ӕрӕййӕфта, уыдон. Æмӕ нӕ хӕс удварны уыцы хъӕздыгдзинад бахъахъхъӕнын ӕмӕ йӕ дарддӕры фӕлтӕртӕм адӕттын».

ЕНАЛДЫТЫ Хъазыбег, ӕппӕтдунеон адӕмон змӕлд «Иры Стыр Ныхас»-ы сӕрдары хӕдивӕг: “Газет адӕммӕ хӕссы рӕстдзинад”

«Арфӕ кӕнын конференцийы ӕппӕт уазджытӕн ӕмӕ йӕ архайджытӕн. «Рӕстдзинад» стыр бавӕрӕн хӕссы ирон ӕвзаг, ирон ӕгъдау ӕмӕ культурӕ бахъахъхъӕныны хъуыддагмӕ. Уый у ирон адӕмы фидиуӕг, сӕ царды айдӕн. Уал азы дӕргъы газет адӕммӕ хӕста рӕстдзинад, ӕргомӕй дзырдта царды риссагдӕр фарстатыл, лӕггад кодта ӕмӕ абон дӕр кӕны ирон адӕмӕн. Уымӕ гӕсгӕ йӕ 95-ӕм азы юбилей бӕрӕгбон у ӕппӕт Ирыстонӕн дӕр», — загъта уый.

 

Юрий МИКУШИН, «Уӕрӕсейы пост»-ы филиал — Стъараполы крайы посты бастдзинады федералон управленийы сӕргълӕууӕджы хӕдивӕг:

“Бынӕттон мыхуыры фӕрӕзтӕ сӕ алы кӕсӕджы дӕр цӕстыгагуыйау хъахъхъӕнынц”

«Нӕ куыстуат ӕмӕ Ирыстоны мыхуыры фӕрӕзтӕ рагӕйӕрӕгмӕ дӕр сты ӕмкусджытӕ. Кӕй зӕгъын ӕй хъӕуы, тиражты хъуыддаг у сагъӕссаг, фӕлӕ уавӕрӕн ис фӕхуыздӕргӕнӕн, — загъта уый. Куыд радзырдта, афтӕмӕй пост арӕх саразы «Газеттӕ ӕмӕ журналтӕ рафыссӕджы бон»- тӕ, ӕмӕ уӕд алы адӕймагӕн дӕр вӕййы хорз фадат газет кӕнӕ журнал рафыссын йӕ ныййарӕгӕн, йӕ фарсмӕ чи ис ӕмӕ йӕ авналӕнтӕ цыбыр кӕмӕн сты, ахӕм адӕймагӕн, сывӕллӕтты хӕдзӕртты чи хъомыл кӕны, ахӕм сидзӕртӕн. Йӕ ныхасмӕ гӕсгӕ, газеттӕ ӕмӕ журналтӕ рафыссыны фӕстаг кампанийы бӕрӕггӕнӕнтӕ куыд равдыстой, афтӕмӕй, йӕ адӕм ӕппӕтӕй фылдӕр кӕмӕн кӕсынц, Цӕгат Кавказы федералон зылды ӕппӕт уыцы республикӕты ‘хсӕн Ирыстон ис фыццаг бынаты, ӕмӕ уый у хорз нысан. «Уый дзурӕг у, бынӕттон мыхуыры фӕрӕзтӕ раст политикӕйыл хӕст кӕй сты ӕмӕ йӕ алы кӕсӕджы дӕр цӕстыгагуыйау кӕй хъахъхъӕнынц, ууыл. Уӕрӕсейы иннӕ регионты уавӕр у дзӕвгар уӕззаудӕр, — бафиппайдта Юрий Микушин.

— Æмӕ йӕ фӕхуыздӕр кӕнынӕн адӕмы ӕнцондзинадӕн сарӕзтам Газеттӕ ӕмӕ журналтӕ рафыссыны агентад. Рафыссӕн сӕ ис Интернеты сайты фӕрцы дӕр, ӕрмӕст уый тыххӕй «Уӕрӕсейы пост»-имӕ адӕймаджы бафыссын хъӕуы бадзырд». Постхӕсджытӕ дӕр, йӕ ныхасмӕ гӕсгӕ, архайынц мыхуыры фӕрӕзты тираж фӕфылдӕр кӕныныл, уый тыххӕй ныхас кӕнынц адӕмимӕ. Раныхасгӕнӕг куыд загъта, афтӕмӕй ацы аз газеттӕ ӕмӕ журналтӕ рафыссыны ӕргътӕ нӕ аивдзысты, фӕлӕ 2019 азы «Уӕрӕсейы пост» тарифтӕ 20-30 проценты фӕфылдӕр кӕндзӕн. Уымӕ гӕсгӕ мыхуыры фӕрӕзтӕн сӕ тиражтӕ бынтондӕр фӕкъаддӕр кӕнын чи нӕ бауадза, ахӕм мадзӕлттыл бакусын хъӕуы ныртӕккӕ, уый тыххӕй та пост ӕмӕ газеты редакциты ӕмгуыстад хъуамӕ уа ноджы ӕнгомдӕр.

Конференцийы кӕронбӕттӕны Мария Христофорова ӕхсызгонӕй фехъусын кодта, газет “Рӕстдзинад” кӕй сси Уӕрӕсейы национ мыхуыры фӕрӕзты ассоциацийы уӕнг, ӕмӕ ӕмбӕлгӕ сертификат радта Битарты Маринӕйӕн. Конференцийы архайджытӕ сфидар кодтой, национ мыхуыры дарддӕры рӕзтӕн ахъаз чи уыдзӕн ӕмӕ ныхас кӕуыл цыд, уыцы ахсджиаг фарстаты фӕдыл уынаффӕ.

 

БУТАТЫ Эльзӕ ӕмӕ ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here